Арлыдоослы бадӟым кузьым но шумпотон (фото)

1 коньывуонэ Арлыдоослэн нуналзы пусйиськиз. Инкуазь но, аслэсьтыз шунытсэ, чебер сӥзьыл буёлъёссэ кузьмаса, арлыдоослы шудо шутэтскон нуналъёс сётӥз. Арлыдоосты сӥлы карыса, данъяса, котькуд шуымон гуртын нимысьтыз ужрадъёс ортчизы, «зарни» адямиосты праздник нуналазы ӟечкылазы но кулэ луэмзэс возьматӥзы.

Праздникез ортчытон дыр но юнме быръемын ӧвӧл, вылды. Адямиослэн верамзыя, пересьмон — со улонлэн сӥзьылэз. Соин ик арлыдоослы но нимысьтыз нунал пусъёно кариськизы — сӥзьыллэн самой зарни вакытаз. Праздниклэн валтӥсь ужпумез — дунне вылын улӥсь калыклэсь арлыдоослэн шуг-секытъёссылы нимысьтыз саклык висъян. 

Ӟаны гуртын выль лулчеберетъя юртын арлыдоосты 29 куарусёнэ люказы. Ӟаны шоръёзо школаын дышетскисьёсын валче пуштросо концертной программа, сценкаос, мунё театр пуктэмын вал. Выльдэм сцена вылын асьсэлэсь быгатонлыкъёссэс возьматӥсьёсты шуныт кичабонъёсын пумитазы. Трос калык люкаськиз. Арлыдоослэсь мылкыдзэс школаысь асмылкыдчиосын (волонтёръёсын) дасям сяська керттэтъёс ӝутӥзы.