36 аръем историен ансамбль (+фото)

Ӟаны шоръёзо школа котьку данъяськыны быгатӥз нылпиос пӧлын удмуртлыкез ӝутонъя но азинтонъя мыло-кыдо ужаменыз. Та школаын дышетӥсьёс азьло дырысен тыршизы, котькуд нылпи мед тодоз анай кылзэ, ас калыкезлэсь сям-йылолъёссэ, лулчеберетсэ шуыса.

Та ӧрын трос аръёс ӵоже вераса быдтонтэм бадӟым уж нуэ школаысь фольклорно-этнографической коллективлэн кивалтӥсез, физкультурая но крезьгуръя дышетӥсь Камаев Виктор Павлович но. Со нылпиослы удмурт кыллэн но удмурт сям-йылолъёсты тодонлэн кулэлыкез сярысь гинэ уг вера, со пиналъёсты кырӟаны, эктыны ачиз дышетэ. Берло аръёсы солы нылыз, та школаын ик ужась Лилия Викторовна Чирикова но юрттэ, соос валче коллективен кивалто. Коллективлэн кивалтӥсьёсыныз пумиськыса, ансамбльлэн туннэ улонэз, ортчемез сярысь вераськимы. 

— «Инвожо» ансамбль 1986-тӥ арын кылдэм шуыса тодӥсько. Кинлэн кичӧлтэменыз, кинлэн юрттэменыз но кызьы со кылдӥз, Виктор Павлович?

— 1986-тӥ арын мон Ӟаны школаын ужаны кутски. Ӝыны ставкаен воспитатель вал, собере музыка но «общественно-полезный труд» урокъёсты ортчытыны сётӥзы. Класс но оскизы. Ӵапак со дыре ик ансамбль но кылдӥз. Солэн кылдытӥсез вал школамылэн азьвыл директорез Иван Васильевич Ермаков. Солэн кивалтэмез улсын кылдӥз ансамбль. Кивалтӥсез но трос аръёс ӵоже со луиз. Но со азьло али кадь ансамбль ӧй вал — нырысь дышетӥсьёслэн коллективзы гинэ вал отын, дышетскисьёс ӧй вал на. Дышетӥсьёслэн коллективзы кутскемен ваньмыз улӟиз. Антонида Петровна Павловалэн, Антонида Васильевна Ермаковалэн быгатонлыксы бадӟым вал, соослэн активной луэменызы, пӧртэм ӵектонъёс сётэменызы, мон кулэ луись гуръёсты мызганэн шудӥ, нош соос кырӟазы, эктӥзы. Тӥни озьы дышетскимы. Озьы тыршеменымы 1987-тӥ арын Казане вуытозь ветлӥмы, фольклор фестивале пыриськимы. Отын телевидение азьын но выступать каримы, собере милемлы, та дышетӥсьёслэн коллективезлы, «народной» ним сётӥзы. Соку со коллектив Ӟаны культура юртлэн коллективез шуыса лыдъяське вал али, малы ке шуоно, дышетӥсьёс сяна, коллективе гуртын улӥсьёс но пыриськизы. Ачим ужаны кутскем дырысеным нылпиосын но вырисько вал ини, праздникъёсты ортчытъяськомы вал. Озьы тӥни классэн ужам бере, классэн пӧртэм праздникъёсы, ужрадъёсы дасямы кырӟан-эктонъёс, тӥни со бордысен кутскиз ансамбльлэн ужез но. Соку директорлэн визьнодан ужъёсъя воштӥсез луыса ужась Павлова Антонида Петровналэн ӵектэменыз дышетскисьёслэн но коллективзы кылдӥз. Антонида Васильевна но юрттэ вал. Ветеран дышетӥсьёслэн удмуртлыкез ӝутон бордын тыршемзы бадӟым вал. Соослэн тыршеменызы та ансамбль кылдӥз но туннэ нуналэ со вань.

— Виктор Павлович, Лилия Викторовна, туннэ нуналэ «Инвожо» ансамбле кинъёс пырисько?

— Инвожо ансамбле туннэ нуналэ 8-11 классысь нылпиос ветло. Кылизы 10 классын дышетскисьёс куинь кузя — Юлиана Кешишева, Ульяна Евдокимова, Родион Исаев, 11-тӥ классысь Дина Михайлова, Яна Гришкина. Та дышетскисьёс кема аръёс ӵоже ветлӥсьёс пӧлысь. Мукетъёсыз кемалась ӧвӧл ветло. Нылпиослэн огъя лыдзы туннэ нуналэ 19 луэ.

