Адями шоры гажаса учкид ке...

Но кызьы гинэ ӧз луы, валтӥсь показатель но валтӥсь уж — калыкез изданиослы гожтытон но соосты дыраз лыдӟисьёслы вуттон. Та ласянь Шор Кушкет почта ёзэс чебересь вормонъёсыныз шумпоттэ. «Татмедиа» акционерной обществоен ортчытэм конкурсын вормемзы но та сярысь вера: газетъёслы но журналъёслы кулэяськон, интернет газетъёс, сайтъёс вылынгес луон дыре, калыкез печатной изданиослы кызьы гожтытыны быгатӥллям? Вакчияк вераса, та вормонэ Шор Кушкетысь почта ёзэс кызьы вутскем? Секретсэ юаса ми вазиськимы кивалтӥсьсылы, Екатерина Петровалы.

Кивалтӥсь луыса но, кузё выллем кабинетын уг пукы, кык гуртын — Шор Кушкетын но Пор-Кутешын — ачиз ужа. Нышырозь Екатерина Леонидовна — кивалтӥсь, нош нышыр бере — огшоры почтальон. 

— Милям почта отделение ньыль гурт пыре — Шор Кушкет, Вуж Кушкет, Пор-Кутеш но Сала Кушкет гуртъёс. Та удмурт гуртъёс бере, тросэз адями «Азьлане» газетэз басьтэ. Озьы ик «Казанские ведомости», «Республика Татарстан» газетъёслы гожтӥськисьёс вань на. Почта нуллӥсьёсын Татьяна Клеймёноваен (Вуж Кушкет гуртын ужа) но Алёна Гавриловаен (Сала Кушкет гуртын ужа) куспамы тупаса, кенешыса, ог-огмылы юрттыса ужаськом. Нылъёс али почтаын гинэ но ӧвӧл, мукет интыосын ужаны вутско. Та конкурсын вормонмы коллективмылэн ужамезлы вылӥ дунъет сётэ. Вуоно ӝыны арын но показательёсмес вылӥ возьыны тыршомы, — шуыса валэктӥз со.

Екатерина Леонидовналэн та уж борды басьтӥськемезлы али одӥг ар но ӧвӧл. Ӧнерезъя Казаньын юристлы дышетскем ке но (тунсыко, почтальонъёслы дышетскон юртъёсын нимаз уг дышето вылэм, сыӵе ужын тыршон понна почтальонъёслэсь курсъёссэс ортчыса экзаменъёсты сётон гинэ тырме — Н.Ж.), ассэ почта удысын умоен возьматыны быгатӥз ини.

— Дышетскыкум ик Казаньын банкын ужай, оло, отын люкам но басьтэм опытэ почтаын ужаны кутскеме бере ик мыным юрттӥз, луоз, — валэктэ егит кивалтӥсь.

Та вакчи дыр ӵоже гинэ но со гуртоосыныз огъя кыл шедьтыны, ужзэ но пыр-поч валаны вутскем ини. Шор Кушкет почта ёзэсэн но кивалтэ, газет-журналъёсты вӧлмытыны но дыр шедьтэ, кулэ луиз ке, вузъёсты но вуттэ, тыронъёсты но басьтэ. Зэм, ужзы трос. Со сяна, почтаын ужан — со адямиен ужан. Но кивалтӥсь тае секытэн ӧвӧл, тунсыкоен лыдъя. Солэн верамезъя, адямиен ужаса, дырлэсь ортчемзэ шӧдытэк но кылиськод. Арлыдо поколение, тужгес но оген улӥсьёс, сое чидатэк витё вылэм.

— Ужаны кутскыку секытгес вал, малы ке шуоно калыкез уг тодӥськы, нош мыным соосын ужано ук. Соин но ваньзэсын нырысь тодматски, котькудӥзлы нимаз газет-журналъёс ӵектӥ. Нырысь ужаны кутскеме бере ӵошатылӥзы мон дырозь ужам кивалтӥсен, нош табере ваньмыз ас интыяз пуксиз, — пальпотэ Екатерина Леонидовна.

Нылъёс та вормон ӵош ужамлэн, тыршемлэн бырвылыз шуыса малпало. Соослэн верамзыя, куиньназы но куспазы тупаса, ог-огзылы котьку  юрттыса ужало. «Ноку но ужез ум люкиське, ог-огмылэсь куарамес кылзыса ужаськом», — шуо соос.

— Адями шоры гажаса учкид ке, тыныд но сыӵе мылкыд луоз. Гуртоос газет-журналъёслы мылзы потыса гожтӥсько. Милям кык юртлэн одӥгаз «Азьлане» лыктэ, — шуиз почтальон Татьяна Клеймёнова.

P.S. Та почта отделениын ужасьёс «Татмедиа» обществоен поттӥськись газет-журналъёслы гожтӥськонэз, кылем арен ӵошатыса, 6 процентлы йылэтӥз, «Азьлане» газетэз басьтӥсьёс но 135-е вуиллям.