Ас дорам — ас кылыным

«Ватаным Татарстан» газетлэн Татарстан Республикаысь Раис бордын ужась Бигер кылэз но Татарстан Республикаын улӥсь калыкъёслэсь вордскем кылъёссэс утён, азинтон ужпумъёсъя комиссилэн юрттэменыз улонэ пыӵам «Ас дорам — ас кылыным» шуыса нимам нимысьтыз проектэз Татарстанын улӥсь пӧртэм калыкъёслэн улэменызы-вылэменызы, калык сям-йылолъёсынызы тодматэ, одӥг семьялэн пример вылаз вордскем кылэз кызьы утьыны луэ шуэм юанлы валэктон утча.

Оскон

Балтась ёросысь Сала Кушкет гуртын улӥсь Камаевъёс вордскем кылэз утёнын крезьгур но, сям-йылолъёс но, калык праздникъёс но — ваньмыз кулэ луись инты басьтэ шуыса малпало. Туннэ соослэн та ласянь сюлэмзы каньыл, нош вуонолы осконзы вань меда?

Кыллэн кӧкыез — семья

Камаевъёслэн бадӟым семьязы милемыз улыно-вылыно вӧлмыт корказылэн ӧс выжыязы ик нянен, сылалэн но кырӟанъёсын пумитаз. Юртазы куинь поколение улэ: семьялэн тӧроез Виктор но кузё кышно Алевтина, Михаил пизы но Ирина кензы, Антон но Андрей внукъёссы. Кӧня ке ар талэсь азьло Викторлэн атаез кулытозь, одӥг липет улын ньыль поколение улӥллям. Камаевъёслэн нылзы Лилия Чирикова но семьяеныз та гуртын ик улэ. Милемын пумиськонэ со но Кира но Лера нылъёсыныз лыктэм вал.

— Малы ке но али егитъёс арлыдо поколениен ӵош одӥг юртын улоно уг каро, — шуэ Виктор Камаев. — Нош ми талэсь умой палъёссэ гинэ адӟиськомы. Нырысь ик, ог-огмылы юрттӥськомы, ӵыжы-выжы нюжаосмы юнгес карисько. Анай-атай ужын луон дыръя, котьку нылпиосты учкись мурт вань. Со сяна, дорысь вань бадӟым ужъёсты ӵошен лэсьтӥськомы. Кыкетӥез, внукъёс кылэз тодыса будо, малы ке шуоно дорамы ми анай кылын гинэ вераськиськом. Та ми понна тужгес но дуно.

Кыл сярысь вераськон потэм бере, Ирина кензы но ас малпанзэ вераз.

— Мон тае ас бордысеным но вераны быгатӥсько. Мон Марий Элын вордски но будӥ. Та семьяе кен луыса лыктыкум, удмурт сямен воксё уг вераськиськы вал, малы ке шуоно ми палан кыл утиськымтэ шуыны луэ. Кылме мон та семьяын волятӥ, табере вордскем кылыным гинэ вераськисько, — шуиз со. Оло, соин но, дыр, семья главалэн, Виктор Камаевлэн, та ласянь сюлмыз каньыл.

— Мон выжыямы анай кыл поколениысь поколение выжоз шуыса оскисько, – вера Виктор Павлович. — Ваньмыз но семьяысь потэ. Семья куспын удмурт кылын вераськон ке ӧз луы, кыл быроз. Городэ кошкем егитъёс асьсэлы валтӥсь кыл карыса ӟучез ке быръё, сюлмаськонлы муг вань, малы ке шуоно сыӵе семьяын будэм нылпиос кылзэс пумен вунэто. Мон сямен, кыл уногес но юнгес гуртъёсын возиське. Сала Кушкетын удмурт луыса кылён понна луонлыкъёс али трос. Малы ке шуоно 200-лэсь трос адямиез огазеясь гуртын ваньмы но удмуртэн гинэ вераськиськом.

Кылэз семьяын гинэ утьыны луэ шуэм малпанэн шор поколение пырись Михаил но соглаш.

