19 куартолэзь — Пионерилэн нуналэз

19 куартолэзе 1922 арын Москваын комсомол конференция пионер отрядъёс кылдытон сярысь малпанэ вуиз. СССР-ын та нунал Пионерилэн кылдэм нуналэныз лыдъяськиз.

Пионерия нуналэ ортчытъяськылӥзы пӧртэм сборъёс, концертъёс, экскурсиос, походъёс, спорт ӵошатсконъёс но мукет. Соку ик быдэс арлы звеноос, отрядъёс но дружинаос куспын ӵошатсконъёслы йылпумъянъёс лэсьтылӥськизы, пусйылӥзы пионер ужъёсын азьветлӥсьёсты. Ӟаны школаысь пионеръёс но октябрёнокъёс та нуналэ Новая Гора паласен васькись пичи шурлэн Кушкет шуре усён дораз люкаськылӥзы. Татчы ик лыкто вал Карек-Серма, Кушкет, Турья начальной школаосысь дышетскисьёс но. Отрядъёс ваньзы пӧртэм плакатъёсын, сяськаосын чеберъямын луозы вал. Мазэ веранэз, мылкыд котькинлэн ӝутскемын вал. Отын тылскем котырын сбор ортчытӥськылӥз, одно ик «Взвейтесь кострами» кырӟан быдэстылӥськиз, собере котькуд отряд концерт номер дасялляз, спорт шудонъёс радъяськылӥзы. Отрядъёс лымшорлы сиён дасяллязы, уноезлэн — чорыг лым но компот. Одно ик директормы И.Д. Гришкин тус уськытӥсь воргоронэз ӧтёз вал.

Советской Союз пазяськем бере, Россиын та праздник официальной ӧз луы ни. Но сое тросаз интыосын али но пусъё. Кылсярысь, Ӟаны шоръёзо школаын сое турист-спорт праздник карыса ортчытъяло (азьло интыяз ик).

Туэ Пионерилы 100 ар тырме. Кылем даурлэн 30-80-тӥ аръёсаз кыдам пионеръёс, шумпотыса тодазы вайыло асьсэлэсь пионер дыръёссэс. Кыӵе шулдыр вал со аръёс, ваньмыз тырмыт ӧвӧл ке но! Вордскем шаермылы пайдаё ужъёс, ог-огедлы юрттон, дисциплина, дышетскон шоры учкон, зэмлык понна нюръяськон, спортэн вырон но ГТО нормаосты быдэсъян — со та аръёслэн тодметъёссы. Пионеръёс данэн нуллӥзы куинь сэрего горд пионер галстукез.

Галстуктэ керттӥд ке,

Утялты сое.

Бен, со уго одӥг тус

Асьме знамяен.

(Степан Щипачёв)

Та кылбурез удмуртэн но, ӟучен но ваньмыз пионеръёс тодо вал.

Тодматӥськом Карек-Серма гуртысь пӧртэм аръёсысь пионеръёслэн тодэ ваёнъёсынызы.

Карек-Серма начальной школалэн историез сярысь альбомысь: «Карек-Сермаын нырысетӥ пионеръёс но комсомолецъёс луо Чумаков Гаврил, Волков Дмитрий, Архипов Леонид, Никитин Анисим, Федотова Настя, Волкова Анфиса, Матвеев Николай. Куд-огъёсызлэн анай-атайёссы пиналъёссэс пионере пыртыны пумитъясько, соосты инмарлы пумит мынӥсьёс шуо. 30-тӥ аръёсы пионеръёс выль улон сярысь книгаос, газетъёс лыдӟыло, бордгазетъёс поттыло, концертъёс дасяло, праздникъёслы лозунгъёс гожъяло: «Нырысетӥ Май — буржуйёслы шай!», «Кулак классэз выжытэк быдтоно!», «Дышетсконо, дышетсконо, дышетсконо!» Данлы кырӟанъёс луо «Интернационал», «Марсельеза». Гожтэт тодӥсьтэмъёсты лыдӟыны но гожъяськыны дышетылӥзы».

«Азьлане» район газетысь 1.05.1938 арын потэм заметка

«Умой дышетскисьёс. Карык-Серма начальной школаын дышетскись пионеръёс эскерон испытаниослы дасяськыны кутскизы. Соос пӧлысь мыло-кыдо дасясько Шестакова Лиза (али Лазаревоын улэ — авт.), Иванов Вася (войнае быриз), Сидоров Павел (кулэмын ини), Михайлов Тихон (кулэмын ни). Соос куинетӥ четвертез но умой йылпумъязы.

