«Анай» фильмез учкыны ӵектӥсько

Кӧня ке адями юаса гожтӥз: «Наташа, кытчы ышид? Материалъёсыд ӧвӧл...». Мазэ ватонэз, сыӵе сообщениос вуыку, туж шумпотӥ — озьы бере, материалъёсме лыдӟо, витё. Но, зэмзэ ке верано, берло дыръёсы гожъяськыны секытгес йӧтӥз. Пандемиен сэрен нокытчы интервью басьтыны ветлыны ӧз луы шуыны кулэ, нош адямиен телефон пыр гинэ вераськыса туж ик ӟеч, полноценной статья пӧрмытыны уг луы (но пусйыны кулэ, куддыръя озьы ке но адямиосын вераськыса гожъяськыны тупаз). Соин таяз учыре ӟучъёс верамъя «умойзэ пайдаёеныз огазеяны» малпай. Нокытчы мынытэк, нокинэн вераськытэк, асме огпол но утьымтэ журналистикалэн жанраз — рецензиын — утёно кариськи.

Куинь ар талэсь азьло газетэ Денис Корниловен интервьюе потэм вал. Соку туспуктонэн но фильмъёс кылдытонэн тунсыкъяськись егит пиосмуртэн вераськимы удмурт фильмъёсты уськытонлэн проблемаосыз, тырмымтэосыз сярысь; фильмъёсаз но мультфильмъёсаз ӝутскись проблемаосыз сярысь; «Анай» фильмезлэн удалтэмез сярысь. Рецензие но ӵапак Денис Корниловлэн «Анай» фильмезлы луоз.

Кызь сизьым минут ӵоже кыстӥськись вакчи фильм уськытэмын Удмуртиысь Кияса ёросысь Уддяди гуртын. Вакчияк вераса, фильмлэн сюжетэз таӵе: пересь Лукерьяпай огназ улэ. Городысь куное бертоно пизэ пыжиськыса вите, нош пиез уг берты, Лукерьяпай огназ кыле. Фильмысь рольёсты шудӥзы Уддядиысь Лукерьяпай но Ӝакыапай (жаляса верано, интернет источникъёсын но, фильмлэн заставкаяз но та героиняослэн фамилиоссы возьматымтэ. Мон малпамъя, та пичияк «минусэз»). Озьы ик Удмурт кун университетысь дышетӥсь, профессор Александр Вахрушев но фильмын роль быдэстэ. Одӥгез но соос пӧлысь профессиональной актёр ӧвӧл. Вылаз ик верано кылъёссы но соослэн луымтэ: Денис Корнилов сценарийзэ ачиз гожтэм ке, геройёслы мар сярысь вераськыны кулэ луэмзэ гинэ валэктэм. Тае лыдэ басьтӥд ке, котькуд герой туж но туж ӟеч аслэсьтыз рользэ быдэстэм шуыны луэ. Но нимысьтыз висъяме потэ валтӥсь ролез шудӥсь Лукерьяпаез. Солэн камералэсь кышкатэк быгатыса шудэмез сокем синмаськытӥз, сокем паймытӥз. Котькуд верам кылыз, котькуд выросэз малпаса быдэстэмын кадь потӥз. Пиез уз берты шуыса тодэмез бере, ӝӧк вылаз кыллись кампет кагазэз кияз кырмыса, тани-тани бамъёсызъя вияны дась синкылиоссэ ватыса укно пала учкыса шыпыт пукем моментэз фильмлэн самой лэчыт (кульминационной) дырыз луиз, дыр. Зэмзэ ке верано, фильмлы отзывъёсты гинэ лыдӟыса, ӧй но оскы, валтӥсь героиня сыӵе усто но сыӵе быгатыса шудэм, дыр, шуыса. Нош куке ачим кӧня ке пол та фильмез учки, куке учкемелы быдэ синкылиосме кутыны ӧй быгаты, валай — Лукерьяпай зэмзэ но бадӟым букваен артист. Озьы ик нимысьтыз висъяны кулэ солэсь сюлме йӧтымон кырӟаны быгатэмзэ но. Лукерьяпайлэн сокем роле «пырыса» шудыны быгатэмезлэн валэктонэз но вань кадь: со зэмзэ но огназ улэ, нылпиосыз но ӧвӧл вылэм (та сярысь Денис Корнилов куинь ар талэсь азьло интервью сётыкуз тодаз вайылӥз), соин улонысь шуг-секытъёсты адӟон, соосты чидан, мӧзмон — солы туж матын но валамон мылкыдъёс. Второстепенной геройёсыз но рольёссэс умой быдэстӥзы. Но Александр Вахрушевлэн вераськемез Лукерьяпайлэн но Ӝакыапайлэн вераськемъёсызлэсь ӧжыт висъяськиз — шӧдске, со Киясаын уг улы, соос сямен уг вераськы. Нош огъя шудэмез сярысь верано ке, туж быгатыса рользэ быдэстӥз. Камералэсь кышканэз ӧвӧл, куараеныз умой «ужаны» быгатэ (куддыръя калленгес вераське, куддыръя — золгес). Котькуд киыныз, йырыныз выремзэ, изьызэ куштэмзэ-дӥсямзэ но малпаса быдэстэ. Куинетӥ, берпуметӥ героиня Ӝакыапай фильмын кӧня ке секунд ӵоже гинэ возьматэмын ке но, ассэ быгатӥсь, кышкасьтэм шудӥсен (актрисаен) возьматӥз.