— Пичи нылпилэн вераськонэз анай кылысен кутске ук. Мыным пиосы, яратыса, «атай» шуыса вазьыло. Али нылпи садысен ик тросэз пиналъёс ӟучомыны кутско. Школаын но та югдур азьланьтӥське. Озьыен, кылэз утён понна валтӥсь инты семья луэ, — шуэ со.

Виктор Камаевлэн педагогической стажез — 38 ар. Со кема аръёс ӵоже нылпиосты удмурт кылъя но литературая дышетэм. Али но школаын ужа, ОБЖ, музыка но физкультура урокъёсты нуэ. Лилия нылзы но атаезлэсь сюрессэ быръем.

— Милям школаямы, котырысь гуртъёсын кыл быроз шуыса, кышкытлык ӧвӧл, — ас малпанъёссэ вера Лилия Чирикова. — Нош тани ми дорысь ӧжытак кыдёкынгес интыяськем удмурт гуртъёсын уногес ӟуч сямен верасько. Милям школаямы нылпиос 6 удмурт (эшшо 3 бигер — ред.) гуртъёсысь лыктыса дышетско. Ваньзы соос удмуртэн верасько али, малы ке шуоно семьяосын анай-атайёс нылпиосынызы вордскем кылын верасько. Асьмелы ми асьмеос гинэ юрттыны быгатӥськом, палэнысен юрттэт витёнэз ӧвӧл. Кылэз утён — семья, анай-атай бордын. Адямиос янгышаса анай кылзылэсь кызьы гинэ палэнтӥськыны ӧз тырше, вордскем кыллэсь пегӟыны уг луы. Ми удмурт луыса вордскиськомы но удмурт луыса улыны кулэ. Кызьы гинэ ӧз луы, йырамы малпан нырысь анай кылын кылдэ, собере гинэ мукет кылын луыны быгатэ.

Ми синйылтӥмы, бадӟымъёс луымтэ дыръя но нылпиос куспазы вордскем кылынызы гинэ верасько шуыса. Но, кызьы вера нылъёслэн анайзы Лилия, ӟуч кылэ но пиналъёс ӵем, пе, выжо.

— Пиос ог-огенызы удмурт сямен верасько али. Нош тани мынам нылъёсы Лера но Кира трос дырзэс телефонын ортчыто бере, вераськоназы ӟуч кылъёс уно, — шуэ со. — Кузпалэным тае кызьы ке но дугдытыны тыршиськом. «Ми ӟучен ум валаське, ойдо, удмурт сямен вераськомы али, — шуиськом. Кузпалэным удмуртэн гинэ вераськисько. Валамон, ӟуч кыл но кулэ, но вордскем кылзэс пиналъёс медаз вунэтэ вал.

Кырӟанъёс-крезьгуръёс

Мар карыны бен кулэ со понна? Та юанэз Виктор Камаев аслыз ачиз кӧня ке ар талэсь азьло сётэм но туж валамон малпанэ вуэм. Солэн верамезъя, кыллы тунсыкъяськон, гажан улӟытон понна одӥгез амал — внукъёсты кырӟанэ кыскон. Семьялэн главаез мызганэн шудэ, кырӟа. Нылпиослы, внукъёслы но атайзылэсь но песятайзылэсь быгатонлык выжем. Ньылез но внукъёссы кырӟало, кылбур верало, праздник ужрадъёсты нуо, республикаысь туж трос конкурсъёсын но вормылӥллям.

— Мынам анай-атае чебер кырӟало вал. Михаил пие но кырӟаны яратэ, мон кадь ик, мызганэн шудэ. Егитъёс пӧлын гуртын мызганэн шудӥсьёс ӧвӧл шуыны луэ, соин пиос армие кошкыку котьку сое ӧтё. Воргоронъёс люкаськыса кырӟаса но эктыса урам кузя ортчо.

Та семьяын кырӟанъёс но эктонъёс ӵем куно луо шуыса, ми асьмеос но адӟыны быгатӥмы. Одӥг кыл вераса тырме, нылпиос соку ик бадӟымъёс борды итӥсько, кырӟаса но лэзё, тыпыр-тыпыр карыса экто но. Антон внукез семья, вордскем кыл сярысь кырӟакуз, песятаез потэм синвуоссэ но ватыны ӧз быгаты.

