Дышетӥсь – бадӟым улонэ сюрес усьтӥсь (2 люкет)

Наталья Юрьевна Исаева (Щербакова) — Ольга Васильевналэн нылыз, вордӥськиз 1973-тӥ арын. Пичи дырысеныз ик нылаш анаез бордынгес улӥз, солэн тунсыко дышетон амалъёсыныз тодматскылӥз, нылпиосты юн яратэмзэ но адӟиз.

Нылаш понна анаезлэн каньыл мылкыдо но ненег сюлэмо луэмез весяк улонэзлы бадӟым пример луиз. 

1990-тӥ арын егит Наталья Ӟаны гуртысь шоръёзо школаез йылпумъяз. 1991-тӥ арын Удмурт кун университетлэн филология отделенияз дышетскыны пыриз. Университетэз йылпумъяз 1996-тӥ арын, ӟуч но удмурт кылъя но литературая дышетӥсьлэсь ӧнерзэ басьтӥз. Та арын ик Вуж Кушкет гуртысь покчиёзо школаын дышетон сюрессэ усьтӥз. 1999-тӥ арын ужаны кутскиз Ӟаны шоръёзо школаын пионервожатой луыса. 

Дышетӥсь классэн но, соослэн анай-атайёсынызы но мыло-кыдо ужа. Котькуд ужрадлы рос-прос дасяське, дырзэ жалятэк выль амалъёс но утча, огъя собраниос ортчытъя. Нылпиосыз но солэн ачиз кадь визьмоесь но устоесь. Выль дышетӥсь борды соку ик кыстӥськизы, уроксы йылпумъяськем бере вань малпанъёссэс вераны дыртӥзы.

Яратонзэ егит нылаш шедьтӥз вордскем гуртысьтыз ик, Вуж Кушкет гуртысь. Кузпалэз Олег Александрович ужа школаын ик, семьяязы зэмос пиосмурт луэ. Исаевъёс асьсэ тыршеменызы но кужыменызы бадӟым корка лэсьтӥзы. Соослэн будо 3 пиоссы: быдӟымез, Максим (1997), улэ Ижкарын, ужа Ижкарысь тодослыко мувӧй поттонъя центрысь инженерной геодезия ёзэтын 2-тӥ категориен инженер луыса. Удмурт кун университетын дышетскыкуз но пӧртэм ужрадъёсын азьветлӥсь луиз. Тыршемъёсыз юнме ӧз луэ: со университетлэн данъян пулаз пусъемын вал, нимысьтыз стипендия но утӥз. Армие но ветлыны вуиз, службаез Севастопольысь зарезь-ожгар флотын ортчиз. Шоретӥ пизы, Константин (2008), 9 классэ выжиз, покчиез пизы, Егор (2013), Вуж Кушкет гуртысь покчиёзо школаез йылпумъяса, 5 классэ Ӟаныысь шоръёзо школае лыктӥз. Костя но Егор дышетсконын асьсэды умоен возьмато, спортэн тунсыкъясько, конкурсъёсы пырисько, олимпиадаосын призо интыос басьто, анай-атайзылы сюлмысь юртто. 

Туннэ нуналэ но Наталья Юрьевна Ӟаны школаын ӟуч кылъя но литературая дышетэ, котькуд дышетскисьсэ чеберлыко кылъёсын суредам дуннее пыртыса, шонер визьноданы тырше. Литература пыр улонын луись учыръёсты валэктэ, ӟуч кылъя урокъёсаз чебер кылын гожъяськытэ. Дышетӥсьлэн урокъёсаз пырид ке, отын котьку тунсыко, котькуд урокезлы материалъёсыз лад-лад дасямын, небыт куараез йыре кыле но тодон-валанъёс басьтыны мылкыд ӝутӥське. Дышетскисьёсыз понна сюлмаське, соослэн вормонъёссылы юн шумпотэ. Туэ огъя кун экзамензэ дышетскисез (Дина Михайлова) 95 баллы сётӥз. Наталья Юрьевна гуртлэн лулчеберет улонэзлэсь но палэнэ уг кыльы, «Чибори» ансамбльлэн одӥгез валтӥсь пыриськисез луэ.