«Дуслыкын» туэ 691 гектар музъемын кукуруза кизиллям (+фоторепортаж)

«Дуслык» возёсэ вуыку, механизаторъёс, валтӥсь агрономлэн Сергей Чириковлэн эскеремез улсын, Ӟаны гурт дорын интыяськем 123 гектаръем музъемаз «Лимагрейн-30179» гибридъем кукурузаез окто вал. Тямыс ар ӵоже валтӥсь агроном луыса ужась Сергей Геннадьевичлэн верамезъя, туэ «Дуслыкын» 691 гектар музъемын кукуруза киземын (кылем арын 500-лэсь тросгес луэм). Солэн 168 гектарез «Ладожский-148» российской гибридэн, нош мукетъёсыз кунгожсьӧр гибридъёсын (123 гектарын «Лимагрейн-30179», 100 гектарын «Лимагрейн-2195», 200 гектарын «Эмелин» но 100 гектарын «Белами» гибридъёс) киземын.

— Кукурузаез люканы 5-тӥ куарусёнэ кутскимы. Али тани кукурузалэсь «Лимагрейн-30179» гибридзэ октӥськомы. Тазэ кукурузаез силослы дасяськомы. Урожаез умой шуысал, шорлыдын одӥг гектарысь туннэ нуналлы 395 центнер басьтӥськомы. Кидыслы 300 гектарзэ октыны малпаськомы, мед гинэ вуысал, — вера Сергей Геннадьевич. — Мед луоз умой урожай, ведь соку йӧл но умой луоз, возёс но улоз.

Кукурузаез октон ужъёсы куинь комбайн пыриське — одӥг «Ягуар» но кык «Палессе». «Палессеен» Игнатьев Виталий но Степанов Виталий тыршо (соосты бусыын ӧм учыртэ). «Ягуарен» Яковлев Олег ужа.

Олег Павлович Яковлев «Дуслыкын» 2002-тӥ арысен тырше, тулыс ДТ-75 тракторен, гужем «Ягуар» комбайнэн, али дыре сенаж, кукурузаез тыре. Соин ӵош ужа егит воргорон Юрий Петров. Со но возёсын кӧня ке ар ӵоже ужа ини. Люкам кукурузаез КамАЗ машинаосын Юрий Петров сяна, Анатолий Яковлев, Владимир Макаров, Артём Волков траншеяосы нулло.

Анатолий Яковлев но Владимир Макаров — кыкназы но бадӟым опытэн механизаторъёс. Анатолий Павлович Ӟаны гуртысь воргорон, «Дуслыкын» со 46 ар тырше ини. Армиын служить карыса бертэмез дырысен со колхозын руль сьӧрын. ГАЗ-51 машинаен ужаны кутскем Анатолий агай туннэ нуналэ карьерной КамАЗ машинаен тырше. Гужем бусы ужъёсы пыриське — ю но, сенаж но, кукуруза но нуллэ. Толалтэ — гаражын.

— Ужмы капчи ӧвӧл ке но, ми сое яратӥськомы, кылкутонэз валаса ужаны тыршиськомы. Егитъёс но вань ми дорын, вылаз ик соос сезон ужлы гинэ уг интыясько — ялан татын ужало. Мар бен ужантэмез? Луонлыкъёс умой, али тани ужасьёслы куро, турын, ю сётӥзы, — шумпотэ механизатор.

Пор-Кутеш гуртысь Владимир Анатольевич Макаров но 40 арлы матэ ужа ини возёсын. ГАЗ-53-ен кутскыса, ЗИЛ машинаен но ужаса утем пиосмурт, 1994-тӥ арысен кутскыса туннэ нуналозь КамАЗ машинаен тырше. Туннэ нуналэ соос Анатолий Павловичен огкадь ужъёсты быдэсъяло вылэм — бусыысь люкам кукурузаез, комбайн векчиятэм бере, силос гуэ вутто.

Силос гуын К-701-ен Виталий Кондратьев со массаез лёга.

— «Дуслык» «Искра» шуыса нимаськыку ик, мон татын ужасько вал ини. Колхозэн ӵош будӥмы шуыны луэ. Возёсмы арысь аре сяськаяське, шумпотымон. Сыӵе дыръя ужаммы но потэ, — пумита милемыз Виталий агай.

Аслэсьтыз ужзэ опытэн механизатор туж умой тодэ. Та сярысь вераськыса сылыкумы дорамы лыктэм бригадир Рамиль Вафин вераз. Собере, ужъёсынызы тодматыса, со азьланьтӥз:

— Бусыосты 100 процентлы гырыса быдтӥськомы, К-744 тракторъёсын атаен пиос Семён но Евгений Петровъёс тыршо, кык сменаен ужало. CLASS AXION тракторен Виталий Кешишев гыре, туннэ нуналэ гыроно музъемъёсмы ӧвӧл ини, ваньзэ дыраз быдтыны тыршиськомы.

Вож массаез компьютер пыр эскерыны луэ. Та ужъёсын выро Сергей Макаров но Зиннур Рамазанов. Сергей Макаров возёсын кема аръёс ӵоже валтӥсь агроном луыса ужам мурт, туннэ нуналэ со пудоослэн сиёнзы, рационзы понна кылкутӥсь ужась. Зиннур Рамазанов бусыысь кӧня урожай вуэмзэ эскере, сое кытчы интыяны вера. Компьютерзы пыр, зэмзэ но, ваньзэ учкыны, эскерон улсын возьыны умой но каньыл. Нош педлон интыяськем экранын адске, кӧня ингридиентъёсты рационэ тырыны кулэ. Та ужез быдэстэ JCB экскаватор-погрузчикен ужась Александр Прокопьев. Со экранын показатель «0» луытозь сенажез погрузчикеныз пыртылэ.

Рамиль Вафин, адӟем карымон ужасьёсынызы данъяськыса, йылпумъяса вераз:

— Котькыӵе уж нырысь ик огъя луэмез кулэ каре, ми но озьы ужаны тыршиськомы. Вылаз ик, туж шумпотымон, возёсмы азинске, арысь аре ужамы кыӵе ке выльдӥськонъёс пыртӥсько. Соос ужмес каньылгес, капчигес карыны юртто. Сыӵе условиосын ужаны но туж шумпотымон.

Та кылъёсын соглаш кариськытэк уг луы. «Дуслыкын», зэмзэ но, уж пӧзе — татын ваньзы кылкутоно ужзэс мыло-кыдо быдэсто, дыраз урожаез люкало, люкам урожайзэс кулэезъя радъяло но интыяло. Кукурузаез но дыраз люкаса быдтон понна куазь умой мед луысал.