«Анаймы – улонысь самой бадӟым шумпотонмы»

8-тӥ шуркынмонэ бадӟым юбилейзэ пусйиз Ципья черкогуртысь гажамон кышномурт - Денисова Екатерина Егоровна. Солы 90 арес тырмиз.

Матысь адямиосыз – нылъёсыз но пиез, кенэз – та нуналэ юбиляр доры люкаськизы, озьы ик бадӟым но дано лыдпусэныз песянаез ӟечкыланы вуизы ёросысь гажано куноос: Балтась районлэн главаезлэн воштӥсез Наиль Сабирзянов, социальной дурбасьтонъя ёзэтлэн кивалтӥсез Алсу Гатиятуллина. Интыысь кивалтӥсьёс но – Ципья гурт поселенилэн главаез Азат Нотфуллин, «Труд» обществолэн кивалтӥсез Рашид Хадиев – палэнын ӧз кыле. Лыктэм куноос, Екатерина Егоровнаез сюлмысьтызы ӟечкыласа, асьсэлэсь шуныт но чебер сӥзёнъёссэс веразы, синпель кузьымъёссэс кузьмазы.

Екатерина Егоровна Денисова (Чумакова) 1932-тӥ арын Киров улосысь Рожки ёросысь Семёновка гуртын (али Марий Эл республикалэн Мари-Турек ёросаз пыре) огшоры куанер семьяын вордскем. Огъёзоосыз кадь ик секыт улон сюрес ортчем Екатерина Егоровналы 90 арес сётыны но уг луы (син гинэ медаз усьы). Удмурт, ӟуч, бигер кылъёсын туж чылкыт вераське, туж умой ӧвӧл ке но, пельыз кылэ, синъёсыз адӟо. Капчи мылкыдо, паймымон усто вераськись но со. Улонлэсь трос курытсэ веръям, шуг-секытъёсты каньыл гинэ вормыса улэм кышномурт. Пичиысен анай-атайтэк кылем со (атаез жугиськон кутскытозь ик кулэм, нош анаез – жугиськон мыныку), покчи сузэрзэ но аслыз будэтоно луэм. Сютэм улон сое вазь ик колхозэ ужаны вуттэм. Улонэз солэн Ципья гуртэ Григорий нимо воргоронлы картлы кошкемез бере гинэ капчиям.

- Гриша туж умой кузпал вал, солэн кулэмезлы кызь арлэсь тросгес ини. Ноку ӧз курла, куанер сирота луэме сярысь огпол но тодам ӧз уськыты. Куать нылпиосмы вордскизы: Галина, Татьяна, Любовь, Зоя, Надежда, Валерий. Туннэ нуналэ мон узыр анай гинэ ӧвӧл, узыр песяй но, ӵужанай но: 12 внукъёсы, 26 правнукъёсы вань, - данъяськыса вераз песянай.

Гумырез ӵоже колхозын ужам Екатерина Егоровна. Валъёсты, парсьёсты, ошакъёсты сюдэм. 1982-тӥ арын дано шутэтсконэ потэм. Арлыдо кышномуртлэн «Ударник коммунистического труда» званиез (1978), «Ветеран труда» медалез (1982), «Быдӟым Отечественной ожлэн ветеранэз» удостоверениез (2010), «Мать-героиня» медалез вань.

- Анаймы – улонысь самой бадӟым шумпотонмы. Со чидась, тыршись, шуг-секытъёслы сётскытэк улонзэ азинтэм кышномурт. Ми соин туж данъяськиськомы. Анай-атаймы милемлы визьнод сётӥзы, будэтӥзы, соослы со понна туж бадӟым тау. Анаймес таӵе бадзым праздникеныз сюлмысь ӟечкыласа, солы али кема аръёс ӵоже сӧл-таза луыны сӥзиськомы. Куке анай вань, вордскем юртэ бертыны но кыӵе умой, - шуизы юбилярлэн нылпиосыз.

Ачиз Екатерина Егоровна но верано кылъёссэ ӧз жаля – котькуд сое ӟечкылам адямиослы тау каронъёссэ вуттӥз. Ёросысь вуэм куноослэн «Кылдэм ке, 95 аресъем юбилеяды вуомы али» шуэм кылъёссылы но таӵе ответ сётӥз: «Та верамдэс тодам возё, вить арскын пумиськомы». Мед гинэ кылдоз!