Дышетӥсь – бадӟым улонэ сюрес усьтӥсь

2023-тӥ ар Россиысь Президентлэн указэзъя дышетӥсьлэн но визьнодасьлэн арезлы сӥземын. Ас ужзэс яратӥсь дышетӥсьёсты туала аре трос шуыны уг луы, малы ке шуоно, азьло аръёсын ӵошатыса, дышетон удысын куронъёс туж трос: урокъёсты дасян дыр но вакчиямын, документациос но отчётъёс трослы йылэмын, дышетӥсьлы пӧртэм ужрадъёсы, тодослыко конференциосы, конкурсъёсы пыриськоно, эшшо ке 3 арлы одӥг пол квалификациез ӝутон курсъёсын дышетсконо, 5 арлы одӥг пол категоризэс юнматоно. Палэнысен гинэ ваньмыз капчи адӟиське. Школа сяна, семьялы но дыр висъяно, нош гурт интыын эшшо пудо-живот вань на.

Котькуд дышетӥсьлэн вань аслаз историез, аслаз дышетон амалъёсыз, но куке семьяын кык яке солэсь тросгес дышетӥсьёс — паймиськод, кызьы дышетон ӧнер адямиослэн йыразы но сюлмазы пыӵамын.

Пичи Вуж Кушкет гуртын али 5 кузя дышетӥсьёс: Светлана Михайловна Карабаева, Светлана Ивановна Щербакова — кыкназы но Вуж Кушкет гуртысь покчиёзо школаын дышето; Наталья Юрьевна Исаева (ӟуч кылъя но литературая дышетӥсь), Людмила Ивановна Исаева (математикая дышетӥсь), Наталья Михайловна Уськеева (покчи классъёсын дышетӥсь) — Шор Кушкет гуртысь шоръёзо школаын дышето. Котькудӥз аслаз удысаз тыршыса, сюлэмзэ поныса ужа. Та дышетӥсьёслэн шуныт сюлэмзы но визьмо кенешъёссы пыр кӧня нылпиос потэмын ни. Котьку паймисько: соос вань ужъёсазы вутско, юрттэт кулэ луиз ке, котьку кенеш сёто, жалятэк котькуд дышетскисьлы дырзэс но кужымзэс сётыны дась. 

Вань-а сыӵе ужъёссылэн пайдаез? Одно ик! Соослэн дышетскисьёссы асьсэды пӧртэм ӧнеръёсын шедьто но, тау карыса тодазы ваё. Вань таукарон кылъёссэс гожъяны кутскид ке, быдэс арлы тырмоз. Котькуд дышетӥсьлэсь тодон-валанъёссэ быдэс книгае но печатланы уз луы. 
Туннэ вераськон мыноз Щербаковъёслэн-Исаевъёслэн семья кусыпъёссы сярысь. Валэктон но сётыны кулэ на: Вуж Кушкет гуртын Щербаковъёс кӧня ке семья, но выжызы соослэн одӥг, соин ик ваньзы ог-огзылы ӵыжы-выжыос луо, ог-огенызы юн кусып возьыса, ог-огзылы юрттыса улыны тыршо. 

Ольга Васильевна Щербакова (Трофимова) вордӥськиз 1946-тӥ арын Пор-Кутеш гуртын. Аслэсьтыз дышетон сюрессэ кутскиз покчиёзо классъёсын дышетыса, бератаз анай кылэз но литератураез дышетӥз. Каньыл сямо дышетӥсь ноку но урод мылкыдзэ дышетскисьёсыз вылэ ӧз выжты. Али дыре кадь дышетон сӧзнэтын бадӟымесь куронъёс ӧй вал, соин ик дышетӥсьлэн кужымез нылпиослэсь зэмос адями будэтонлы ӧръямын вал. Дышетскисьёс но, туала дырен ӵошатыса, тросгес вал, пӧртэм гуртъёсы но ветлоно луиз дышетӥсьлы, дышетскисьёсызлэсь семьяоссэс учкыны. 

Али дыре но Ольга Васильевналэн дышетскисьёсыз со доры куное лыкто, вордӥськем нуналаз шумпотыса телефон пыр ӟечкыланъёссэс верало, огшоры нуналъёсы но тазаклыкез сярысь юаллясько, пумиськонъёсазы ӧтчало. Котькуд дышетскисезлы зэмос визьнодась луиз, лякыт сюлмыныз котькудзэ ушъяны гинэ дыртӥз. Пенсие потэм бераз но шутэтскон ӧз вала на: «Яна тормыш» колхозысь парсь вордонъя комплексын ужаз. Али ке но Ольга Васильевна шуг-секытъёслэсь уг кышка, троссэ адӟем нылкышно улонлы уг ӝожтӥськы, котькуд нуналзэ тау карыса пумита. 

Ольга Васильевналы бадӟым юрттэт сётӥз семьяез — кузпалэз Юрий Щербаков но нылпиоссы. Семьялэн юрттэтэзтэк нокызьы уг луы ужаны, тае котькуд дышетӥсь тодэ. Огазе улоназы кузпалъёслэн пӧртэм дыръёссы луиз ке но, ноку адями азе секытъёссэ ӧз поттэ, соин ик семья зӥбыт луиз, дыр. Ӵошен соос шуг-секытъёсты вормизы, шумпотонъёсты пумитазы, семьязылэн йылэмезлы юн оскизы. Кузпалъёс 3 нылпиосты пыд йылазы вуттӥзы: Владимир, Светлана но Наталья. Нылпиос дыраз дышетскыны но вутскизы, асьсэлэсь ужан сюрессэз но шедьтыны, асьсэ улонзэс радъяны быгатӥзы.

Туннэ нуналлы Ольга Васильевна туж шудо нылкышно: нылпиосыз, внукъёсыз но Алиса правнучкаез вань. Матысь адямиосыз, ӵыжы-выжыосыз ӵемысь бертыло, мӧзмыны дыр уг сёто. Корказ котьку шулдыр жингрес куара чузъяське. Нош трос-а солы кулэ? Валтӥсез — матысь адямиосызлэн шумпотонъёссы но вормонъёссы. Со котьку ческыт пӧраськыса дораз возьма, песянай сюлмыз шуныт малпанъёсын котькудзэ лул пушказ возе. 

Ольга Васильевна гуртын дано адями луэ, визьмо кенеш сётыны быгатэменыз висъяське. Кышномурт мыло-кыдо пыриське гуртысь арлыдоослэн «Марӟан» фольклор ансамблязы но. Пусйыны кулэ, песянайёслэн коллективзы ёрос конкурсъёсы но, Удмуртиысь «Выль ар ӝытэ» но пыриськиз.