Советской вакытысь отрядъёс нош ик визьноданэ берытско?

Солэн ужпумез — нылпиослэсь социальной активностьсэс азинтон. Ӵектос покчи классъёсын дышетскись пиналъёслэсь ас калыксэс но шаерзэс яратӥсь гражданъёсты визьноданлы, котькуд нылпилэсь быгатонлыкъёссэ но устолыксэ шараянлы, азинскон понна шуныт эшлыко кусыпъёсты кылдытонлы чакламын. 

Советской Союз вакытысь дышетон сӧзнэт дышетскисьёс вылэ тросгес пыкъяськемын вал, практика вылын зэмос улонын уже кутӥськись быгатонлыкъёсты дышетӥзы, ӟечезлы кыскизы но азьпал улонлы дасязы. Та вакытысь пиналъёс туж умой тодо, кинъёс со октябрятаос, пионеръёс но комсомолъёс — ваньзы соос СССР-ысь школаосын тодон-валан басьтон но быдэ вуон сюресъёсты ортчизы. 

Котькуд советской дышетскись понна октябрёнок, пионер яке комсомол луон — туж кылкутымон вамыш вал. Октябрёноке пырто вал 7-9 аресъем пиналъёсты, пионере — 10-14 арлыдъем пиналъёс пырыны быгатӥзы, нош комсомолэ — 14 аресысен.

Советской вакытэ дышетскемъёслэсь та дыръёс сярысь юад ке, валамон луэ: котькудӥз этап туж тунсыко но кылкутымон вал. Отрядэ пырем пинал ассэ умой паласен гинэ возьматыны тыршиз, янгыш лэсьтэмез соку ик шараяськылӥз, пӧртэм йыртэманъёсты лэсьтӥсьёсты отрядъёсысь куштылӥзы. Со нылпи понна возьытэ усён вакыт луэ вал. Соин котькудӥз данъяськыса сётэм «нимзэ» нуллыны тыршиз, ӟеч ужъёсын, сямъёсын кунлэн зэмос патриотэз луыса будӥз. Советской вакытысь адямиос соин ик ужез мылысь-кыдысь быдэстэменызы, юрттӥсь луэменызы висъясько. 

Но Советской Союз быремен, отрядъёс но «кысӥзы». Озьыен, дышетскон сӧзнэтын но трос воштӥськонъёс ортчизы. 

Нош мар со «Орлята России»? Огъя вераса, сое советской дырысь октябрята отрядэн ӵошатыны луэ, дыр. Советской Социалистической Республикаослэн Союззы (СССР) бырем бере 30 арлэсь трос дыр ортчиз ини. Дышетонын табере мукет «Октябрятаос» кылдӥзы. 

Выль ӵектос покчи классъёсысь дышетскисьёс понна кылдытэмын. Соос — кунмылэн азьланез, соин ик патриотизм мылкыд пыӵатон но нылпиосты котькуд ужрадъёсы мыло-кыдо пыриськисен будэтон — выль кужымен ӧръяськись ӵектослэн валтӥсь ужпумъёсыз. Озьы ик со шор но бадӟым классъёсысь нылпиосты, дышетӥсьёсты, анай-атайёсты огазе люка но ог-огзэс валаса ужаны дэмла. 

«Орлята России» — со нылпиос, кудъёсыз пӧртэм пумо тодон-валанъёсы кыстӥсько, спортын вормонъёсы вутско, пӧртэм удысъёсын эскеронъёс лэсьто, но самой валтӥсез — со адямиос, кудъёсыз азьланяз шаермы понна выльзэ, умойзэ, чеберзэ лэсьтозы но котырысь дуннеез югдытозы, улонэ выль амалъёс пыртозы.

Туннэ нуналэ «Орлята России» ӵектослэн интернет вотэсын вань аслаз официальной мерлыко бамез, отын тӥ тодматскыны быгатоды отрядлэн катъёсыныз но традициосыныз, соос аспӧртэмлыко луо, куд-огъёссэ лыдӟыса тросэз Советской вакытысь индылонъёсын валлингожъёсты (параллельёсты) но шедьтозы, оло.

