Анай кылъя дышетӥсьёсты сӥлы каризы

Конференци улсын радъямын вал мастер-классъёс но выльдэм федеральной кун дышетон стандартъёсты улонэ пыӵатон но федеральной дышетон программаосты пыртон условиосын вордскем кылъёсты дышетонэн герӟаськем юанъёс пумысен выступлениос. 

Ужрадэ Балтась ёросысь дышетон организациосысь педагогъёс но пыриськизы. Покчи Лӧзя шоръёзо школаысь удмурт кылъя но литературая дышетӥсь Ольга Мироновна Пчельникова конференцилэн пленарной заседанияз «ТР-ысь Балтась ёросын вордскем (удмурт) кылэз но литератураез дышетонын шуг-секытъёс но перспективаос» темая вераськиз. Шор Кушкет шоръёзо школаысь удмурт кылъя дышетӥсь, директорлэн дышетон ужпумъёсъя воштӥсез Олеся Васильевна Яковлева «Удмурт йӧскалык лулчеберетэз но семья дунлыкъёсты утён вылысь огъя школа проектъёсты анай-атайёсын ӵош улонэ пыӵатон» темая ужамез сярысь мадиз. Лулпуш дунлыкъёсты утёнын но юнматонын, кемала йӧскалык сям-йылолъёсты улӟытонын но Россиысь калыкъёслэсь лулчеберет мерассэс азьланьтонын вормонъёсыз понна Ципья шоръёзо школаысь удмурт кылъя но литературая дышетӥсь Ираида Анатольевна Чернова Татарстан Республикаысь дышетонъя но наукая министерстволэн «Кылъёсты, лулчеберетэз, сям-йылолъёсты утён но азинтон понна» гадьпусэныз пусъемын; будӥсь поколениез дышетон но визьнодан сӧзнэтэ бадӟым люкет пыртэмез но кема аръёс ӵоже тыршыса ужамез понна Шор Кушкет шоръёзо школаысь покчи классъёсты дышетӥсь Галина Борисовна Евдокимова Дышетонъя но наукая министерстволэн Данъян грамотаеныз пусъемын. Вордскем кылъёсъя улоскуспо олимпиадаосы вормисьёсты но призёръёсты дасямзы понна Покчи Лӧзя шоръёзо школаысь удмурт кылъя но литературая дышетӥсь Ольга Мироновна Пчельникова, Ципья шоръёзо школаысь пор кылъя но литературая дышетӥсь Алина Александровна Иванова Дышетонъя но наукая министерстволэн Таукарон гожтэтэныз пусъемын.

Ӟечкыласьком гажано дышетӥсьёсмес азинсконъёсынызы!, — шумпотон ивор вуттӥз ёросысь йӧскалык дышетонъя методист Фидания Сабирова.