Дышетӥсь – бадӟым улонэ сюрес усьтӥсь (4 люкет)

Светлана Ивановналэн вынызлэн кышноез, Людмила Ивановна Исаева (Лепатова), вордӥськиз 1977-тӥ арын Кургем гуртын, али дыре ужа Ӟаны шоръёзо школаын математикая дышетӥсь луыса. Туннэ нуналэ ёрос сьӧрын но тодмо, ужзэ яратӥсь дышетӥсь.

Солэн дышетскисьёсыз олимпиадаосын, конференциосын призо интыос басьто, экзаменъёсын шӧдскымон бадӟымесь баллъёс люкало.

Людмила Ивановна Михаил кузпалэныз озьы ик уло Вуж Кушкет гуртын, будэто 2 нылъёсты: Елена но Вероника. Елена нылзы дышетске Ижкарысь медициная кун университетын, Вероника нылзы 10-тӥ классэ выжиз. 

Людмила Ивановна аслаз юн но капчи мылкыдо луэменыз адямиосты бордаз кыскыны быгатэ. Вераськыны кутскиськод ке, тунсыко учыръёсты вераменыз дыр ортчемдэ ик уд шӧдӥськы! Капчи мылкыдо дышетӥсь котьку вылезлы дышетскыны тырше. Котькуд ужрадъёсын воштонтэм азьветлӥсь луэ: «Сферум» дышетон площадкаын администратор, Элькунысь предметной комиссиысь эксперт, научно-практической конференциосы пыриськись. Людмила Ивановна классэныз ужаны но быгатэ: кылем дышетскон арын ёросысь «Секреты дружного класса» конкурсын «Самый сплоченный класс» номинациын вормись луизы, озьы ик, котькуд ужрадъёсы пыриськемзэс лыдэ басьтыса, школаын «Класс года-2023» луыса данъямын вал.

Тӥни озьы ньыль пӧртэм дышетӥсьёс ӵошен вань ужъёссэс лэсьто: школаын но, улонын но. Ог-огзылы юрттон соос понна одӥгез самой валтӥсез луэ. Котькуд шумпотонзэс но шуг-секытсэс ӵошен ортчо. Солы асьсэос школаын но дышето: котькуд адямилы юрттыса, гажаса улыны, котькуд учыре йырын малпаськыны. Кытысь меда шедьтод сыӵе шуныт кусыпъёсын улӥсь адямиосты?! Паймымон семья кусыпъёс, паймымон дышетӥсьёс, кудъёсыз сюлмысь тыршо нылпиослы тодон-валан сётыны. Гуртын но сӥлы карымон адямиос луо, котькуд ужрадъёсы пырисько. 

Выль дышетскон ар кутскиз! Сӥзьыл куазьлэн чеберлыкез но шунытэз котькуд дышетӥсьлэн но дышетскисьлэн сюлмаз выль малпанъёс пыӵатэ, выль дышетскон арлэсь пайдаё луэмзэ возьма. Туннэ дышетскон сӧзнэт трослы пиналъёс понна секыт йӧтэ ке но, нылпиос тыршыса вань шуг-секытъёсты ортчо, соин ик соослэн азьлань сюрессы вольыт но шумпотымон мед луоз! Оскиськом, выль дышетон амалъёс юрттозы котькуд дышетскисьлы аслэсьтыз малпанъёссэ улонэ пыӵатыны. Котькуд дышетӥсьлы сӥзиськом юн тазалык, азинскон, вормонъёс но каньыл мылкыд, нош шутэтскон дыръёсты ӝутскем мылкыдын тырмемын мед луозы!