Аспалмы Маргарита Васильева вань республикалы тодмо кышномурт луиз

Кышномуртлэн таӵе тодмо луэмезлы шумпотымон но данъяськымон муг вань: «Женщина года. Мужчина года: женский взгляд» республиканской конкурслэн Тюлячиын ортчем зональной этапаз аспалмы Маргарита Васильева 1-тӥ инты басьтӥз. Куать вожмаськисьёс пӧлын вылӥ показательёсы вутскыса, со тужгес умоез луиз. Шумпотонзэ вераса, кышномурт «Азьлане» газетлы но интервью сётыны соглаш луиз.

Та дырозь пӧртэм ёрос масштабен конкурсъёсы пыриськем но вормонъёсы вутскем кышномуртлэн та конкурсын но вормемезлы паймонэз но ӧвӧл: ужзэ яратэменыз, сое рос-прос быдэстыны быгатэменыз со вань конкурсантъёссэ азьпалтэ. Но ушъяськыны кышномурт чик но уг яраты вылэм, нырысетӥ инты басьтэмзэ но коллективезлэн огъя тыршемезлы луыса вутскем вормонэн лыдъя.

Бадӟым Лӧзя I люкет гуртын улӥсь Маргарита Петровна Васильева егит дыръяз товаровед луыса ужам. Соку солы пӧртэм гуртъёсы ветлыса ужаны тупам. Нылпиосыз пичи луэмысь, со та ужлэсь палэнтӥськоно карем. Ӧжытак малпаськыса, быръем социальной ужасьлэсь ӧнерзэ. Со дырысен 20 ар ортчем ини, но та быръёнэз сярысь Маргарита Петровна огпол но жалямтэ.

— 20 ар ини Балтасьысь калыклы социальной юрттэт сётонъя «Наз» центрын ужасько. Та дыр ӵоже мынам эскереме улсын 19 социальной услугаосты басьтӥсьёсы вал. Котькудӥзлэн соос пӧлысь аслаз сямыз вал, котькудӥныз огъя кыл шедьтоно луиз. Котькудӥзлэн аслаз улонэз, аслаз улон сюресэз, бадӟым улон опытэз. Соослэсь улоназы луэм учыръёссы сярысь верамъёссэс, ӵектонъёссэс кылзыса, мон аслым бадӟым эскертэт (опыт) басьтӥ. Зэм, та уж капчи ужъёс пӧлысь ӧвӧл. Кызьы огпол одӥг песянае вераз, мон мӧйыослэн универсальной юрттӥсьсы: ачим ик сиён пӧзьтӥсь, психолог, дворник, парикмахер, эш… Бадӟым сюлэмо, чидась, жалясь, валась луоно. Аслад мылкыдыд шоры учкытэк, котьку мӧйы эшъёсыдлы ӟеч кылын юрттыны быгатоно. Ваньмызлы та сямъёслы дышетсконо луиз. Дышеме бере, мон шумпотыса песянайёс доры ветлӥ но ветлӥсько, малы ке шуоно мон тодӥсько: соос монэ котьку витё.

Тазьы вера социальной ужась луэмез сярысь Маргарита Петровна. Солы выль быръем ӧнерезлы кема дышоно уг луы: адямилыко, жалясь сюлэмо нылкышнолы та уж туж кельше но сюлэмезъя луэ.

Ужзэ рос-прос быдэсъяны тыршись кышномурт, аслэсьтыз песянайёссэ шумпоттыны тыршыса, ас дыраз соос понна трос ӟеч ужъёсты лэсьтэ: Владимир вынызлэн но Нина сузэрезлэн юрттэменызы мӧйыос понна «Вӧй» праздникез радъя. Песянайёсты, аслаз мылпотэмезъя, Раифской монастыре нуэ (та понна солы песянайёс «Тынад тыршеменыд дуннеез адӟимы» шуыса трос пол тау каро), песянайёсты дораз мунчое пырыны вае, аслаз пӧрам сиёнъёсыныз шумпоттэ.

Куинетӥ арзэ ини Васильевъёслэн семьяязы огназ луись мӧйы песянай улэ — Жилина Идея Николаевна. Маргарита Петровна сое дораз басьтыса утьыны соглаш луэм — со песянайлы семья шумпотон, каньыл но шудо улон, шудо пересьмон даур кузьма.

— Кузпалэлы Сергейлы бадӟым тау, монэ валамез но поддержать каремез понна. Туннэ нуналэ нылпиосмы асьсэ понна уло, нош ми кыкнамы бадӟым юртын улӥськомы вал, соин Идея Николаевнаез дорамы басьтон ласянь шуг-секытъёс ӧз кылдэ. Ми кузпалэным туж шумпотӥськомы, одӥг адямилы ке но юрттыны, семья шунытэз кузьманы быгатӥськомы шуыса.

Приёмной семьяын улэ шуыса, Идея Жилина сярысь нокин но вераны уз быгаты. Сое Васильевъёслэн семьяязы ярато, асьсэ анайзы шоры кадь учко. Соосын ӵош песянай пӧртэм православной праздникъёсты но пусъе — Ымусьтонэз, Акашкаез. Кылем арын 12 коньывунэ 85 аресъем юбилейзэ но выль семьяеныз пумитам песянай.

— Мазэ ватонэз, мон валасько, та песянай понна мон валтӥсь адями луисько шуыса: мон ик солэн матысь эшез, юрттӥсез, визь-кенеш сётӥсез, утисез. Мон понна песянайёсты утён уж кадь но ӧвӧл ни — та мынам улонэ. Мон ачим но пенсие потон арлыдам вуисько ини, соин туннэ нуналэ, Идея Николаевна сяна, мон вылын нош одӥг песянай гинэ лыдъяське — Бадзым Лӧзя II люкет гуртын улӥсь Лихачёва Нина Васильевна. Та песянай но монэ туж яратэ, матын каре. Алигес висиськем вал, со муген нуналлы быдэ Нина апай доры ветлыны ӧй быгаты. Бурмеме бере кӧня ке нуналскын со доры вуи но юасько: «Нина апай, тон монэ витид-а?». Нош со мыным шумпотонзэ ватытэк вера: «Конечно, вити. Туж мӧзми тынэсьтыд, кызьы тонтэк улом?» Кыӵе мон шумпотӥ сыӵе кылъёсты кылыны… Аслэсьтым 81 аресъем анайме но утисько. Со гуртамы ик улэ, соин отчы ветлон ласянь шуг-секытъёс ӧвӧл, нуналлы быдэ анае доры вуисько.

Толэзьлы быдэ социальной удысын тыршисьёс Васильевъёслэсь улон условиоссэс эскеро: соос чаклало, умой-а соос дорын Идея Жилиналы улыны. Толэзьлы быдэ соос адӟо но валало: та семьяын песянаез асьсэлэсь анайзэс кадь утё.

Бадӟым сюлэмо кышномуртлы, ас ужезлэн усточиезлы Маргарита Петровналы азьпалан но бадӟым вормонъёсы вутскыны сӥзиськомы. Сыӵе кышномуртъёсын но адямиосын дуннемы улэ!