Дышетӥсь – бадӟым улонэ сюрес усьтӥсь (3 люкет)

Светлана Ивановна Щербакова (Исаева). Ольга Васильевна адӟем карымон анай луиз нылпиосызлэн кузпалъёссылы но. Олег эмеспиез но Светлана кенэз шуныт кылъёсын гинэ вазисько, котькуд учырын кенеш курыны дырто.

Кенэз, Светлана Ивановна Щербакова (Исаева), вордӥськиз 1968-тӥ арын Вуж Кушкет гуртын ик.

Ольга Васильевналэн Владимир пиезлы бызьыса, Щербакова луиз. Жаляса верано, Владимир Юрьевич туннэ нуналэ асьме пӧлын ӧвӧл ни. Озьы ке но, шуныт тодэ ваёнъёс али ке но сюлэмез буйгато, гуртысь котькуд адямилэсь юад ке, урод кылъёс со сярысь кылыны уз луы. Зэмзэ ик, вань ӵыжы-выжыосыз понна со зэмос яркыт кизили кадь вал. Ужын но, сцена вылын но ассэ возьматӥз, котькуд адямилэсь куронъёссэ быдэстылӥз, секыт кылъёсын ноку ӧз вазиськы. Семьяез понна юн пыкет луиз.

Светлана Ивановна но Владимир Юрьевич вордӥзы Игорь (1991) но Роман (2001) пиоссэс. Туннэ нуналэ Игорь пизылэн Алиса нылыз будэ, со семьяеныз улэ Ижкарын, «Трест Геопроектстрой» огазеяськонлэн лабораториезлэн кивалтӥсез луыса ужа. Покчиез пизы, Роман, кемалась ӧвӧл армиысь бертӥз, службазэ Самара карын ортчиз, али заочно Ижкарысь гурт возёс университетын дышетске. Романлэн гурт уж борды кыстӥськемез адӟиське. Соин ик вань гурт уж борды кышкатэк басьтӥське. 

30 арлэсь трос Светлана Ивановна дышетэ ни Вуж Кушкет гуртысь покчиёзо школаын. Паймымон: со пыр ортчем пиналъёслэн нылпиоссы но со доры вуизы ни! Светлана Ивановналэн туннэ нуналэ 6 дышетскисез: 2-тӥ но 4-тӥ классъёс. Котькудӥз понна нимысьтыз кылъёс шедьтыны быгатэ, соослэн мылкыдъёссылы котьку сак луэ, соин ик, дыр, урокъёссы бере пиналъёс доразы бертыны уг дырто. 

Калык юнме «кыкетӥ анай» уг шуы вылэм. Котькуд нылпи понна нырысетӥ дышетӥсь анай кадь луэ, солэн небыт киосыз но либатӥсь куараез сюлме шуныт пыртэ. Огез ласянь гинэ сюлмыз вӧсь луэ дышетӥсьлэн: «Туала нылпиос удмурт кылын уг ни верасько. Удмурт кылъя но лыдӟонъя урокъёсын троссэ ӟуч кылэ берыктоно луисько». Зэм, туала нылпиос удмурт кылэз дышетыны уг дырто, эшъёсынызы, семьяязы ӟуч кылын верасько. Соин ик покчи классъёсын ужась дышетӥсьёслэн валтӥсь ужпумзы — вордскем кыллэсь данзэ будэтон но юнматон. Светлана Ивановналэн тыршемъёсыз юнме ӧвӧл: урокъёсаз но переменаосаз пиналъёсын удмурт кылын вераське. Пичиос санэ басьто, асьсэос но удмурт кылын вазьыны кутско. Озьыен, пичи школаын удмурт кылэз утён гинэ ӧвӧл, улӟытон уж но мынэ. Дышетскисьёсыз сое сюлмысь гажало, данъяло. Улонэ сюрес усьтӥсь дышетӥсьсылы пиналъёс асьсэлэсь шумпотонъёссэс но ужпумъёссэс вераны дырто. Куддыръя дышетӥсь золгес куараен вазёно луэ ке но, синъёсыз котьку яратыса учко. 

Светлана Ивановна но Ольга Васильевна валче одӥг юртын уло: керетытэк, куспазы тупаса, кенешыса.