Ӟеч лу, нылпи сад! (+фоторепортаж)

Ольга Плотникова, 2 июнь 2021 - 17:21

1793

Покчи Лӧзя нылпи садын но школае дасяськись пиналъёс понна сӥё-дано ужрад ортчиз.

Туэ куартолэзьлэн пумаз ёросысь вань нылпи садъёсын школае мынӥсь пиналъёс понна выпускной балъёс ортчизы. 28 куартолэзе сыӵе сӥё-дано но огдыре ик мӧзмыт мылкыдэн тырмем ужрад ортчиз Покчи Лӧзя нылпи садын но.

«Выпускной» шуыку котькудмылэн син азямы пуксё, луоз, чебер дӥсяськем нылъёс но пиос, анай-атайёс, визьнодасьёс; пельтэм шаръёсын, сяськаосын чеберъям зал, мылкыдэз бугыртӥсь кылбуръёс, кырӟанъёс но, конечно, вальс. Покчи Лӧзя нылпи садын но пиналъёс чебер кырӟанъёсын но кылбуръёсын, шулдыр эктонъёсын анай-атайёссэс шумпоттӥзы. Ужрадэз шулдыртӥзы визьнодасьёсын дасям тунсыко конкурсъёс но шудонъёс. Нош выжыкылысь вуэм куноос — Кощей, Баба-Яга, Карлсон но Тол бабай — шулдыр мылкыдэз эшшо но пуромытӥзы. Та нуналэ нылпи садэн люкиськись пиналъёслы трос ӟеч кылъёс веразы визьнодасьёссы Евгения Лебедева но Екатерина Евдокимова, нылпи садлэн кивалтӥсез Люция Султанова, «агайёссэс» но «апайёссэс» ӟечкыланы вуылӥзы покчи группаысь пиналъёс но. Серемес выступлениен асьсэ нылпи дыразы вуттӥзы но шуныт сӥзёнъёссэс веразы анай-атайёс. Озьы ик вуоно школьникъёсын тодматскыны но нылпи садэз йылпумъяменызы ӟечкыланы вуылӥз Покчи Лӧзя шоръёзо школалэн директорез Эмиль Гарипов но, ӟеч мылкыд каронъёссэ вераз вуоно дышетӥсьсы Ирина Накипова.

Азинтӥськиз праздник чебер инкуазь сэрегын. Пиналъёс отын но мыло-кыдо шулдыръяськизы. Нылпи садысь крезьгуръя кивалтӥсь Рамзия Васильева соосын пӧртэм шудонъёс, вожвылъяськонъёс ортчытӥз. Куд-ог анай-атайёс но со шудонъёсы шумпотыса пыриськизы. Тае адӟыса, нылпиослэн мылкыдзы эшшо но ӝутскиз. Огъя вераса, праздник пӧрмиз, туж умой пӧрмиз!