21 тулыспал — Вордскем кыллэн калыккуспо нуналэз

Ципья школаысь бигер кылъя дышетӥсь Бахтиярова Раиса Загидулловна, пор кылъя дышетӥсь Иванова Алина Александровна но удмурт кылъя дышетӥсь Чернова Ираида Анатольевна Вордскем кыллэн калыккуспо нуналэз азьын «Азьлане» газетлы интервью сётӥзы. Дышетӥсьёсын вераськимы вордскем кылъёслэн туала югдурзы сярысь, нылпиосты вордскем кылзы борды кыскон понна ортчытӥськись ужрадъёс но кӧня ке мукет юанъёс сярысь.

— Туала дауре кылъёс трос воштӥськонъёсты, выльдӥськонъёсты чидало. Соин ог 10-15 ар талэсь азьло кылъёсъя дышетӥсьёслэн валтӥсь ужпумзы кыллэсь «чылкытлыксэ» утён вал ке (дышетскисьёсты шонер гожъяськыны, чылкыт вераськыны дышетон), туннэ нуналэ тӥ нылпиос вордскем кылзэс ӧжыт ке но мед валалозы, соин мед тунсыкъяськозы вылэм шуыса тыршиськоды…

Ираида Чернова: Озьы.  Кылсярысь, удмурт литература сярысь верано ке, туннэ ми нылпиос гожтосъёслэсь пуштроссэ ке но мед тодозы шуыса тыршиськомы. Бадӟым классъёсын дышетскисьёс али удмурт сямен валало ке, 5-6 классъёсын дышетскисьёс сярысь озьы вераны уг луы ини. Нылпиос мед валалозы шуыса, лыдӟем произведениез удмурт кылысен ӟуч кылэ берыктыса ик урокмы ортче. Озьыен, со произведениез эскерыны дыр но уг тырмы, зэмзэ верано ке, мылкыд но уг луы ини.

Раиса Бахтиярова: Та сярысь вераны капчи ӧвӧл ке но, ватытэк вераны кулэ: со зэмзэ но озьы. Тросэз нылпиос вордскем кылзэс вунэтыны кутскизы, дышетскыны секыт шуисьёс но вань. Но ми, дышетӥсьёс, озьы ке но тыршиськомы бигер кылэз мед дышетскозы, мед тодозы шуыса. Валало ке — умой ини. Ӧжытэзлы но шумпотӥськомы.

Алина Иванова: Пор кылэз дышетсконын но сыӵе ик проблема кылдӥз. Нылпиослэн пор кылэн тунсыкъяськонзы ыше. Соос али верасько ке но, литературной пор кыл соослы секытэн сётске ини. Урокъёсты ортчытыку но та ик муген шуг-секытъёс кылдо.
— Нылпиослы вордскем кылзылы яратон пыӵатон понна школаын кыӵе ке ужрадъёс ортчытӥсько-а? Со ужрадъёс, тӥляд малпамдыя, нылпиослы кельшо-а, шедьто-а соос асьсэлы отысь тунсыкозэ, кулэзэ? Анай-атайёс кызьы учко та шоры?

Ираида Чернова: Арлы быдэ сыӵе ужрадъёс ортчытӥськомы. Кылсярысь, 27 шуркынмонэ Удмурт кыллэсь нуналзэ, 21 тулыспалэ — Вордскем кыллэсь калыккуспо нуналзэ пусйиськомы. Асьме ёросысь Ципья, Шор Кушкет, Покчи Лӧзя но Кукмор ёросысь Лельвиж гуртысь школаосын дышетскись удмурт нылпиосын пумиськонъёс радъяськомы вал. Нылпиос со пумиськонэз шумпотыса витё, мыло-кыдо дасясько, соослы туж кельше. Дасяськомы кырӟан, эктон. Яра али усто мызганчимы Максим Григорьев вань. Озьы ик арлы быдэ удмурт кылъя но литературая ёрос, республика, услосвылкуспо олимпиадаосы пыриськыса, дышетскисьёсмы призо интыос басьто.

Раиса Бахтиярова: Сыӵе ужрадъёс туж трос ортчытӥсько. Ёрос масштабен но, республика масштабен но. Конкурсъёс, научно-практической конференциос, фестивальёс. Ми отчы мыло-кыдо пыриськиськомы, призо интыос но басьтӥськомы. Кылсярысь, кылем арын егит гожъяськисьёс пӧлын Всероссийской «Илхам» конкурсын дышетскисе 3-тӥ инты басьтӥз. «Мин татарча сойлэшэм» конкурсэ пыриськыса но, призо интыосын пусйиськиськомы. Огъя вераса, сыӵе конкурсъёс туж трос. Школаямы гинэ но дырын-дырын нылпиосты тунсыкъяськытон понна пӧртэм конкурсъёсты, викторинаосты радъяськомы. Нылпиос но, анай-атайёс но соосты тунсыкоен шедьто.

Алина Иванова: Конкурсъёс ӧжыт уг ортчытӥсько, зэмзэ но. Ми но отчы пыриськыны тыршиськомы. Кылем арын этнокультурной компонентэн трос йӧскалыкъем воскресной школаос пӧлын ортчись фестивале пыриськыса, призёр луимы. Асьмеос но конкурсъёсты ортчытыны тыршиськомы. Кинлы тунсыко потэ, со котьку дыр шедьтэ конкурсъёсы но, олимпиадаосы но пыриськыны. Жаляса вераны кулэ, туннэ пор кылъя кружокъёс ӧвӧл. Дас ар талэсь азьло арняяз ньыль час кружоклы (ЦВР-лэсь кружок) висъяське вал. Отын ми нылпиосын пор кырӟанъёсты, эктонъёсты дышетскимы. Табере нош перемена дыръя яке урокъёс бере гинэ дышетскыны быгатӥськомы.
Интервьюез пыр-почгес «Азьлане» газетысь лыдӟыны быгатоды.

Фото: автор