— Ми дорын кырӟан-крезьгур уг чалмылы, — шуэ Виктор Камаев, сюлмысь пальпотыса. – Мынам атае но, анае но кырӟаллям, внукъёсмес но дышетӥськом. Куноос ке лыктӥзы, одно ик крезьгур чузъяське. Кырӟанъёсты пуштроссы ласянь нимысьтыз бырйиськом, но, валамон, туалаоссэ но кырӟаськом. Дорын ас поннамы гинэ ке но луимы, киям мызган басьтӥсько. Собере, мон ведь школаын фольклор кружок нуисько, ансамблен кивалтӥсько. Дышетскисьёсты удмурт кырӟанъёслы, эктонъёслы, сям-йылолъёслы, такмакъёслы дышетӥськом.

Дуно синпель

Камаевъёслэн семьязы выжыысь-выжые сётӥськись кузьымъёсты дуно синпелетэн лыдъя. Кылсярысь, Ирина кензылэн кияз понэм поскесэз песянаезлэсь кылем синпель луэменыз дуно. Озьы ик семьялэн кузё кышноез, Алевтина апай, али ке но песянаезлэсь кылем дэремзэ уте. Дэрем вылэ дӥсяно камзолэн, айшетэн калык дӥсь семьяысь котькуд кышномуртлэн вань. Валамон, берло аръёсы соос сое туж шер, нимаз учыръёсы гинэ дӥсяло. Кылсярысь, эмеспи паласен егит нылъёс, нылкышноос ныл вайыны мыныкузы калык дӥсьёссэс дӥсяло.

Эшшо одӥгез калык аксессуар — камали — озьы ик семьяысь котькуд нылкышнолэн вань. Алевтина апайлэн верамезъя, сое юртысь поттоно вылымтэ. Мукет сямен вераса, сое ныллы ӧвӧл, кенлы сётылӥллям. Камали дорысь ке потӥз, сое уродэн лыдъяллям.

— Азвесь коньдонэн чебермам камали тыр улӥсь семьяосын гинэ луэм. Жаляса верано, милемлы но со песянай-песятайёсмылэсь ӧз выжы, технология урокын асьмеос лэсьтӥмы вал. Али соин уг выро ини. Озьы бере, вуоноын камали сярысь верась, сое лэсьтыны дышетӥсь но уз шедьы шуыса луыны быгатэ. Озьы ке но адямиос сое утё, доразы мед луоз шуыса тыршо, — валэктэ Лилия.

Азвесь коньдонлэсь чеберманлэн кӧня ке люкетэз вань. Нырысетӥез йыре пононо такъя шуиське. Солэн самой шораз бадӟым азвесь коньдон понэмын луыны кулэ вылэм. <…> Вашкала коньдонэн лэсьтэм чырты котыре пононо люкетэз чыртыкыӵ шуиське. Со береез — гадьыгы, нош самой кузь люкетэз — камали.

Гадьыгые пӧртэм буёло басмаос керттылӥллям, нош айшетлэн но камалилэн паллян палазы чебер карон понна кышет керттӥськем.

— Сюан нуналэ эмеспилэн ӵыжы-выжыосыз ныл понна мыныкузы дэрем вылазы камали но поно. Азьло егитъёс кузпалъяськыку, вань вӧсьрад быдэстӥськылӥз но, сюанэз 4 нунал пусъё вал. Отчы быдэс гурт калык пыриськылӥз. Котькуд юртын егитъёс гажамон куно луизы. Али ныл дорын гинэ кырӟанъёсты кырӟало, такмакъёсты верало но, сюанлэн кылем люкетэз туала сямен, кафеын яке ресторанын ортче, — шуэ Алевтина апай.

Вераны кулэ: вань кенъёсты та гуртын лушкаса ваё. Камаевъёс но Ирина кензэс бускель гуртэ куное лыктон дыръяз лушкаса вайиллям.

