Арлыдоослы бадӟым кузьым но шумпотон (фото)

1 коньывуонэ Арлыдоослэн нуналзы пусйиськиз. Инкуазь но, аслэсьтыз шунытсэ, чебер сӥзьыл буёлъёссэ кузьмаса, арлыдоослы шудо шутэтскон нуналъёс сётӥз. Арлыдоосты сӥлы карыса, данъяса, котькуд шуымон гуртын нимысьтыз ужрадъёс ортчизы, «зарни» адямиосты праздник нуналазы ӟечкылазы но кулэ луэмзэс возьматӥзы.

Праздникез ортчытон дыр но юнме быръемын ӧвӧл, вылды. Адямиослэн верамзыя, пересьмон — со улонлэн сӥзьылэз. Соин ик арлыдоослы но нимысьтыз нунал пусъёно кариськизы — сӥзьыллэн самой зарни вакытаз. Праздниклэн валтӥсь ужпумез — дунне вылын улӥсь калыклэсь арлыдоослэн шуг-секытъёссылы нимысьтыз саклык висъян. 

Зэмзэ но, туала дыре песяй-бабайёслэн кулэ луэмзы эшшо но юнгес шӧдӥське. Ялан дыртӥсь но бергась дуннеын соослэн юрттэмзы улсын егитъёс ужзылы, тунсыкъёссылы дыр висъяны быгато, песянай-песятайёс нунокъёсты утёнын-вордонын но воштонтэм адямиос луо угось. Соин ик дано шутэтсконэ потэмъёс гань кылльыны уг дырто: яке ужало, яке йырынызы семьязы пушкы выё.

Ёросамы сяме пыремъя, арлыдоослэн нуналазы гурт возёсъёслэн кивалтэтсы сиён-юонъёсын саламъёс кузьма. Озьы ик лулчеберетъя юртъёсын узыр ӝӧкъёс дасяло, чай юон ортчыто. Огдышем сямен ортчись ужрадъёс туннэ нуналэ пӧртэмгес но луо. Туэ кызьы меда гуртъёсамы та праздникез ортчытӥзы?

Вуж Кушкет гурт но Янгул гуртъёс одӥг поселение пыро, соин ик ужъёс но удмуртлы яке бигерлы уг люкисько. Кык гуртъёсысь улӥсьёс тыршыса гуртъёсты ӝутон но юнматон бордын тыршо. Возёсын ужасьёс азьветлӥсьёсы пото, кӧбератэк эркын бигер кылын верасько, пӧртэм ужрадъёсы но пырисько.

2021 арын гудырикошкон толэзе Янгул гуртысь ужбергатӥсь Ильдар Рафиков Вуж Кушкет гуртын магазин усьтӥз вал. Соин гуртысь улонэз улӟытӥз но выль шокан пыртӥз. Ужаны кутскиз Тамара Соловьёва. (Магазинлэн азьло нимыз но «Тамара» вал). Ачиз Сизнер гуртын вордскемын, но матысь гуртэн бызем интызэ лыдъя. Вузкарись калыкен огкыл шедьтыны быгатэ. Солэн ужзэ валаса, адямиосты гажаса, пальышаса ужамез котькинлы кельше. Нош солэсь магазин котырысьтыз сяськаосты адӟид ке, паймод! Татысен ик адӟиське ини адямилэн ужезлы вань сюлмыныз сётӥськемез. Соин но кузёез сое гажа, веранзэ санэ басьтэ. 

Кылем шумотэ, 30 куарусёнэ, Арлыдоослэн нуналзылы сӥзьыса, «Авокадо» магазинлэн кузёез Ильдар Рафиков гуртысь дано шутэтсконэ потэмъёсты кунояз. Магазин азьын зэмзэ но шулдыр, капчи мылкыдо адямиос люкаськизы. Татын ик ӝӧк пуктэмын вал, пуксён интыос радъямын, огпалаз табань пыжизы, чай пӧзьтӥзы. 

Троссэ адӟем адями понна нош мар кулэ на? Ваньмыз радъямын, шутэтскы гинэ. Соин но тэк пукыны арлыдоос уг ни быгато, ялан выроно. Праздникез мызган гуръёсыныз Алексей Павлов шулдыртӥз. Азьло ик урам кузя ӝӧксьӧр кырӟанъёс кылӥськизы, собере ини вань калык эктыны люкаськиз. Арлыдоос эктонын но асьсэды туж усто возьмато, егитъёслэсь бере уг кылё. 

Ильдар Габдулбаровичлы ужаз юртто кузпалэз — Айзирак Расиловна но Инсаф пиез, мукет 3 пиосыз Айдар, Руслан, Ильсаф Казаньын ужало. Семьяязы валаса, юрттыса гинэ зэмос бадӟымесь вормонъёс луыны быгато. Ваньбуро улон шудэз возьматон гинэ ӧвӧл со, тросэз адямилэн ӟечлыкез но небыт сямо луэмезлы синмасько. Сыӵе ик Рафиковъёслэн семьязы но — гурт калык бордын улӥсь, тыршись но адямилэсь ужзэ гажась.

Вань гурт калыклэн нимыныз бадӟым тау каронме вераме потэ Ильдар Габдулбаровичлы но солэн юрттӥсьёсызлы. Сыӵе бадӟым сюлэмо адямиос луыку, оскон вань на чылкыт но югыт малпанъёсын улӥсь адямиос вань шуыса.

Озьы ик 4 коньывуонэ нимысьтыз арлыдоосты люказы на гурт клубе, татын гуртысь покчиёзо школаысь дышетскисьёс песяй-бабайёссы понна концертной программа пуктӥзы.