— «Инвожоос» кемалась ӧвӧл Казаньын ортчем адӟытонэз ворсанэ пыриськизы…

— Озьы. Со ужрадэ пыриськон понна ми куать номер дасямы. Апакова Лиана «Вордскем гуртэ» кырӟанзэ быдэстӥз, «Инвожо» ансамбль выступить кариз «Семык шудонъёсын», Михайлова Дина удмурт эктон быдэстӥз, «Кык юсьёс» кырӟанэз кырӟамы, пумаз «Ум люкиське» кырӟанэз но ваньмы ӵош быдэстӥмы. Нимысьтыз бадӟым тау вераммы потэ Андрей Герасимовлы, Ольга Чайниковалы, Марина Ивановалы, соос милемыз поддержать каризы, витизы, бадӟым куноосты кадь пумитазы-келязы.

— Нылпиослэн мылкыдзы вань-а мае ке выльзэ дышетскыны?

— Соослы тунсыко. Куд-ог нылпиос сокем тыршо, доразы бертыса но асьсэ понна эктонъёсты дышетско, собере мукет нуналаз лыктыса милемлы возьмато. Ми ансамблямы люкамы 8-11 классын дышетскисьёсты. Фольклор сярысь соос ини тодо, концертъёсы дасяськоно, репетициосы ветлоно шуыса умой валало. Юамы, кинлэн потэ ансамбле пыриськемез, мылкыд карисьёсты ваньзэсты басьтӥмы.

— Озьы бере, котькуд мылкыд карись дышетскись быгатэ ансамбле ветлыны? Со понна нокыӵе бырйыса басьтон пыр ортчоно ӧвӧл?

— Котькуд мылкыд карись нылпи пыриськыны быгатэ. Туннэ нуналэ тани куинь бигер пиосмы но вань. Соос асьсэлэн мылкыдзы луыса ансамбле ветлыны кутскизы. Соос удмурт кырӟанъёслэсь кылъёссэ но дышетско, эктонъёсты но. Бен, та дырозь но бигер калыкысь дышетскисьёс ансамбле пыриськылӥзы. Кылсярысь, куинь бигер нылъёс школаез йылпумъятозязы но ветлӥзы. Ваньмызлы усто вал соос: кырӟаны но, эктыны но. Апай сямен эктыны но дышетскизы.

— Лилия Викторовна, тӥ асьтэос но школаын дышетскыкуды ик та ансамбле ветлӥллямды, али дыре но атайдылы ансамблен ужаны юрттӥськоды. Тӥляд улонады но «Инвожо» ансамбль нимысьтыз инты басьтэ, дыр.

— Ветлӥ. Со шулдыр аръёс вал. 2005-тӥ арын ми коллективенымы мынӥмы Казаньын ортчись «Ватан» конкурс-фестивале. Отын 1-тӥ инты басьтӥмы, милемлы грамота сётӥзы, телевизор но кузьмазы. Со бадӟым но данъяськымон вормонъёслэн нырысетӥез вал, дыр. Нырысь районын выступать карыса, собере Казаньын куинь нунал ӵоже улыса бертӥмы. Сыӵе выступать карыса ветлонъёсмы трос луизы, со аръёсты шумпотыса тодам вайисько. «Инвожо» улонам, зэмзэ но, нимысьтыз инты басьтэ. Удмуртлыклэн туннэез но вуоноез понна сюлмаськисько мон. Удмурт нылпи дышетскем бере удмурт школаын, со мед быгатоз кадь потэ апай сямен но, агай сямен но эктыны. Со аслэсьтыз лулчеберетсэ, сям-йылолъёссэ медаз вунэты, мед луоз солэн пушказ удмуртлыкез. Туала дыре адями удмурт ке но, ӟуч сямен вераське, со аслаз вордскем кылызлэсь возьдаське. Соин нылпиос мед тодысалзы, удмурт калыклэн кыӵе сям-йылолъёсыз вань, кыӵе со кырӟанъёсты кырӟа, кыӵе эктонъёсты эктэ. Калык пушкы потӥз ке но, нылпи мед быгатоз вераны, «мон но озьы быгатӥсько» шуыса. Школаысь кошкыкуз, нылпи данъяськыса мед кошкоз, удмурт сямен кырӟаны-эктыны дышетски шуыса. Анай-атайёс но мед данъяськысалзы нылпиосынызы. Соин но ми та ужын сюлэммес поныса тыршиськомы.

— Ансамбльлэн репертуареныз но тодматэ вал.

— Репертуарез ансамбльмылэн узыр. Рекрут, сюан кырӟанъёсты, семык шудонъёсты быдэстӥськомы. Калыклэн самой яратоно луись апай сямен, агай сямен эктонъёсыз сярысь ум вунэтӥське. Номеръёс сярысь верано ке, азьло нылпиос асьсэос ветло вал, «ойдо сое дышетскомы, тае каромы, сыӵе-сыӵе конкурсэ пыриськомы» шуыса. Али тросгес асьмеос ӵектӥськомы.