Табере дугдылом операторлэн но монтажёрлэн ужамез вылэ. Уськытэм фильмлэсь чебер яке кельшонтэм луэмзэ (съёмка ласянь) валан понна, оператор луыны кулэ ӧвӧл. Татын котькуд учкись валаны быгатэ, кельше-а солы операторлэн ужез, уг-а. Мыным кельшиз. Бен, вань кӧня ке кельшымтэ моментъёсыз (кылсярысь, куд-ог интыын геройёслэн йыръёссы «вандӥськемын»), но огъя верано ке, оператор ужзэ валаса быдэстэм: бадӟым (крупной), шоро-куспо (средний), огъя (общий) планъёс ог-огзэс фильм мынэмъя вошъяло. Туж умой. Юртъерез но, интеръерез но малпаса быръемын. Вуж някырскем корка, корка шорын бадӟым гур, борддорын бадӟым куараен тиккетӥсь вуж час, сыӵе ик вуж валес... Та ваньмыз сюлэмме бугыртӥз, синкылиме поттӥз — угось таӵе условиосын туж трос пересьёс огинэн уло ук...

Туж кельшиз тани мар: фильмлэн сюжетаз кольцевой композиция кутӥське (куке фильм кыӵе сценаен кутске, сыӵе сценаен ик йылпумъяське). Та учыре сыӵе композиция туж интыяз вал. Огназ будӥсь някырскем шундыберган — со оген улонлэн тодметэз (символэз), со Лукерьяпай ачиз. Кызьы кутсконаз огназ вал, озьы огназ ик кылиз пумаз но. «Дукес» фолк-группалэн кырӟанэз но туж интыяз луиз.

Паймоно кадь, кызь сизьым минут ӵоже гинэ кыстӥськись фильмын макем актуальной луись моральной проблемаос ӝутэмын: пиналъёслэн гуртысь кошкон но анай-атайёссы доры шер бертылон; пересьмон дауре огинэн улон (одинокая старость). Денис Корнилов та проблемаосты аслаз фильмаз туж умой возьматыны быгатэм. Бен, фильм 2016-тӥ арын уськытэмын ке но ини, солэн пуштросэз асдыръемлыксэ (актуальностьсэ) ноку но уз ышты. Соин та фильмез коть куинь ар талэсь азьло, коть туннэ учкы — со тунсыко но сюлэмез бугыртӥсь фильм луоз. Оскисько, фильмын ӝутэм проблемаос учкисьёс доры но вуизы шуыса. Фильмлы лэсьтэмын вал субтитръёс но, та туж бадӟым «плюс». Озьы ик «Анай» фильмез возьматӥзы ини Эстониын, Финляндиын, Латвиын, Испаниын, Франциын. Нош валтӥсь героиня, Лукерьяпай, 2016-тӥ арын «Ижевский кинофестиваль» конкурсын Гран-приен но «За потрясающий образ бабушки» дипломен пусйиськиз. Оло, тӥ пӧлысь тросэз та фильмез учкизы но дыр, ини. Шедёзы сыӵеос но, кин учкымтэ. Сыӵеослы «Анай» фильмен одно ик тодматскыны ӵектӥсько. Та фильмез капчиен шедьтыны луэ YouTube видеохостингысь (нялтас вераса, та фильмез «Ютубын» 15 сюрслэсь тросгес пол учкиллям).

P.S. Тодӥськомы: удмурт фильмъёс туннэ нуналэ туж ик трос ӧвӧл. Но соос вань. Соос сокем тунсыкоесь, сокем мур пуштросоесь. Учкиды ке, мылкыдтэм кыльыны уд быгатэ. Таӵе форматэн гожъямез тунсыкоен шедьтӥды ке, азьпалан удмурт фильмъёслы гинэ ӧвӧл, книгаослы но рецензиос гожъяны луоз.