«Дышетскисьёсы мыным пыкет луизы»

1 сентябре мӧзмыт но ыштӥськем тусо дышетскисьёс уллёен ас дышетскон юртъёсазы вуизы. Нош соосын анай-атайёс, школаез йылпумъям дышетскисьёс, туала студентъёс... Зэм, выль дышетскон арлы сӥзем сӥё-дано линейка, дышем сямъя, уно адямиосты люка.

Но 1 сентябрь — со дышетскисьёслэн но анай-атайёслэн гинэ праздниксы ӧвӧл. Вань эшшо одӥгез та нуналэз чидатэк яке кышкасагес витись категория — со дышетӥсьёс. Соос сярысь Берпуметӥ гырлы дыръя но Дышетӥсьлэн нуналаз гинэ тодэ ваё. Та шонер ӧвӧл ке но, факт...

Ми но, мазэ ватонэз, дышетӥсьёс сярысь матэктӥсь праздниксы азьын, Дышетӥсьлэн нуналэныз валче гинэ тодамы вайимы. Праздничной статьяослы геройёсты утчаны кутским. Одӥгез сыӵе героинямы луиз Алиса Борисовна Иванова —ӟуч кылъя но литературая дышетӥсь.

Ачиз сярысь

Алиса Борисовна вордӥськиз 1990 арын Сала Кушкет гуртын. Атаез мушвордӥсь луыса ужам, анаез — фермаын лаборант. Дышетскиз Алиса Шор Кушкет школаын, 2007 арын ТГГПУ-э (али дыре КПФУ) дышетскыны пыриз. 2012 арын сое ӟуч кылъя но литературая дышетӥсь ӧнеръя йылпумъяз. Со арын ик удысэзъя Салаусь школае ужаны интыяськиз.
— Ӵапак со школаын ик кутскиз мынам дышетон удысын ужан сюресэ, отын ик басьтӥ дышетонъя воштонтэм нырысетӥ опыт, кудзэ мон туннэ нуналэ но утьыса возисько, — шуэ Алиса Борисовна.

2017 арысен со Балтась школаын дышетыны кутскиз. Егит дышетӥсь уг ваты, дышетсконзэ йылпумъямез бере городэ кыльыны но отын ужаны малпанэз вал шуыса. «Город кыскиз бордаз, но гурт ӧтиз тросгес. Городэ куное ветлыны луэ, эшъёс доры, ужъёсын, яке огшоры шутэтскыны, со тырме но», — вера со ас малпанъёссэ.

Классэн кивалтон — со усто но тунсыко-а?

— Куке БСШ-е ужаны лыктӥ, мыным соку ик 10-тӥ классэз сётӥзы. Малпай вал, соосын огъя кыл шедьтыны секыт луоз шуыса, соос мон кадесь ик ук. Мон ӧй тоды, ма сярысь дышетскисьёсыным верасько. Но сюлэмшугъяськонэ юнме вылэм. Нылпиос визьмо но трос тодӥсь вылӥллям, соосын нокыӵе шугъяськонъёс ӧз кылдэ. Ми туж ӝог пиналъёсын огъя кыл шедьтӥмы, «одӥг тулкым вылын» луимы. Дышетскисьёсы мыным пыкет луизы, соос мыным котьмаин юртто, со понна соослы бадӟым тау карисько. Соин мон юн кариськыса вераны быгатӥсько: классэн кивалтон — со усто но туж тунсыко.

— Но нылпиосын огъя кыл шедьтон — со али ужлэн ӝыныез. Валтӥсез — анай-атайёсын огъя кыл шедьтыны быгатоно...
— Анай-атайёсын но нокыӵе шуг-секытъёс ӧз луэ. Анай-атайёс понна валтӥсез — нылпиоссылы умой мед луоз шуыса. Нылпиослы умой — анай-атайёслы но умой.

Тӥни кыӵе огшоры вылэм ваньмыз.

Туала дышетскисьёс сярысь

— Али дыре ӵем кылӥське: тросэз туала дышетскисьёс визьнодамтэ, асьсэды гинэ ярато, дышетсконэн воксё уг тунсыкъясько. Соослы компьютер но телефон гинэ сёты. Валамон, вань дышетскисьёс сярысь тазьы вераны уг яра, со, ӧжытсэ, шонертэм луоз. Но озьы ке но, сыӵе шуг-секыт вань, солэсь нокытчы уд пыры. Котькуд нылпи, котькуд дышетскись аспӧртэмлыко луэ, соин котькудӥныз тупан, огъя кыл шедьтон понна уно тыршыны кулэ.
Кызьы тӥ та ужпумез быдэстыны быгатӥськоды? — тунсыкъяськисько мон.

— Мынам трос нылпиосы. Дышетӥсько 5-тӥ, 7-тӥ классъёсын, озьы ик 11-тӥ классын. Котькинлэн ас сямыз. Ас дыраз али Лев Николаевич Толстой вераз: «Дышетӥсьлы кык сям тырме: бадӟым тодон-валан но бадӟым сюлэм». Та кылъёс туннэ но актуальной луо, котьку но актуальной луозы. Котькуд дышетӥсьлэн луыны кулэ тодон-валанэз, кудзэ со ас дышетскисьёсызлы вуттыны кулэ, озьы ик котькуд дышетӥсь одӥг кадь яратыны кулэ ас дышетскисьёссэ. Валамон, школаын дышетскон, тужгес но ГИА-лы дасяськон — со капчи уж ӧвӧл. Секыт дышетӥсьлы но, дышетскисьлы но. Но куке дышетскисьёс ас наставниксылэсь кылзӥсько, соку ваньмыз пӧрмоз. Ӵошен ужан умой емыш сётэ, — шуэ Алиса Борисовна.

