Асьмеос — одӥг семья

20-тӥ куарусёнэ Набережной Челны городын «Мы ветви древа одного» шуыса нимаськись республиканской фестиваль ортчиз. «Мы ветви древа одного» — ТР-ысь финн-угор калыкъёслэн фольклор фестивальзы. Туэ со куатетӥзэ ортчиз. Фестивалез радъясьёс — Набережной Челны городысь исполнительной комитетлэн лулчеберетъя управлениез, Набережной Челны городысь лулчеберетъя «Дом дружбы народов «Родник» автономной муниципал учреждение.
Та нуналэ фестивале лыктэм куноос но Челны городын улӥсьёс Татарстан республикаысь но солэн палэнысьтыз вуэм творческой фольклор коллективъёслэсь тужгес чебер выступлениоссэс адӟизы. Куноос пӧлын вал Татарстанысь Калыкъёслэн эшъяськон юртсылэн директорез Шарипов Ирек Ильдусович, Татарстанысь удмуртъёслэн НКА-зылэн тӧроез Герасимов Андрей Сергеевич, вань удмуртъёслэн «Удмурт Кенеш» мер огазеяськонзылэн тӧроез Ишматова Татьяна Витальевна, пор но мордва калыкъёслэн азьветлӥсьёссы но трос мукет гажано куноос. Куатетӥ арзэ радысь ортчись фестивале асьмелэнъёс но — Покчи Лӧзяысь «Вуюись» но Шор Кушкетысь «Шулдыр ӝыт» ансамбльёс — пыриськизы.
— Туж шумпотыса мынӥмы та фестивале, сыӵе мылкыдъёсын ик бертӥмы. Милемлы ваньмыз кельшиз — пумитаны но, куно карыны но туж быгатӥзы фестивалез радъясьёс. Ужрадэ пыриськизы поръёс но, мордва но, удмуртъёс но — огъя вераса, Татарстанын улӥсь финн-угор калыкъёс. Зоро куазь но нокинлэсь мылкыдзэ сӧрыны ӧз быгаты, — шумпотэмзэ вуттӥз «Вуюись» ансамбльлэн устолыкъя кивалтӥсез Галина Петрова.
Аслаз мылкыдъёсыныз воштӥськиз Шор Кушкет клублэн заведующиез Алевтина Иванова но. Лӧзяос та фестивале кӧня ке пол ветлӥзы ке ини, «Шулдыр ӝыт» туэ нырысетӥ ползэ гинэ пыриськем.
— Фестиваль сярысь милемлы положенизэ лэзиллям вал. Ми отчы пыриськыны малпамы. Одӥг гинэ номер возьматӥмы ке но, мылкыдъёсмы пачылмизы. Куазез кезьыт вал, зориз. Но куазь отын нокинлы ӧз люкеты кадь, зор улын ке но, концерт программа мынӥз. Нош ми выступать карыку шунды но потӥз, — пальпотыса вера Алевтина.
Кырӟанъёс но эктонъёс сяна, фестивальлэн программаяз луизы на адӟытон-вузкарон, пельнянь фестиваль, кудаз мылкыд карисьёс перепеч, табань, пельнянь веръяны быгатӥзы. Озьы ик фестивале пыриськем котькуд мурт бадӟым розыгрыше пыриськыны быгатӥз, кудаз вормисьёсты ческыт кузьымъёс витизы. Валтӥсь приз — одӥг арлы тырмымон пызь.

Фото: Галина Петровалэн туспуктэмез.