«Ӟеч луон котьку берытске»

Туннэ нуналэ врачьёс, фельдшеръёс, пӧртэм сюбег профильем ӧнерчиос туж вылӥ дунъясько. Соослы адями самой дунозэ оске — улонзэ. Арысен аре соослэн ужзы секытоме, пӧртэм кышкыт вакытъёсы но соос котьку калыкен валче уло но ужало. Тросэз выльдӥськонъёс, воштӥськонъёс, автоматизация пыр пото ке но, лултэм машина зэмос адямилэсь ужзэ ноку воштыны уз быгаты. 

Туннэ матысенгес тодматэме потэ егит удмурт медикен — Пускань гуртысь фельдшер-акушер пунктын ужась Степанова Лариса Юрьевнаен.

Со егит ке но, ужан стажез 8 ар луэ ини. Фельдшер гинэ ӧвӧл, со — анай-атайзэ гажась ныл, яратӥсь кузпал но сюлмаськись анай. Ас егит арлыдыз шоры учкытэк, калык понна тырше но ужаз выль амалъёсты пыртэ. 

— Ӟечбур, Лариса. Вера вакчияк ачид сярысь: кызьы ортчиз тынад пинал дырыд, кызьы радъяське семья улонэд, но сюлэмыдъя-а быръем удысэд? 

— Ӟечбур! Вордӥськи но будӥ мон Покчи Лӧзя гуртын. Дышетсконэ быдэсак Покчи Лӧзя шоръёзо школаен герӟаськемын: татчы нырысетӥ классэ пыри, татын ик 11-тӥ классме но йылпумъяй. Ваньмыз огшоры гуртысь нылашлэн кадь ик, татын аспӧртэмлыкъёсыз ӧвӧл. Атае — Юрий Якимович Назаров «Сурнай» возёсын механизатор луыса ужа, анае — Ираида Ивановна, Покчи Лӧзя школаын гардеробщица луыса тырше. Вань улонзы гуртэн герӟаськемын. 2 ар ӵоже гужем октон-калтон вакытэ атай комбайнэн ужаку, солэн юрттӥсез но луи. Гуртын котькыӵе ужез быдэстыны тупа ук!
Дышетскон сюресме азьланьтӥ Киров улосвылысь Уржум городысь медициная колледжын. 2016 арын ӟеч гинэ сое йылпумъяй но 1 пӧсьтолэзьысен, направление кутыса, Пускань гуртысь ФАП-лэн заведующиез-фельдшерез луыса ужаны кутски. Уг ваты, нырысь кӧня ке кышкатски, собере ваньмыз пӧрмоз шуыса асме ачим оскытӥ. 
2017 арын Ципья гуртысь пияшлы Василий Степановлы бызи. 2019 арын Карелино гуртысь 3 комнатаен квартира басьтӥмы. Малы ке шуоно Ципьяысен уже ветлыны туж кыдёкын луысал. 2018 арын нырысетӥ нылмы вордӥськиз, кылем арын — кыкетӥез. Соин али мон декретной отпускын лыдъяськисько. Инмар сётыса, кылдэм ке, азьланяз но отын ик ужез азьланьтыны малпасько.

— Пичи дырысеныд ик та удыс сярысь малпанъёсыд кылдӥзы-а ни? 

— Малпасько, тросэзлы инъет пичи дыръя кылдэ. Соку эшъёсыным медикъёс луыса шудӥськом вал. Анае но висьылӥз, ӵем гинэ ӝог эмъюрттэт лыктылӥз. Соин валтӥсь малпанъёсы котьку адямилы юрттонэн герӟаськылӥзы.

— Кыӵе калыкен тыныд ужаны тупа но кылдо-а ужад шуг-секытъёсыд?

— Пускань гуртын калык туж трос ӧвӧл, бигеръёс. Удмурт шуыса уг лыдъяло, гажаса верасько. Шуг-секытъёс котькуд ужын пумисько, сотэк нокызьы уг луы, но, тау Инмарлы, кышкытъёс ӧй вал на. Ужлэн плюсъёсыз минусъёсты быдто, та монэ туж шумпоттэ. 

— Мае тон ужад валтӥсен лыдъяськод?

— Ужлэн самой валтӥсез — дыраз нырысетӥ юрттэт сётыны быгатон. Сазь йырын кутскиськод ке ужед борды, соку пациентъёс пӧлын но тыныд оскон йылэ, гажан но будэ. Калыклэн мынам уже, тыршеме шоры мыло-кыдо учкемез туж дуно, со мылкыдэз но ӝутэ. Соос тыныд физической висёнзэ гинэ уг оско, лулпушсэс но усьто, соосты туж сак кылзоно но шонер кенеш сётоно.

— Сыӵе кылкутӥсь уж семья улонад ассэ уг шӧдӥськыты-а но кызьы ортчо шутэтскон нуналъёсыд?

— Семья — со юн сылӥсь юбо кадь. Семьяын ваньзы таза ке, ужын но ваньмыз лад-лад мынэ. Ужысь вормонъёс — со семья пушкын дэлето улонлэн бервылъёсыз. Семья юрттэ гинэ, уг люкеты, могӟет уг кылдыты. Нош шутэтскон нуналъёс сярысь верано ке, со вань меда адямилэн туннэ нуналэ? (серекъя). Вань дырме кузпалэлы но нылпиослы кузьманы тыршисько. Соос пичиесь на, вань тунсыко вакытъёссэ тодам кельтэме потэ. 

— Тунсыко юан но кылдэ: таӵе кылкутӥсь ӧнерчилэн урод сямъёсыз луыны быгато-а?

— Малпасько, зэмос эмчи — со ӟеч сямъёслэн примерез. Соин урод сямъёс луыны кулэ ӧвӧл. Мынам соос дышетскыкум но ӧй вал, али но тыршисько калыклы но матысьёслы ӟеч сямъёсты гинэ пыӵатыны.

— Али школаосын выпускникъёс азьлань сюрессэс быръён этапын сыло, аслэсьтыд ӧнердэ соослы ӵектысалыд-а?

— Одно ик, медицина удысэз ӵектӥсько. Адямиослы юрттон — со ӟечлык, нош ӟечлык котьку берытске. Та ӧнер туж кулэ луись удыс. Туннэ нуналэ сомында луонлыкъёс, уждунэз но кельшымон. Самой валтӥсез — со юрттэм адямиослэн пумтэм таукаронъёссы, пушкад ваньмыз сяськаяське кадь соку.

— Бадӟым тау, Лариса, вераськемед понна. Азьланяз но ужъёсад азинлык, семьяяд шудбур, матысьёсыдлы тазалык сӥзиськом! 

Гажано, медицина удысын ужась ӧнерчиос! Туннэ нуналэ тӥляд ужды вань калык понна кулэ луись, пайдаё но воштыны луонтэм! Тӥляд киосады — адямилэн тазалыкез но улонэз, быдэс семьялэн шудбурез, тӥ сое валаськоды но нуналысь нуналэ тыршыса быдэстӥськоды асьтэлэсь быръем уждэс! Тӥляд ужды — быдэс шаермылэн азьпал ӟечлыкез! Сӥзиськом тӥледлы котьку умоезлы оскыны, вань висёнъёс, шуг-секытъёс но могӟетъёс палэнтӥды мед ортчозы. Вӧзады котьку мед луозы валась, юрттӥсь но яратӥсь адямиосты. Улонысь вань небыт но шуныт тӧлъёс мед валтозы тӥледыз азьлань!