Асьмеос пӧртэмесь, но асьмеос ӵошен

16-тӥ оштолэзе Покчи Лӧзяысь Культура юртын «Эшъяськонлэн ошмесэз» — «Родник дружбы» ёрос конкурслэн гала-концертэз ортчиз. Со Татарстан Республикаын Анай кылъёслэн но калык огазеяськонлэн арезлэн рамкаосаз радъяськиз. Конкурсэз радъясьёс — Балтась ёросысь ӟучъёслэн НКА-зы, удмуртъёслэн «Кенеш» НКА-зы но Балтась ёросысь исполнительной комитет.

Нырысетӥзэ ортчытӥськись конкурс 5-тӥ оштолэзьысен 13 оштолэзёзь куинь зонаын ортчиз — Ципьяын, Шор Кушкетын но Покчи Лӧзяын. Ужрадэ 10 культурая учреждениосысь, озьы ик дошкольной но огъядышетскон ужъюртъёсысь коллективъёс мыло-кыдо пыриськизы. Соос «фольклор», «вокал» но «хореография» номинациосъя номеръёс дасяллям вал. Выступлениос кык кылын — ӟучен но удмуртэн луизы.

Гала-концертэ куно луыса вуизы Андрей Герасимов — Татарстан Республикаысь удмуртъёслэн НКА-зылэн тӧроез, Балтась ёросысь исполнительной комитетлэн кивалтӥсезлэн воштӥсез Ильгам Гайнутдинов, Балтась ёросысь исполнительной комитетлэн кивалтӥсезлэн нырысетӥ воштӥсез Ильшат Галимуллин, Балтасьысь централизованной клубной системалэн кивалтӥсез Раиль Садыков, культура отделлэн кивалтӥсезлэсь ужзэ быдэсъясь Разина Салахутдинова, Покчи Лӧзя гурт поселенилэн главаез Сергей Мухин. Казаньысь лыктэм куно, Андрей Герасимов, шуиз:

— Асьмеос туж эшлыко республикаын улӥськомы. Татарстан Россиын дано луэменыз тодмо, со трос регионъёс понна пример луэ. Малы ке шуоно асьме республикамы пӧртэм палъем лулчеберетэныз данъяськыны быгатэ. Туннэ ёросады ортчись конкурс но эшшо огпол возьматэ, Татарстанын калыкъёс эшлыко уло шуыса. Тау бадӟым та конкурсэз радъясьёслы, ужрадэ пыриськем котькуд адямилы, тужгес но нылпиослы. Бадӟым вормонъёсы вутскыны мед кылдоз!

Андрей Сергеевичлэн кылъёсынызы ваньзы соглаш луизы, дыр. Ильшат Галимуллин но пусйиз, асьме республикаямы туэез ар та конкурс выллем ужрадъёслы туж узыр шуыса. Озьы ик со шуиз, ужрадэ пӧртэм калыкысь (ӟуч но удмурт) представительёслэн пыриськемзы туж шумпоттэ шуыса. Ильшат Султанович сценаын асьсэды возьматэм артистъёсты ёрос сценаын гинэ ӧвӧл, республика, Россия масштабен ортчись ужрадъёсын но адӟыны мед кылдоз шуэм мылкыдъёссэ но вуттӥз.

Конкурс, зэмзэ но, артистъёслы нош одӥг пол асьсэды сценаын возьматыны луонлык сётӥз. Нырысетӥзэ ортчемез шоры учкытэк, ужрад пыр-поч но кулэезъя дасямын вал шуыса шӧдӥськиз. Радъясьёс ужрадэ пыриськемъёсты куинь арлыд категориосъя (3-7 арес, 8-17 арес, 18-70 арес) нырысетӥ, кыкетӥ но куинетӥ интыосын пусйизы, соослы дипломъёс но уксё сертификатъёс кузьмазы. Озьы ик ужрадэз ортчытыны юрттэм котькуд муртэз но дипломен шумпоттӥзы, жюрилэн членъёсыз сярысь но ӧз вунэтэ. 

 — Татарстан республикаын бадӟым масштабен Анай кылъёслэн но калык огазеяськонлэн арез пусйиське. Асьмеос шумпотыса вераны быгатӥськомы, Балтась ёросамы пӧртэм калыкысь адямиос куспазы тупаса, эшлыко уло шуыса. Республикаямы трос лэсьтэмын, пӧртэм калыкысь но пӧртэм осконысь адямиос тупаса мед улозы шуыса. Асьме ёросмы та ласянь пример луэ, малы ке шуоно асьме дорын азьло дырысен трос калыкъёс эшлыко улӥллям. Та ужрадэ нылпиослэн пыриськемзы туж шумпоттэ, малы ке шуоно та нылпиослэсь пичиысен асьсэ калыксылэн лулчеберетсы борды кыстӥсько шуэмез валэктэ. Конкурс традицие пырыса мед кылёз вал, арысь аре татчы пыриськисьёслэн лыдзы будыса мед мыноз. Мед со луоз Балтась ёрослэн брендэз. Оло, азьпалан бускель регионъёсысь но пыриськыны мылкыд карисьёс луозы, — шуиз ужрадлэн куноез Ильгам Гайнутдинов.

Ильгам Фидаелевичлэн кылъёсыныз Балтась ёросысь ӟучъёслэн НКА-зылэн тӧрозы Анастасия Данилова но соглаш луиз. Со вераз, Татарстанын уло пӧртэм калыкъёс, но асьмеос котьку ог-огмес яратыны, гажаны кулэ сыӵеен, кыӵе асьмеос вань шуыса. «Асьмеос пӧртэмесь, но асьмеос ӵошен, бадӟым эшлыко семья. Вордскем кылдэ гажаса, со дыре мукет калыкысь адямиосын тупаса улон нылпи дырысен пычатӥське. Та конкурсэз радъяку, ми нырысь ик со сярысь малпаськимы. Вожвылъяськонмылэн валтӥсь мугез — ёросамы улӥсь калыкъёсмылэсь сям-йылолъёссэс утён; кыллы, сям-йылолъёслы гажан пыӵатон. Оскисько, малпам ужпумамы вутскыны быгатӥмы, дыр, шуыса».

Гожтэмме йылпумъяме потэ Балтась ёросысь удмуртъёслэн «Кенеш» НКА-зылэн тӧроезлэн, Ольга Пчельниковалэн, вераменыз:

— Анай кылэз утён но азинтон — со ваньмылэн бадӟым ужмы. Озьы ик асьмеос мукет калыкъёслэсь сям-йылолъёссэс но гажаны кулэ. Соин но малпамын вал таӵе вожвылъяськон, кудӥз нимаське «Эшъяськонлэн ошмесэз». Мон малпасько, ужрадмы умой пӧрмиз шуыса. Ужрадэ пыриськемъёслы, музъемозь ик йыбырттыса, тау каремме вуттӥсько. Валантэмъёс луизы ке, малпасько, вождэс уд вае шуыса. Сӥзисько бадӟымесь азинсконъёс. Та мылкыдды ноку но медаз кысы!