Ас ужзэ яратӥсь фельдшер

Кӧня ке дыр ӵоже нылпи садын медсестра луыса ужамез бере Алина Вуж Кушкет гуртын фельдшерлэсь ужзэ быдэсъяны кутске. Фельдшеръёсты арлыдоос яратыса «гурт доктор» шуо. Вуж Кушкет гуртысь калык но Алинаез яратэ, ужзэ вылӥ дунъя.

Алина Сизнер гуртын огшоры ужась семьяын вордскыса быдэ вуэ. Нырысь вордскем гуртаз покчиёзо школаын тодон-валан басьтэ, собере Ципья шоръёзо школаын дышетске. Дышетскон аръёсаз дышетӥсь луыны малпаса, азьпал улонзэ пиналъёслы тодон-валан сётонэн герӟамез потэ. Но анай-атаез медсестралэсь ӧнерзэ бырйыны ӵекто, нылаш пумит уг луы. Озьы со Уржумысь медициная училищее дышетскыны пыре. Отын куинь ар тодон-валан басьтэ. Ужан сюрессэ 2009 арын Казаньысь пинь эмъянъя частной клиникаын кутске. Нош 2011 арын республиканской специализированной нылпи юртэ интыяське.

— Та нылпи юртын ужаны кутскеме бере, монэ витетӥ группае ужаны интыязы, отын карантинэ шедем нылпиос вал. Нырысетӥ нуналаз ик мон отысь Маша нимо нылэз синйылтӥ но анай-атайме со нылэз вордыны басьтыны ӝуткай. Со нылаш бадӟым синмо, кузь йырсиё, туж чебер вал, но инвалид. Асьмеос но ми семьяын куинь нылпи, соин матысьёсы та малпанэлы пумит луизы. Анае вуриськись луыса ужаз, атае — механизатор, семья югдур но луонлык ӧз сёты со нылашез вордыны басьтыны. Аслам сменаям мон котьку со доры бызисько вал, со монэ тодма, шумпотэ вал. Но одӥг нуналэ сое вордыны басьтӥзы. Шумпотӥ ке но, семья шедьтӥз шуыса, сюлмам мӧзмон кылиз…

Карантин группаысь монэ кыллись инвалид нылпиос доры выжтӥзы. Дыльдызэс ньылыны быгатымтэ пиналъёс но вань вал... Отын ужаны туж секыт луиз... Но сыӵе пиналъёс борды но чаль дыши, быгатэмея утьыны, юрттыны тыршиськомы вал. Но кулэмзы бере сюлэм туж чигиськылӥз...

2013-тӥ арын бызи но декретэ потытозям гинэ нылпи юртын ужай. Собере ини гуртэ бертыса интыяськимы, малы ке шуоно кузпалэлы городын улыны ӧз кельшы, аслым но гуртын умойгес, каньылгес, пиналъёс но урамын шудыса ветлыны быгато. Вуж Кушкетэ бертэммы бере, кузпалэ Андрей гурт возёсын ужаны кутскиз. Нырысь осеменатор луыса тыршиз, агрономлы дышетскемын шуыса тодэмзы бере, учётчике тодмостӥзы.

Кык нылпиосмы вордскизы. Анайзыелы 55 аресэн ужамысь дугдыны ӵектыса, ачим ужаны потӥ. Газетысь медсестра кулэ шуэм иворез лыдӟыса, тодмостэм номеръя жингыртӥ но Балтасьысь 4-тӥ номеро нылпи садын ужаны кутски. Отын мон кема ӧй ужа ке но, ужме туж яратӥ, малы ке шуоно нылпиосын ужаны мыным тужгес но кельше. Кӧня ке толэзь нылпи садын ужаме бере, гуртамы ик фельдшер луыса ужаны ӧтизы. Выльысь дышетскыса, сертификат басьтэме бере мон ини Вуж Кушкетын ужаны кутски. Зэм, татын кылкутон туж бадӟым. Гуртын улӥсь вань адямиослэн тазалыксы понна кыл кутоно луоз шуэм малпан кышкатэ вал. Собере ини сокем дыши, ужме яратэмысь отпуске но потэме уг поты вал. Нош азьло ӧнерея ужаме потымтэ дыръёс луылӥзы. Табере ини мон гуртоосылэсь тазалыксэс утись мурт луэменым данъяськисько но анай-атаелы, школа бере медицина удысэз бырйыны косэмзы понна, бадӟым тау карисько.

Ужаны кутскыкум врачъёслэсь но, мукет фельдшеръёслэсь но бадӟым юрттэтсэс шӧдӥ, юанъёсы луыку но жингыръяй, котькуд юанэлы пыр-поч валэктон сётылӥзы. Соин но мон котькудзылы тау карисько.

Кузпалэ егит ӧнерчи луэмысь, ас дыраз кун программая черодэ султӥмы. Солы луыса туннэ нуналэ асьме юртамы улӥськомы ини. Егитъёслы гуртэ улыны интыяськон понна вань луонлыкъёс кылдытэмын. Зэм, дышетскем ӧнеръя уж шедьтон гинэ секыт. Озьы ке но гурт — со гурт, татын инкуазь но, омыр но мукет, — шуэ Алина.