— Михаилэн ми кык ар пумиськылӥмы. Лушкан сям вань шуыса тодӥ, но нуэмезлэсь азьло мыным ивортыса ӧз улы. Дорысьёсызлы вераса, ӝыт монэ машинае пуктӥз но лушкаса нуиз. Дышем сямъя, егит пиос, ныллэн дораз мыныса, аракы но соин ӵош эмеспилэсь адрессэ гожтыса кельто. Ӵукнаяз ныл паласен эмеспи юртэ куное лыктоно луо. Берен нуыса кошкон учыръёс но луылӥллям. Но та ныллы шудтэм улон вае шуыса, мукет сямен вераса, шудзэ со та юртэ кыльтэ шуыса лыдъяськем, — вера Ирина.

Сямъёс-йылолъёс

Камаевъёс кылэз утёнын сям-йылолъёслэн, калык сиёнъёслэн интызы бадӟым шуыса лыдъяло. Удмуртъёс Семык, Акашка, Кисьтон праздникъёсты пусъё. Но Виктор Камаевлэн малпамезъя, праздникъёслэн пуштроссы утиське ке но, воштӥськонъёс но вань:

— Азьло Кисьтон бадӟым карыса пусйиськылӥз, ӵыжы-выжыос, гуртоос, коркась корка ветлыса, праздник каро вал. Али котькин ас ӵыжы-выжыосыныз гинэ ортчытэ. Армие кошкись пиез вань гурт калыкен келян йылол но милям гуртамы гинэ утиськиз. Озьы ик вӧсь интыослэн кужымзы но каллен быре, — вера со.

Вӧсь интыос али тодмо ке но, курбон сётон, куриськон, вӧсяськон йылолъёс отын уг ортчытӥсько ни вылэм.

— Сям-йылолъёс быдэсак уг быро, но соослэн куд-ог люкетъёссы вуно, уг быдэстӥсько. Кылсярысь, песянайёслэн дыръёсазы вӧсяськон кужмо вал. Со дыре адямиос «лудъёсын» курбон сёто вылэм. Милям гуртамы кык луд луэм: Пӧша луд но Чола луд. Инмарлы курбон сётон, вӧсяськон интыос йӧтонтэмен лыдъяськиллям, отысь номыр басьтыны уг яра вылэм. Сыӵе вӧсь инты милям бакчаямы но вань. Йылолъёсты ӧм ке но быдэстэ, ми но, нылпиос но со интые номыр ум мерттӥське, ум кизиське. Бакча шорын озьы ик шормуӵ выллем улэ. Та сярысь внукъёслы но валэктыса верамы. Соос та интыысь из но, музъем но басьтыны уг яра шуыса тодо, — шуэ семьялэн тӧроез.

Школа

Сала Кушкет гуртысь нылпиос 3 иськеме интыяськем Шор Кушкет гуртэ ветлыса дышетско. Татын дас гуртысь 116 нылпи тодон валан басьтэ, вань удмуртъёс, бигеръёс но ӟучъёс. Эшшо 30 пиналъёс нылпи садэ ветло.

Школалэн директорезлэн Константин Граховлэн верамезъя, урокъёсты ӟуч кылын нуо. Удмурт кылэз вордскем кылэз кадь дышето.

— Школаын дышетскисьёс куспазы уногес удмурт сямен верасько. Бигеръёс но ӟучъёс луэм классъёсын вераськон кыл — ӟуч, — шуэ со. — Озьы ке но берло аръёсы нылпиослэсь ӟучомемзэс адӟисько, шӧдӥсько. Мынам малпамея, та, нырысь ик, семья бордысен потэ. Кыкетӥез, нылпи садын но шуг-секыт вань. Тае мон ас пие ласянь но вераны быгатӥсько. Со Ципьяысь нылпи садэ ветлэ. Кылзы быдэсак ӟуче выжемын ини. Валамон мугзэ вераны но уг быгатӥськы. Отчы ведь уногес бигер нылпиос ветло. Малы озьы луэ со? Уг тодӥськы.

Константин Граховлэн малпамезъя, татын телефонъёслэн, гаджетъёслэн но кужымзы бадӟым.

