Асьмелы одӥг гинэ вормон кулэ!

Матысь дыре быдэс Россиын Быдӟым Атыкай ожын Вормонлы 79 ар тырмонэз пусъёзы. Та бадӟым праздникмы котьку пӧртэм мылкыдо луэ: татын шумпотон но, кайгу но, мӧзмон но, оскон но огазеясько.

Куартолэзь — со аспӧртэмлыко вакыт, куке ваньмыз улӟе, сайка но сяськая.

Нимаз 9 куартолэзе пусйиськись Вормон Нунал эшшо но пуш мылкыдъёсты бугыртыса, адямиез кыдёкысь историе выжтэ, куке песянай-песятайёсмы асьсэ улонзэс сётӥзы, асьмеос туннэ чагыр инбамез но пиштӥсь шундыез адӟыны мед быгатомы шуыса. Нош кыӵе секыт вал со сюрес…

Ӵапак бугырскем мылкыдъёсты ик возьматӥзы концертэ пыриськисьёс ёросмылэн сцена вылаз. Татчы люкамын вал 5-26 оштолэзе ортчем зональной этапъёсысь тужгес умой номеръёс. Гала-концертын ёросъёсысь творческой коллективъёс сяна, нимысьтыз кырӟасьёс но кылбур лыдӟисьёс луизы. Ужрадын ожгар вакытысь кырӟанъёс быдэстэмын, секыт аръёсты возьматӥсь но сюлме пыӵась кылбуръёс лыдӟемын вал. Озьы ик ожгар кырӟанъёслы тупатэм эктонъёсты но адӟыны луонлык кылдӥз. Котькуд пыриськись вормисьлэн дипломеныз но сертификатэн пусйиськиз. 

Туннэ нуналэ но асьме понна туж матын луэ ожлэн бервылъёсыз. Нуналлы быдэ ивортэк ышем яке кулэм матысьёсынызы пумиськись семьяос понна та нунал эшшо но матын шӧдӥське, дыр. Кӧня воргорон югыт дуннеен люкиськиз, кӧня анайёс пиосынызы пыраклы люкиськизы, кӧня нылкышноос кузпалъёссэс берпуметӥ сюресаз келязы но кӧня нылпиос атайёссылэн индылонъёссытэк кылизы, кӧня синву кисьтэмын... Малпаны ик кышкыт... Нош Быдӟым Атыкай ожын бырем батыр воргоронъёсмы сярысь веранэз но ӧвӧл. 
Балтась сцена вылын ӵапак вань мылкыдъёс ик люкаськизы. Нимысьтыз удмурт творческой выступлениос ӧй вал ке но, удмурт гурт клубъёсысь артистъёсмы мукет калыкъёс пӧлын ӧз сылме. Тулкымъяськемзы адскиз ке но, сцена вылын со ӧз шӧдӥськы. Концертэ пыриськиськисьёс вань сюлэмзэс поныса, номеръёссэс дасяллям. 

Удмуртъёс пӧлысь адӟыны луиз Карек-Серма гурт клубысь «Ингур» ансамблез «Когда мы были на войне» кырӟанэн (кивалтӥсез — Зоя Никитина), Ӟаны лулчеберетъя юртысь вокальной ансамблез «Мы не сдадимся» кырӟанэн (кивалтӥсьёсыз — Алефтина Иванова, Татьяна Михайлова), Ципья лулчеберетъя юртысь «Радуга» эктонъя коллективез «Журавли» эктонэн (кивалтӥсьёссы — Елена Демеева, Евгения Михайлова), Покчи Лӧзя лулчеберетъя юртысь «Русские узоры» ансамблез «Женщины в погонах» кырӟанэн (кивалтӥсьсы — Галина Петрова), озьы ик Александр Волковез «Я служу России» патриот мылкыдэн тырмем кырӟанэн. Номеръёссы туж умой дасямын вал, конкурслэн азьпал радаз сылӥзы шуыны быгатӥськом. Выступлениоссы чебересь ожгар вакытлы тупась дӥськутэн но узыртэмын вал.
Ӟечкыласьком тӥледыз! Азьланяз но бадӟымесь вормонъёсы вутскыны сӥзиськом, азьпал радъёсысь позициостэс ыштытэк, быдэс элькунмы понна адӟем карымон луыса, удмурт калыклэсь устолыксэ но быгатонлыксэ узыртэ! Сюлэмъёсады котьку яратон, гажан но валан мылкыдъёс мед тырмозы!