Эктонъёссэ но асьмеос дышетӥськомы — апай сямензэ но, агай сямензэ но. Милям хореографмы, нимысьтыз эктонъёсты дышетоно кружокъёсмы ӧвӧл бере, асьмелы дышетыны тупа. Ваньзэ валэктыса дышетыны тыршиськомы. Но дышетскон понна нылпилэн мылкыд каремез кулэ. Соос кулэ карыса дышетскемысь гинэ ваньмыз пӧрме. Соос доразы но репетировать каро, курадӟо, тыршо. Со шӧдске.

— Репетициосты нош кытын ортчо, Виктор Павлович?

—  Татын ик, школаын. Переменаын, урокъёс бере, куддыръя урокъёсысь но басьтыны тупа. Арняяз огпол кружок ортчытӥсько, отын репетировать кариськомы. Удмурт калыклэсь пӧртэм кырӟанъёссэ-эктонъёссэ дышетскиськомы, такмакъёсты. Конкурсъёсы пыриськон дыръя дышетӥсьёс но бадӟым юрттэт сёто, соос валало, дасяськыны кулэ шуыса.

— Нош костюмъёс кытысь шедьтӥськоды, Лилия Викторовна?

—  2017-тӥ арын ансамбльмы 200 сюрс манет тыр грант утӥз. Пӧртэм конкурсъёсы мыло-кыдо пыриськиськомы, призо интыос басьтӥськомы шуыса, Казаньын бадӟым сценаысен милемлы со грантэз сётӥзы. Со уксёен вуриськиз тямыс апай дэрем но айшет, агайёслы тямыс рубашка, озьы ик апайёслы но агайёслы быдэн тямыс пар пыдкутчан. Соин, кытын ке выступать карыны кулэ луыку, табере нылпиослы асьсэлы камзол, камали гинэ шедьтыны кулэ луэ. Камализы тросэзлэн нылъёслэн доразы вань, малы ке шуоно Антонида Васильевна, Мария Петровна дышетон дыръя технология урокъёсын котькуд ныл аслыз камали вуре вал. Соин та ласянь шуг-секытъёсмы ӧвӧл.

— Ансамбльлэн бадӟым но узыр историез. Та аръёс ӵоже тӥляд трос ёрос, республика масштабен грамотаосты вань.

— Кызьы верамы ини, 2005-тӥ арын «Ватан» республиканской конкурсын вормимы но телевизорен пусйиськимы, со ик конкурсын 2013-тӥ арын но нырысетӥ интыен пусйиськимы. 2017-тӥ арын ТР-ысь Президентлэсь костюмъёсты вурон понна 200 сюрс манет грантсэ утӥмы. 2019 арын трос йӧслыко воскресной но этнокультурной компонентэн школаосын дышетскисьёслэн фестивалязы Гран-при утӥмы, соку 29 сюрс манет сётӥзы. Та ваньмыз дышетскисьёслэн тыршемзылэн бервылыз. Утэм грантэн но нылпиосын кенешыса гинэ пайдаяськимы — ОБЖ кабинетэ проектор, колонка басьтӥмы. Та самой бадӟым вормонъёсмы гинэ.

— Вормонъёсы вутскон понна дышетскисьёслэн сяна, дышетӥсьёслэн коллективзылэн но, анай-атайёслэн но понэм кужымзы шӧдске, дыр.

— Шонер. Огъя луэмысь, валче ужамысь гинэ коллективмы туннэ нуналэ но улэ. Туж бадӟым тау ветеранъёслэн коллективзылы юрттэмзы, ӵектонъёсын вазиськемзы понна, соослэн тыршеменыз кылдэм ансамбль ук та. Дышетӥсьёсмылэн коллективзылы но. Соос котьку верам, косэм, куриськем кылэз быдэсто. Валало. Соос котьку юрттыны дась. Озьы ик ёросысь администрация но поддерживать каре. Кытчы ке мыноно луыку, автобус сёто. Анай-атайёслы нимысьтыз бадӟым тау, соос таӵе мыло-кыдо нылпиосты вордэмзы понна. Мар кулэ луэ, соос шедьто, лэсьто, басьто. Нылпиосты репетицие ваё, секыт кылын ваземзы но ӧвӧл. Нимысьтыз бадӟым тау асьсэлы нылпиослы. Соос сыӵе мыло-кыдоесь ӧй ке луысалзы, милям номыр но ӧй пӧрмысал. Котьку но тазьы ик тупаса ужаны мед кылдысал.  

— Виктор Павлович, Лилия Викторовна, вераськемды понна бадӟым тау. «Инвожолы» азьпалан но бадӟым вормонъёсы вутскыны сӥзисько!