Ӟаныысь О. Н. Исаев нимо шоръёзо школаысь удмурт кылъя но литературая дышетӥсь Римма Николаевна Петрова Татарстанысь Дышетонъя но тодосъёсъя министерстволэн гадьпусэныз пусйиськиз.
26-тӥ гудырикошконэ Казаньын Татарстанысь калыкъёслэн эшъяськон юртазы анай кылъя но литературая дышетӥсьёс понна «Йӧскалык дышетон: традиционной дунлыкъёс но туала технологиос» нимо элькун семинар ортчиз. Ужрадэ элькунысьтымы чуваш, удмурт, пор, мордва анай кылъёсъя дышетӥсьёс вуизы.
Семинарлэн ужаз Балтась ёросысь дышетӥсьёс но пыриськизы: Ципья шоръёзо школаысь удмурт кылъя но литературая дышетӥсь Ираида Анатольевна Чернова, пор кылъя но литературая дышетӥсь Алина Александровна Иванова но покчи классъёсты дышетӥсь Светлана Юрьевна Никитина; Покчи Лӧзя шоръёзо школаысь удмурт кылъя но литературая дышетӥсь Ольга Мироновна Пчельникова; Ӟаны шоръёзо школаысь удмурт кылъя но литературая дышетӥсь Римма Николаевна Петрова.
Ужрад пайдаё выль тодон-валанъёс сётэм сяна, шумпотон но данъяськон минутъёс но кузьмаз. Семинарын ас вормонъёсынызы лулпуш дунлыкъёсты утёнэ но юнматонэ, вашкала йӧскалык йылолъёсты улӟытонэ, озьы ик Россиысь калыкъёслэсь лулчеберет мерассэс азьланьтонэ бадӟым люкет пыртэм дышетӥсьёс данъямын вал. Шумпотымон, сӥлы каремъёс пӧлын асьме улосчимы но вал — Ӟаныысь О. Н. Исаев нимо шоръёзо школаысь удмурт кылъя но литературая дышетӥсь Римма Николаевна Петрова. Со Татарстанысь Дышетонъя но тодосъёсъя министерстволэн «За сохранение и развитие языков, культур и традиций» гадьпусэныз пусйиськиз. Сюлмысь ӟечкыласьком Римма Николаевнаез та вылӥ данъетэныз. Сӥзиськом юн тазалык но выль вормонъёс!
Нялтас вераса, Римма Николаевна 2002-тӥ арысен кутскыса, 24 ар ӵоже ини аслаз дышетскем школаяз — Ӟаны шоръёзо школаын — пиналъёслы удмурт кылъя но литературая тодон-валан сётэ, анай кылзылы гажан пыӵатэ.
— Вордскем кылме яратӥсько, гажасько, соин данъяськыса вераськисько. Дышетӥсь луон мылкыды но вордскем кылме яратэмысь кылдӥз. Школаын дышетскыкум, удмурт кылъя но литературая урокъёсты классэн кивалтӥсьмы, Захарова Вера Федотовна, нуэ вал. Туж тунсыко урокъёсмы ортчылӥзы, со милемлы удмурт кырӟанъёсты но трос дышетӥз. Иван Васильевич но Антонида Васильевна Ермаковъёс кивалтэм улсын концертъёс пуктыса ветлӥськомы вал, гуртъёсы потаськомы вал. Озьы ик Балтась, Ципья клубъёсын но выступать карылӥмы. Бадӟым классъёсын удмурт кылъя но литературая Николаева Мария Петровна дышетӥз. Со ик милемлы, классысьтымы нылъёслы, УдГУ-э мыныны ӵектӥз, удмурт кылъя но литературая дышетӥсьлы дышетскыны. Озьы ми, 5 кузя нылъёс, Ижевске мынӥмы. 3-ез дышетӥсь луимы, — тодаз вае гажано дышетӥсь.
Туспуктэмъёс: https://mon.tatarstan.ru/foto.htm/photoreport/11024459.htm но https://vk.ru/club202037785
Без социаль челтәрләрдә: ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен
Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.
Нет комментариев