Дышетӥсьлэсь нимзэ данэн нуллӥсьёс (3-тӥ люкет)

Сыӵе ик малпанэн улэ но ужа Зоя Мироновналэн нырысетӥ кенэз Таисия Анатольевна но. Со но дышетӥсьлэсь ӧнерзэ быръем. Каньыл, зэмлыкез яратӥсь, котькуд кылзэ малпаса верась, матысь адямиосызлы котьку юрттыны дась луись, нылпиосты пумтэм яратӥсь — сыӵеен тодо Таисия Анатольевнаез вордскем гуртаз Сизнерын но, Ципья шоръёзо школаын но, кытын со туннэ нуналэ ужа.

Ог 25 ар талэсь азьло Таисия Анатольевналы верасалзы ке, улон сое дышетон удысэ вуттоз шуыса, со киыныз гинэ шонтысал — ӧй оскысал, дыр.

Но 10-тӥ классын дышетскыкуз, Таисия сочиненияз удмурт кылъя но литературая дышетӥсь луоз шуыса гожтэм ик (зэм, удмурт кылэз дышетскыны солы котьку кельшем, «Бадӟым удмурт диктант» акцие но куинетӥ арзэ пыриське вылэм ини со). Озьы ке но, школазэ йылпумъяса одӥг ар ӵоже Ципьяысь «Калыкъёслэн эшъяськонзы» музейын смотритель луыса ужамез бере, егит ныл Урнякысь колледже бухгалтерлы дышетскыны пыре. 1993-1996-тӥ аръёсы «Смаиль» обществоын весовщица но бухгалтер луыса ужа. 2002-тӥ арын, дышетӥсь луон сярысь малпанъёссэ улонэ пыӵатон понна, Таисия Анатольевна УдГУ-э удмурт кылъя но литературая дышетӥсьлы дышетскыны пыре, 6 ар ӵоже отын тодон-валан басьтэ.

— 2005-тӥ арын Сизнер гуртысь школаын дышетӥсьлы инты луэ но анайзыелэн тыршеменыз мон отчы ужаны интыяськи. Аслад гуртад, тодмо адямиосын, пичи школаын ужаны каньыл вал. Вылаз ик та школаын анайзые но ужаз, со уж ласянь трос юрттӥз. Школа ворсаськытозь ужай Сизнерын. Отын номаин воштонтэм бадӟым опыт басьтӥ, со опыт мыным али ужаны туж юрттэ, — мылкыдъёссэ вера Таисия Анатольевна.

Сизнерын школа ужамысь дугдэм бере, дышетӥсьлы Улисьялын ужаны ӵекто, со пумит уг луы. Нуналлы быдэ трос иськеме ветлыса (яра али автобус нуллӥз), тодмотэм коллективын ужаны тупа Таисия Анатольевналы. Но тыршись дышетӥсез татын ярато но ужаны быгатэмзэ вылӥ дунъяло.

Ньыль ар ӵоже Улисьялын тыршемез бере, 2020-тӥ арын дышетӥсь Ципья школае ужаны интыяське.

— Нырысетӥ нуналъёсаз сюлмаськыса иземе но уг луы вал, — тодаз вае Ципьяын ужаны кутскем дыръёссэ кышномурт. — Сизнерын но Улисьялын нылпиос ӧжыт вал ке, Ципьяын соос трос кузя ук — та малпанъёс нырысь туж кышкатӥзы. Быгатом-а, оскем ужез быдэстыны пӧрмытом-а? — та юанъёс йырам улӥзы. Но Инмарлы тау, каллен дыши. Коллектив туж юрттӥз, анай-атайёс поддержать каризы, нылпиос но валазы. Туннэ нуналэ классам 16 нылпи, ваньзэсты туж яратӥсько, котькудӥз нылпие — аслам.

Таисия Анатольевнаез нылпиос но, анай-атайёс но туж ярато. Со ваньзэсын огъя кыл шедьтыса, даллашытэк, умой ужаны быгатэ. Аслаз тыршеменыз со коллективын бадӟым гажанэ вутскиз кӧня ке ар куспын гинэ но.

(Азьланьтонэз вань)