«Данъяськонэ но вань шумпотонэ — нылпиосы но матысь адямиосы»

90 аресъем юбилейзэ матысь адямиосыныз пумитась Анастасия Прокопьевна Сапожникова озьы шуэ

1-тӥ толсуре 90 аресъем юбилейзэ пусйиз Ципья черкогуртысь Сапожникова Анастасия Прокопьевна — гуртысь гажамон песянай, ас дыраз трос нылпиослы тодон-валан сётэм дышетӥсь, яратоно анай но песянай. Анастасия Прокопьевнаез ёрос кивалтэтысь но гурт поселениысь представительёс вордскем нуналэныз ӟечкылазы, ваньзэ умойзэ сӥзьыса, кузьымъёс кузьмазы. Матысь адямиосыз но вӧзаз вал, соос но песянайлы шуныт мылкыд каронъёссэс вуттӥзы.

«Атае «Дышетскы, нылы, дышетскы» шуиз»…

Анастасия апай 1932-тӥ арын Сырья гуртысь Ефимия но Прокопий Сапожниковъёслэн семьяязы вордске. Солэн кык бадӟым агайёсыз луо, берлогес кык вынъёсыз но вордско.

— Туж секытэн будӥмы ми. Нюлэскын пичи дырысен трос ужамы, уйинзэ но ветлӥськомы вал. Пичиысен ужаса будыны тупаз милемлы. Кынмем картофка бичамы, солэсь табанянь пыжыса сииськомы вал. Поттурын нянь сиимы… Ма, ваньзэ вераса быдтыны но уг луы, — веранзэ кутске Анастасия Прокопьевна.

Но уродэз сярысь солэн трос малпаськемез но, вераськемез но уг поты.  

— Котьма ке но, школаын дас ар дышетскыны быгатӥ мон, — данъяськыса азьланьтэ юбиляр. — Покчи классъёсты вордскем гуртам, Сырьяын, дышетскыса потӥ, собере дышетсконме Ципьяысь школаын азьланьтӥ. Школаын мон умой дышетски, «куиньёсы» ӧй вал.  Анае мынам тани воксё дышетскымтэ: ӵужанай лэзьымтэ вылэм солы тодон-валан басьтыны. Анайлы тазьы шуэм: «Кагаздэ дӥсяса ветлод-а ма? Дышетсконэн вырытозь, черсы». Соин анай одӥг буква но тодымтэ, весь ужам. Атае нош мыным дышетскыны косӥз. Со соку гуртысь самой образованной адями луэм, ньыль класс быдтэм. «Дышетскы, нылы, дышетскы» шуиз. Мон сое кылзӥ, дышетски. Талы али ке но пумтэм шумпотӥсько.

Сырья гуртысь школалы 30 ар улонзэ сӥзе

1956-тӥ арын, 10 классэз йылпумъямез бере, Анастасия Прокопьевна кӧня ке толэзьлы Челябинск улосысь Копейск городэ шахтае ужаны кошке. Отысь вордскем палъёсаз бертэмез бере, дышетон удысын ужаны кутске ини (дышетӥсьёс соку ӧжыт луэмысь, та ужлы кулэяськон бадӟым луэм). Нырысь ик Янгурчи гуртэ нылпиосты дышетыны ветлэ.

— Декретэ потэм кышномуртъёсты трос вошъяса ужай, — егит дыръёссэ тодаз вае песянай. — Нырысь Янгурчиын ужай, 1957-тӥ арын — Ӟаны школаын. Порезысь школаын но ужай. Отын ини начальнойёсты гинэ ӧвӧл, бадӟымгес нылпиосты но дышетӥ. Соос монэ асьсэ эшсы интыын адӟизы. «Прокопьевна» шуыса гинэ вазё вал (серекъя — ред.).

1957-тӥ арын ик Анастасия Прокопьевна Сырья школаын ужаны кутске. Отын ини со 30 арлэсь тросгес, пенсие потытозяз тырше. Пенсие потэм бераз но али декретэ потэм дышетӥсьёсты вошъяса кӧня ке дыр ӵоже ужа.

— Нылпиосын ӵош ачим но дышетски, шуыны луэ. Бен, соку 10 классэз йылпумъясьёс трос ӧй вал но мон соослэн радазы вал ке но, опыт ужаса гинэ люкаське ук. Со котьку но озьы вал, озьы луоз но. Сырьяын ужаны кутскеме бере, Ижкаре биологической факультетэ заочно дышетӥсьлы дышетскыны пыри, вылӥ тодон-валан но басьтӥ. Таин мон туж данъяськисько, — шуэ пальпотыса песянай.

Дышетскемезлы но дышетӥсь луыны быгатэмезлы Анастасия Прокопьевна котьку шумпотэм. Солы нылпиосын ужаны туж кельшем. Сырьяын со кема аръёс ӵоже огназ гинэ дышетӥсь луыса ужам (кыкетӥ дышетӥсь ог дас арскын гинэ лыктэм али), куинь классъёсты дышетэм. Вань нылпиос одӥг кабинетын пукыса, ӵош дышетскиллям. Али ке но Анастасия Прокопьевналэн син азяз, кызьы со нылпиосызлы тодон-валан сётэм, кызьы со соосты йӧлэн сюдэм, кызьы ӟечезлы дышетэм…

1971-тӥ арын кышномурт Ципья гуртэ картлы кошке. Картлы кошкыса, Ципьяын улыны кутскемез бере но, Сырья гуртысь школаын ужзэ со уг кушты. Кузпалэз Анатолий колхозын ужам. Жаляса вераны кулэ, со 1991-тӥ арын кулэм ини.

«Мон нылпиосыным туж данъяськисько» 

Анастасия Прокопьевналэн куинь нылпиосыз вань — Лидия, Александр но Ольга. Туннэ нуналэ со вить внукеныз но ушъяськыны быгатэ.

— Мон нылпиосынымы туж данъяськисько, ваньзылэн тодон-валанзы вань. Лида медициная институтэз йылпумъяз, пимы — ветеринарной институтэз, нош Оля — банковской школаез. Мон соос понна туж шумпотӥсько. Атае дышетсконлэн пайдаез сярысь пичиысен верам бере, мыным аслым но нылпиосы тодон-валан мед басьтозы кадь потӥз котьку но, — маде юбиляр песянай. — Ватытэк вераны быгатӥсько: мон шудо анай но песяй, ӵужанай. Та нылпиосылэн тодон-валан басьтэменызы гинэ герӟаськымтэ — соос вӧзам, монэ утё, учко. Куное бертыло. Та — валтӥсез. Ачим туннэ нуналэ пиелэн семьяеныз улӥсько. Нина кенэ но туж умой кышномурт. Со монэ уте, учке.

Нялтас вераса, Анастасия Прокопьевналэн кенэз Нина Николаевна Давлекова анайзыезлэсь ужзэ азьланьтэ — со Ципья шоръёзо школаын ӟуч кылъя но литературая дышетӥсь луыса тырше, директорлэн визьнодан ужъёсъя воштӥсез но луэ.

— Улон туала дыре трослы капчияз. Котькыӵе каньыллыкъёс вань, сиёнлы ум ёрмиське, транспорт ветлэ. Тазалыкен, каньылэн улыны мед кылдоз таӵе чебер улонын, — йылпумъяз Анастасия Прокопьевна.

Али кема аръёс ӵоже матысьёсызлэсь шунытсэс шӧдыса, сӧл-таза луыса улыны мед кылдоз та песянайлы — трос нылпиослы тодон-валан сётэм дышетӥсьлы, яратоно но гажано анайлы, песянайлы.