Озьы ик ӵектос нимаз люкетъёслы (трекъёслы) люкиське на:
— Орлёнок-Лидер;
— Орлёнок-Эрудит;
— Орлёнок-Мастер;
— Орлёнок-Доброволец;
— Орлёнок-Спортсмен;
— Орлёнок-Эколог;
— Орлёнок-Хранитель исторической памяти.

Та трекъёс пыр ортчыны кулэ вань покчи классъёсысь нылпиос. Татын соос тодматскозы асмылкыдчиослэн (волонтёръёслэн) уженызы, ӟеч ужъёс пыр улоназы пайдаё быгатонлыкъёссэс но выжтыны быгатозы.

Ӵектослэн аслаз нимысьтыз гадьпусэз но вань, асьме элькунлэн кивалтэтэз та борды эшшо аслэсьтыз гадьпуссэ (Барсик — Татарстанысь «Движение Первых» огазеяськонлэн символэз) ватсаз, нош визьнодасьёслы — отрядлэн валатонъёсыныз галстук. 

Нылпи понна та сюресын югдытӥсь луэ дышетӥсез. Визьнодась — со адями, кудӥз нылпиез шонер сюрестӥ валтэ но мынон кузяз воштонтэм юрттэт сётӥсь луэ. Солэн шуныт сюлэмез но «ӝуась» синъёсыз нылпиослы умойгес луыны юртто.
Малы нимысьтыз та ӵектос покчи классъёс понна кылдытэмын вал? Та юанлы валэктон туж капчи: пинал дыре пиналъёслэн йыръёсазы духовно-нравственной тодон-валанъёсты пыӵатыны капчигес на. Та дыре ик пиналъёс дышетско ог-огенызы, дышетӥсьёсынызы кусып возьыны, шудыны, асьсэлэсь малпанъёссэс шараяны. Соин ӵектослэн валтӥсь малпанэз — нылпилэн огъя творческой ужез быдэстыса азинскемез. 

Шор но бадӟым классъёсысь дышетскисьёс но палэнэ уз кыле. Та ӵектосын соос визьнодась инлыке (статусэ) пуктэмын луозы, дышетӥсьёсын но анай-атайёсын одӥг радэ. 

Бадӟым классъёсысь визьнодась — со «ӧрӟиослэн» бадӟым эшсы но дышетӥсьлэн зэмос юрттӥсез. Соин со адӟем карымон дышетскись луыны кулэ. Со ик покчи классъёсысь нылпиослы аслаз примерез вылын возьматэ ӟеч ужъёссэ, тунсыко ужрадъёсы кыске, сьӧраз валтэ, тодон-валанъёссэ сётэ, шуг-секытъёсты вормыны юрттэ, вылаз пӧртэм пумо ужъёсты басьтыны но юрттэт сётыны котьку дась.

10 шуркынмонэ асьме ёросамы но ужрад бадӟым масштабен ортчиз. Котькуд школаын покчи классъёсысь пиналъёсты «ӧрӟиос» радэ пыртӥзы. Табере визьнодасьёслы эшшо одӥг бадӟым уж оскемын — нимысьтыз кылдытэм программая нылпиосты дышетон. 
Валамон ни, дышетон сӧзнэтын ӵектосэн валче пырем воштӥськонъёс вакчи дыр куспын улонэ уз пыӵалэ. Но осконъёс кылдо, ӵектосэз кылдытӥсьёслэн та уж борды рос-прос басьтӥськемзы, нимысьтыз дышетэм адямиослэн мылысь-кыдысь пыриськемзы бадӟым воштӥськонъёсы вутскыны юрттозы но нылпиослэн будон сюресазы выль амалъёс пыртыса, азьланяз шаермылэн зэмос кунмуртъёсыз будозы шуыса!