— Телефонысь котькуд приложениез, шудонэз пӧртэм кылъёсын мед лэсьтысалзы но, котькуд нылпи ас вордскем кылыныз мед шудысал, — таӵе малпанзэ вуттӥз со. — Быгатӥсь егитъёсмы, организациосмы трос. Соос тае, оло, лэсьтыны но быгатысалзы.

Кызьы вера удмурт кылъя но литературая дышетӥсь Римма Петрова, нылпиослэн вордскем кылъя урокъёссы арняяз куинь пол ортчо. Кыкез — удмурт кыл, одӥгез — литература.

— Вань дышетскисьёс вордскем кыл карыса удмурт кылэз бырйизы. Та ласянь ми дорын шуг-секытъёс ӧвӧл. Со 1-тӥ классысен 11-тӥ классозь дышетӥське. Дышетскисьёс куспазы ӵемгес удмуртэн верасько, но берло дыре пиналъёслэн нылпи садын ӟучомемзы шӧдӥське. Покчи классъёсын но дышетскисьёс дышемзыя ӟуч кылын верасько. Жаляса верано, кӧня ке берпуметӥ аръёс ӵоже та тужгес но юн шӧдӥськыны кутскиз. Соин вань оскон — семьялы. Но нылпиосын доразы ӟуч сямен гинэ вераськись семьяос но тросгес луо. Семьяын анай кылыныз вераськись нылпи школаын но удмуртэн вераське, школа программаез но трослы капчигес вала, — вера со.

Озьы ик Римма Петрова учебникъёс ласянь шуг-секытэз но ӝутӥз.

— Куатетӥ классысен кутскыса, удмурт кылъя выль учебникъёс ӧвӧл. Литературая учебникъёс 10-11-тӥ классъёсын гинэ ӧвӧл. Соин вуж книгаосъя дышетоно луэ. Выльёсыз луозы шуыса верало, верало но, выль стандартъёсты пыртэмен сэрен, соос куронъёслы уз тупалэ, — шуэ дышетӥсь.

Солэн верамезъя, нылпиос школа библиотекаысь удмурт книгаосты, газетъёсты но шер лыдӟо.

Вераськонмы дыръя Лилия Чирикова но эшшо одӥг шуг-секыт сярысь кыл поттӥз.

— Милям вераськетамы асэстэм (заимствованной) кылъёс трос. Литературной кыллэсь со трослы висъяське, — шуэ Лилия Чирикова. — Соин милям нылпиосмылы школаын кылэз дышетон секыт сётӥське. Учебникын одӥг ик кыл чылкак мукет сямен гожтӥське. Вылаз ик, туала удмурт кылын но выль кылъёс ялан ватсаськыса уло. Нылпиослы гинэ ӧвӧл, анай-атайёслы но секыт луэ. Нылпиосын ӵош ми но кылэз выльысен дышетӥськом.

Ӵӧжы табанянь сиён

Удмуртъёс тыр улыны ярато. Камаевъёс но, «ваньмыз но аслад мед луоз» шуыса, скал но, кунян но, парсь но вордо. Гужем гидкуазь тыр тылобурдо будэто. Соин соослэн пудоен герӟаськем йылолъёссы но вань.

Кылсярысь, кунян ке вордскиз, соос, скаллэн ӵӧжы йӧлызлэсь табань пыжыса куноосты люкало.

Вераны кулэ, та сям Камаевъёслэн семьяязы но, гуртазы но туннэ нуналозь утиськемын. Ӵӧжы табанянь сиён празднике люкаськем куноос ӝӧк сьӧры пуксем бере, кузё кышно соослэн кымесазы пуньыен шуккыса ортче вылэм. Та серемес сям «милям кунянмы озьы лекаське» шуыса валэктӥське вылэм. Нош собере юртлэн кузёосыз но куноос кырӟаса, эктыса, шулдыръяськыса пуко.

Автор: Зухра Садыкова («Ватаным Татарстан» газет)

Фото: Ильдар Мухаметзянов

Статьялэн бигер вариантэз: vatantat.ru