Дышетӥсьлэсь нимзэ данэн нуллӥсьёс (2-тӥ люкет)

Ольга Анатольевна азьвыл вузкарись луо шуыса малпам ке но, бадӟым классъёсын дышетскыкуз, тодэм ини: со одно ик анаез кадь дышетӥсь луоз.

Котькуд дышетон удысэз бырйись адямилэн куке но яратоно дышетӥсез луэ. Паймонэз но ӧвӧл, Ольга Анатольевна понна яратоно, примере пуктымон  дышетӥсез анаез Зоя Мироновна луэ шуыса. Пичи дырысеныз солэсь рос-прос ужамзэ адӟыса будэм нылаш оске: со но анаез кадь визьмо, тыршись дышетӥсь луыны быгатоз.

Пусйыны кулэ, Ольга Анатольевналэн малпанъёсыз быдэсмо. Туннэ нуналэ Ципья шоръёзо школаын покчи классъёсын ужась Ольга Анатольевна Трокова — трос нылпиос понна яратоно дышетӥсь. Небыт но каньыл вераськеменыз, кылзыны быгатэменыз, нылпиосты яратэменыз, рос-прос но кулэезъя ужзэ быдэстэменыз со анай-атайёс пӧлын но, ӵош ужась дышетӥсьёсыз пӧлын но гажанэ вутскыны быгатӥз.

Ольга Анатольевналэн ужан сюресэз Кӧргем гуртысь покчиёзо школаысен кутске: 1994-тӥ арын школаез йылпумъяменыз валче УдГУ-ысь удмурт но ӟуч кылъя но литературая факультетэ заочно дышетскыны пырем нылмурт со аре ик дышетыны кутске. Кӧргемын со дыре директор луыса ужам Вячеслав Григорьевич Халтурин егит дышетӥсез пальпотыса пумита. Ольга Анатольевналы одӥг ар школаын ужан вакчи вакытэз ӵоже трос визь-кенешсэ, опытсэ сётэ со.

— Кӧргемын одӥг ар гинэ ужай, со дырысен трос аръёс но ортчизы ини, но со вакытэз мон ноку но уг вунэты. Малы ке шуоно вунэтонтэм дыр со. Егит шуыса верасез но, тышкаськисез но ӧз луы. Нылпиосы но туж йӧноесь вал. Али ке но Кӧргем калыкен кусыпъёсмы туж умой. Сырья гуртысь школаын но одӥг ар ӵоже ужаса вуттӥ. Отын но ужаны туж кельшиз. Со дыре нылпи сад-покчиёзо школаен Леонид Дмитриевич Сапожниковлэн кивалтэмез улсын коллектив эшлыко, бервыло ужаз, — тодаз вае нырысетӥ ужам аръёссэ Ольга Анатольевна.

1997-тӥ арын Сизнер гуртысь школае дышетӥсь кулэ луэмен, Ольга Анатольевна отчы ужаны интыяське. Дас куинь ар ӵоже анаеныз ӵош та школаын соос эшлыко, ог-огзылы юрттыса ужало. Нош 2010-тӥ арын Зоя Мироновна дано шутэтсконэ потэм бере, Ольга Анатольевна со интые директор луыса ужаны кыле но та интыужын школа ворсаськытозь, 2016-тӥ арозь, тырше. Со но, анаезлэсь ужзэ дано азьланьтыса, Сизнер гуртысь трос нылпиос понна яратоно нырысетӥ дышетӥсьсы луэ.

2017-тӥ арысен Ольга Анатольевна Ципья школаын ужа. Пичи гуртысь школа бере татын ужаны нырысь капчи луымтэ ке но (бадӟым коллектив, трос нылпиос, тодмотэм анай-атайёс), выль ужан интыезлы со ӝог дыше: нылпиос но сое матын каро, коллективын но поддержать каро.

— Пичи гуртын но бадӟым гуртын нылпиос ог-огзылэсь ӧжыт висъясько ке но, соос нырысь ик — ваньзы нылпиос. Соосын огъя кыл шедьтӥд ке, улон-вылонэнызы тунсыкъяськыса бадӟым адямиосын кадь вераськид ке, яратӥд ке — соос но тонэ яратозы. Мон ужам сыӵе амалъёсты кутыны тыршисько: тон нылпиез яратӥд ке, солы оскид ке — со но тонэ яратоз, тыныд оскоз, — шуэ дышетӥсь.

Шонерзэ веран понна пусйыны кулэ: Ольга Анатольевналэн амалэз умой ужа. Солэн классаз дышетскем нылпиос, яратоно дышетӥсьсылэсь мӧзмыса, ӵемысь кабинетаз вуыло, дышетӥсьсэс праздникъёсын ӟечкылало, асьсэлэсь куректонъёссэс, секретъёссэс, шумпотонъёссэс вераны пырало. 

Дышетӥсез та туж шумпоттэ: аслаз нылпиосыз кадь матын луэм дышетскисьёсызлэн сыӵе яратэмзы — ужезлы самой бадӟым дунъет.

Пӧртэм конкурсъёсы но мыло-кыдо пыриськыны тырше дышетӥсь: нылпиослэсь быгатонлыкъёссэс шараяса, соосты юнматыны турттэ. Анай-атайёсын но со умой кусып возьыны быгатэ — котькуд кылдэм юанъёсты, валантэмъёсты дыраз вераськыса сэрттыны-пертчыны тырше. Сыӵе Ольга Анатольевналэн малпанэз: вань кылдэм юанъёсты каньылэн вераськыса сэрттыны-пертчыны луэ.

(Азьланьтонэз вань)