И. Ташкин»

Тодэ ваёнъёс

Петрова Зоя Илларионовна — война дырысь пионер

— Мынам пионер аръёсы жугиськон дыръя тупазы. Ӧй вал милям галстукмы но, тетрадьёс но, вуж газет дуръёсы, графель пулъёсы гожъяллямы. Атай ожын вал, анае куинь нылпиосын кылиз. Мынам куд-ог ёзъёсылэн школае ветлыны но луонлыкъёссы ӧй вал. Выны мынэсьтым кык ареслы покчи, со война бере пионере пыремын, солэн галстукез вань ни. Трос аръёс ортчизы ни со дырысен, но уг вунэтӥськы колхозлы юрттылэммес. Гожъяськыны быгатымтэ кышномуртъёслэн картъёссылы гожтэт гожъяса но вырылӥм, фронтовикъёслы салам люканы юрттылӥм. Со вакыт улон секыт вал, колхозын ужан машинаос ӧвӧл, соин ваньзэ киын быдэсъязы. Урокъёсмы бырем бере, кошкиськом вал бусые. Быгатӥм-а, ӧм-а, культоос думылӥм, нуллӥськом вал кутсаськон машина доры, кылем ю шепъёс бичан но пичиослэн ужзы вал. Картофка трос уг пукто вал ке но, бичаны поталлям. Толалтэ йӧн-йӧн дышетским ни. Дышетскон дыръя концертъёс дасяллямы, асьмелэсь быгатэммес колхозникъёс азьын возьматъяллямы. Походъёсы но ветлылӥм. Кушкет шур дурын шулдыр луэ вал. Яратоно кырӟанъёсмы «Взвейтесь кострами», «Юный барабанщик», «Ленин сюрес кузя мыно».

Константинова Евдокия Петровна — 50-тӥ аръёсысь пионер

— Монэ пионере 1957-тӥ арын Карык-Серма начальной школаын ньылетӥ классын дышетскон дыръя пыртӥзы. Пионер сборын сӥё-дано кыл сётӥм умой дышетскыны, милемлы чыртые горд галстук думизы. Пионеръёс дышетсконын ог-огзылы юртто вал. Люкаллямы макулатура, металлолом, пень, курег кыед, пу эгыр. Тимуровской командаос оген улӥсьёслы юрттылӥзы. Дышетскыны но, ужаны но тыршылӥм, шутэтскыны но вуылӥм. Мынам син азям пуксе 19 май праздникез ортчытъян. Шундыё шуныт нунал. Ӝужыт юбо йылын горд флаг тӧла. Горн но барабан куараос. Ваньмыз отряд колоннаос чебермамын бумагалэсь лэсьтэм сяськаосын, дыдыкъёсын, плакатъёсын. Ӝуа бадӟым тылскем. Линейка бере концерт, спорт ӵошатсконъёс, ческыт чорыг лым но чай. Праздник бере, ӵош люкаськыса, тодэм кырӟанъёс кырӟаса бертылӥм. Октон-калтон дыръя колхозлы юрттылӥм.

Иванова Зоя Александровна — 60-тӥ аръёсысь пионер (вера солэн нунокез Иванов Алексей Валерьевич)

— Кызьы ке но сундукын бугыръяськыкум, куинь сэрего басма шедьтӥ. Соку мон покчи классын дышетскисько на вал. Песяелэсь юасько: «Яралоз-а мон тае велосипед борды думо?» Песянай кутскиз та горд басма сярысь вераны. Трос вераз. Малы галстуклэн куинь пумыз? Малы со горд тусо? Утёд ке, со бабайлэн пионер галстукез вылэм. Пионер галстук сярысь кылбур но вераз. Пионер кырӟанъёс тодэ на, тазьы праздникъёсы тодазы вайыса кырӟало. Песяе адӟем карымон пионер вылэм. Дышетсконын, спортын, огъя ужъёсын тыршемез понна грамотаосыз но вылӥллям. Песяелэн Маня нылыз школаез азвесь медален йылпумъям, пиез, мынам атае — дышетӥсь.

Никитина Анисия Никоновна — 60-тӥ аръёсысь пионер

— Мон дано Ципья школаын дышетски, кытын пионеръёслэн кивалтӥсьсы Ф.Г. Гильманов вал. ТАССР-ысь школаысь сӥё-дано дышетӥсь, «Знак Почёта» орденлэн кавалерез. Отрядмылэн пионервожатоез Карабаева Зинаида, дышетӥсьмы А.Ф. Шляпкина вал. Муресь тодэ ваёнъёсы кылизы «Костёр Дружбы» пионер праздник сярысь, кудӥз огазеялляз Мари, Татарстан республикаосысь но Киров улосысь азьветлӥсь пионеръёсты. Трос пол та празднике пыриськылӥ. Умой дышетскисьёс город-геройёсы, ленинской интыосы дунтэк экскурсиосы ветлылӥзы. Басьяллямы «Пионерская правда», «Дась лу!» газетъёс. Школаямы интернациональной эшъяськонъя клуб (КИД) ужаз, ГДР-ысь пионеръёсын гожтэтъяськылӥм.

