Ӟаны гуртысь лулчеберетъя юртын егитъёс люкаськизы (фото)

«Гуртэ — данъяськонэ» («Авылым — горурлыгым») вожвылъяськон егитъёслы вашкала калык сям-йылолъёсты утён но азинтон, калык узырлыкез, вашкалаослэсь историзэс, вордскем кылэз но лулчеберетэз гажан мылкыд пыӵатон вылысь ялэмын вал.

Котькуд гурт аслаз узыр историеныз, ӵыдонтэм чебер инкуазеныз, адямиосыныз ушъяськыны быгатэ. Ёросамы 77 гуртъёс пӧлысь котькудӥз ёросмылы, элькунлы дано адямиосты кузьмаз. Соос улонлэн котькуд удысаз пайда пырто но выльдӥськонъёс ваё. Туннэ нуналлы калык историез но сям-йылолъёсты утён ужпум элькунын но ёросын бадӟым инты басьтэ, соин но вожвылъяськонлэн кулэлыкез тросэзлы валамон. Вордскем интыез гажан адямиез эшшо но сӥлы каре. Вордскем музъем но ас черодаз адямилы туж бадӟым луонлыкъёс сётэ.

Шумот ӝытэ Ӟаны, Вуж Кушкет, Починка, Сырья, Ципья гуртъёсысь нылъёс но пиос асьсэ гуртсылэн улонэнызы тодматӥзы, туала воштӥськонъёссэс возьматӥзы но Балтась ёрос сярысь тодон-валанъёссэс эскеризы. 
Котькуд командаын куать адями луиз, соос — гуртъёсты, гурт улонэз, ёросэз азинтӥсь адямиос.

Егитъёс азе азьвыл ик туж кылкутымон уж пуктӥськиз: гуртсы сярысь 2 минутъем видеоролик но творческой номер дасян. Та люкетъёсызлы рос-прос дасяськыны луонлык вал ке, куинетӥ люкетэз копак тодмотэм луиз: ёрослэн историез но улонэз сярысь юанъёслы валэктон сётон.

Вожвылъяськонлэн 1-тӥ люкетаз вань командаос асьсэды усто возьматыны быгатӥзы. Тыршемзы юнме ӧй вал: учкисьёслы тунсыко луиз котькуд гуртлэн историеныз но туала улонэныз тодматскыны. Лыктэмъёс учкисьёсты гуртын «пӧзись» улонэн тодматӥзы, дано адямиоссэс пуйизы но азьланезлы осконъёссэс шараязы.

Кыкетӥ люкет эшшо но тунсыкогес луиз: командаослэн дасям творческой номеръёссы нокинэ но мылкыдтэм ӧз кельтэ. Ӟаны гуртысь 3 нылъёс но 3 пиос туала удмурт кырӟанъёсты попурри амалэн быдэстӥзы. Аспӧртэмлыко дӥськутъёсынызы паймытӥзы но синмаськытӥзы. Кӧня ке крезьгурен кырӟамзы пожаськиз ке но, асьсэды умой возьматӥзы, ӧз кышкалэ, пумозяз быдэстӥзы. Ципья гуртысь егитъёс быдэстӥзы 3 кылын (бигер, удмурт, ӟуч) кырӟан. Йӧскалыко луись гуртэз яркыт возьматӥзы но гуртлэсь «колоритсэ» шараязы. Паймытӥзы Починка гуртысь огазеяськем пиослэн командазы. Пиос сцена вылын кырӟан быдэстӥзы. Пумит пуктӥськиз Вуж Кушкет гуртысь нылъёс, соос яркыт удмурт «сайкатӥсь» эктонэн шумпоттӥзы. Сырья гуртысь егитъёс ненег вальс эктӥзы, но кунгожсьӧр крезьгур интые удмуртсэ ке бырйысалзы, эшшо но умой луысал, дыр, зэмос удмурт гуртлэсь «шӧмзэ» быдэсэн шараясалзы. 

Визь сынан люкетаз егитъёслэсь тодон-валанъёссэс эскеризы. Татын котькуд командалы 3 юанлы валэктон сётоно луиз. Йырвизьзэс сыназы котькуд удысын: литература, политика, спорт, история, дауркыл (легенда), музейёс. 

Нялтас вераса, «Гуртэ — данъяськонэ» («Авылым — горурлыгым») вожвылъяськон 3 шуркынмонэ кутскиз. Огъя, вить зона радъямын вал. Ӟаны гуртын ортчиз ньылетӥез. Шумпотымон, та зонаысь витез ик командаос рос-прос дасяськеменызы, тыршеменызы вожвылъяськонлэн йылпумъян этапаз потӥзы. Ӟечкыласьком! Азьланяз но калык лулчеберетэз, кылэз данъяса, бадӟымесь вормонъёсы вутскыны сӥзиськом. Табере соослы Балтась ёросысь лулчеберетъя юртын тулыспалэ (феврале) ортчись Гала-концертын кужымзэс эскероно луоз!