— Вералэ вал ужан методикады сярысь. Оло, урокъёсты нуонын тӥляд кыӵе ке но лушкем амалъёсты вань?
— Ужан методикаез милемлы ФГОС тодмостэ. Мон сое туж пайдаёен лыдъясько. Урокъёсын тыршисько информационной технологиосты но уже кутыны — презентациосты, таблицаосты, иллюстрационной материалъёсты. Нылпиослы озьы трослы тунсыкогес но, выль
материалэз но капчигес валало.

Дышетӥсьёслэн улоназы витьымтэ серемес учыръёс но луыло. Доска вылын янгышен шонертэм буква гожтӥд — тани нылпиос шулдыр серекъяло ини, доска шоры возьматыса, дышетӥсьлэсь реакцизэ витё. Сыӵе дыръя, Алиса Борисовналэн верамезъя, аслэсьтыд куалектэмдэ, юмоке шедемдэ возьматыны уг яра. «Умойгес луоз нылпиез ушъяны. Янгыштэ ачид ӧд синйылты шуыса вера, нош солы — «молодец» шуы».
 

Ватсам уж но наградаос сярысь

Озьы ик Алиса Борисовна вераз, урокъёсты ортчытон сяна, нылпиосын ватсам уж нуон сярысь но.

— Котькуд дышетӥсь аттестация ортчыны кулэ. Дышетӥсь нылпиосын ватсаса ужаны кулэ — конференциослы, конкурсъёслы дасяны. Ми асьмеос но куддыръя дышетскисьёслэн ужъёссылы материал утчаськом, но та, ми но нылпиосын ӵош азинскиськом шуыса, гинэ возьматэ. Форумъёсы, семинаръёсы ветлӥськом — нош ик воштонтэм опыт басьтӥськом. Та понна милемыз уксёен но пусъё. 2013 арын, кылсярысь, егит ӧнерчиос пӧлын «Асьмелэн выль дышетӥсьмы» шуэм республиканской грант утӥ. Озьы ик 2017 арын «Арлэн дышетӥсез» район конкурсэ пыриськыса, «За глубокий творческий подход» номинациын вормись луи», — вера дышетӥсь.

Огъя вераса, ужан опытэз бадӟым ӧвӧл ке но (ваньзэ-ӧвӧлзэ 6 ар), Алиса Борисовна ассэ усто специалистэн но ужезлэн усточиеныз возьматыны вутскиз ни. Ӧжыт ӧвӧл солэн школьной, районной уровенен грамотаосыз, озьы ик республиканскойёсыз но вань. Дышетскисьёсыз олимпиадаосы пыриськыло но призо интыос басьтыло. Но ачиз со вера, кагазъёс но наградаос понна уг ужа шуыса. Дышетскисьёсыныз басьтэм тодон-валан, соослэн вормонъёссы — тани солэн валтӥсь наградаез. Нош грамотаос — со дышетскисьёслэн тыршемзылы дунъет.

Паймымон но ӧвӧл, дышетскисьёс дышетӥсьсэс соку ик шуныт пумитазы шуыса. Валась, котькудзэ ас нылпизэ кадь яратӥсь. Соин сое ассэ но ӝог яратӥзы. Озьы ик дышетӥсьёс но. «Балтась школаын коллектив бадӟым ке но, туж эшлыко. Та коллективын ми ваньмы — одӥг бадӟым эшлыко семья. Мон школа коллективе капчиен пыри. Али но ужаны капчи. Ӵошен ужасьёсын мыным туж удалтӥз, юрттэмзы понна мон соослы пумтэм тау карисько», — шумпотэмзэ вера Алиса Борисовна.

Кыӵе гинэ секыт ӧз луы дышетӥсьлэн адӟонэз, кыӵе гинэ шуг-секытъёсын ӧз тупа пумиськыны егит педагоглы, Алиса Борисовна ужез но ӧнерез сярысь умоен гинэ вера.

— Мон тыршисько котькуд нуналлы шумпотыны, та бордын ик, дыр, вань секрет, — йылпумъя ас веранзэ дышетӥсь. — Котькуд чыры-пырыысь шумпотон адӟыны муг шедьтӥсько но та туж умой. Соин ик котьку но котькытын умойзэ шедьтыны кулэ.

Огшоры нылкышно шудбур сярысь
Алиса Борисовна — умой дышетӥсь гинэ ӧвӧл, озьы ик со яратӥсь кузпал но анай. Нылпиез солэн школаын гинэ трос ӧвӧл, дораз но уно. Но, кызьы верало, нылпи трос луыны уг быгаты. Алиса Борисовналэн соос куинь кузя. Туннэ нуналэ Владислав кузпалэныз соос Бадӟым Лӧзя гуртын уло, куать аресъем Ксюшаез, куинь аресъем Макарез но Аринаез будэто. Нош эшшо соосын егит семьялы котьмаин юрттӥсь песянайзы улэ. Тӥни сыӵе бадӟым но эшлыко семья.

P.S. «Ас нимыным ӟечкыламе потэ вань дышетӥсьёсты, ӵошен ужасьёсты Дышетӥсьлэн нуналэныз. Ужмы милям, зэмзэ но, секыт, но ас дышетскисьёсыдлэн синъёсысьтызы яратон ке адӟиськод — ваньмыз соку ик вунэ. Котькытысь умойзэ адӟыны ке дышетскимы, котькуд нуналлы шумпотыны ке быгатӥмы, ужаны но капчигес луоз. Ӧнер праздникен тӥледыз, гажано коллегаос. Чиданлык, кужым но визьнод», — Алиса Иванова.

Фото автора.