Петров Анатолий Семёнович — 70-тӥ аръёсысь пионер

— Мон кӧня ке ар знаменосец, Ӟаны школаысь Советской Союзлэн Героез Юрий Смирнов нимо пионер дружиналэн председателез вал. Кӧня пол тазьы вазиськылӥ меда: «Дружина! Равняйс! Смирно! Товарищ старшая пионервожатая! Дружина к торжественному сбору готова!..» «К борьбе за дело Коммунистической партии Советского Союза будьте готовы!» Данэн нуллӥ пионер галстукез но значокез. Пионер уже мыло-кыдо пыриськем понна,  мыным «Орлёнок» Всесоюзной лагере путёвка кузьмазы. Гуртысьтымы таӵе ик путёвка басьтӥз на Нина Никитина. Лагерьын пумиськи странамылэн пӧртэм сэрегъёсысьтыз ас ёзъёсыным. Пионериез яратэменым ик, лэся, дышетон удысэ кыстӥськи. Арлы быдэ тунсыко «Зарница» военно-спортивной шудон ортчытылӥмы, тыршылӥмы кылем арыназ кадь медаз луы шуыса.

Игнатьев Юрий Валентинович — 70-тӥ аръёсысь пионер

— Монэ пионере 1974 арын Карык-Серма школаын куинетӥ классын дышетскыкум кутӥзы, отрядмы Советской Союзлэн Героезлэсь Валя Котиклэсь нимзэ нуллӥз. Ӟаны школаысен милемыз Кушкет школаысен лыктэм пионеръёсын огазеязы. Отрядмы бадӟымаз, 4 звенолы люкизы. Монэ звеньевое тодмоязы… Эскерылӥ чылкытлыкез, уроклы дасяськемзэс, асьсэды воземзэс. Праздникъёсы сборъёс ортчытъяллямы. Барабан жугем но горн шудэм куараос быдэс мугортӥм пото вал. Кык ар ӵоже школаын общественно-полезной уж понна кыл кутылӥ: макулатура, металлолом, кускыли люкан. Пионервожатоймы, мур тодонэн дышетӥсь, Антонида Петровна Иванова вал.

Хомякова Юлия Михайловна — 80-тӥ аръёсысь пионер

— Пионере пырыны кема дасяським: пионеръёс сярысь книгаос лыдӟылӥм, кырӟанъёс дышетскылӥм, пионеръёслэсь Законъёссэс, Кыл сётонзэс учкытэк тодоно… Милемыз пионере 22 апреле 1983-тӥ арын В.И. Ленинлэн вордскем нуналаз Тюнтер школаын пыртӥзы. Пыдын ветлӥм со кузя сюресэз! Тодам на, кызьы милемыз, Ӟаны, Кушкет, Починка, Тюнтер октябрёнокъёсты, школа коридоре султытӥзы. Кыӵе со шумпотымон вал! Горн но барабан куараос бурдъяськытылӥзы монэ. Котькудӥз вуоно пионер Родина азьын оскон кыл сётӥз. Нош ик пыдын бертӥм. Жадемме уг ни тодӥськы, эшеным Света Петроваен, ураме пырыку, курткамес вӧлак карим: мед адӟозы галстукмес! Пионере пыреммы бере, Пионерилэсь историзэ ялан дышетским. Гожтэтъяськылӥмы Белоруссиысь но Украинаысь покчи пионеръёсын, вошъяськылӥмы книгаосын, газет-журналъёсын, тусъёсын, киын лэсьтэм сувениръёсын. Праздникъёсы ӟечкылан открыткаос келяллямы. Табере соос ваньмыз Ӟаны школаысь шаертодонъя музейын утисько… Кӧласа походъёсы но ветлылӥм, пыриськылӥм школаысь «Инвожо» ансамбле, пӧртэм фестивальёслэн лауреатъёссы луылӥм. Со аръёс — улонысь тужгес шудоесь аръёс.

Дасязы Ӟаны шоръёзо школаысь дышетӥсь Н.А. Спиридонова, пенсиысь дышетӥсь В.П. Никитин.