Егоровъёслэн выжызы вормисе потӥз

Ужрадэ пыриськизы Салаусь гуртысь Ханнановъёслэн, Янгулысь Гилязевъёслэн, Нуринерысь Тляковъёслэн семьяоссы но Покчи Лӧзя гурт поселениысь кӧня ке семьяосты огазеясь Егоровъёслэн династизы.
Конкурсантъёс песянай-песятайёссылэсь кылем вашкала рецептъёссыя дасям йӧскалык сиён-юонъёссэс, киужъёссэс, синпелет луыса утиськись но выжыысен выжые сётӥськись вашкала арбериоссэс ӵектӥзы. Озьы ик сцена вылын асьсэ семьяосынызы, выжы писпуосынызы тодматӥзы.
Вань куронъёсты но выступлениосты лыдэ басьтыса, жюри вормисьёсты бырйиз. Озьы «Эхо веков в истории семьи - Тарихта без эзлебез» нимо элькун фестивальлэн муниципал этапезлэн вормисез Покчи Лӧзя гурт поселениысь Егоровъёслэн выжызы луиз. Сюлмысь ӟечкыласьком соосты! Табере соос Балтась ёрослэсь данзэ зона этапын утёзы. Азинсконъёс сӥзёмы соослы.
Кыкетӥ интыын — Нуринер гурт поселениысь Тляковъёслэн семьязы, Янгулысь Гилязевъёс куинетӥ луизы, Салаусьысь Ханнановъёс ньылетӥ интыен пусйиськизы.
Тодады вайытӥськом, «Эхо веков в истории семьи - Тарихта без эзлебез» элькун фестивалез арлы быдэ Татарстан Республикаысь Архив ужъя кун комитет ортчытэ. Ужрад элькунамы семья но ӵыжы-выжы кусыпъёсты юнматон, вордскем шаермылэсь историзэ эскерон, семья традициосты утён но азинтон ужпумен ортчытӥське. Радъяське со куинь этапен: муниципал, зона но элькун.