«Фельдшер — со специалист высшего класса»

Озьы со монэ вераськыны кутскеменымы валче фельдшерлэн ӧнереныз тодматыны кутскиз.

Данилова Тамара Кузьминична — кема аръёс ӵоже ассэ медицина удыслы сӥзьыса ужам нылкышно. Улон сюресэз сое гуртысь городэ, городысь выльысь гуртэ вуттэ. Туннэ нуналэ со дано шутэтсконын, аслаз вордскем гуртаз, Кӧргемын, кузпалэныз Юрий Константиновичен улэ. Но ваньмыз сярысь радызъя.

Егит Тамара, школазэ йылпумъям бере, Можгаысь медициная училищеын дышетске (1977-1979-тӥ аръёс). Дышетсконзэ йылпумъямез бере ик Ижевскысь городской больницаын участковой медсестра луыса ужаны кутске. «Ижевскын кема ӧй ужа, 1982-тӥ арын картлы кошки но аслам вордскем гуртам ик бертӥ. Нырысь Улисьялын ужай (1982-1986-тӥ аръёс), нош собере ини Кӧргемын но уж сюриз — гуртэ фельдшер луыса интыяськи». Мазэ гинэ адӟоно луымтэ Тамарапайлы: Улисьялын ужакуз нуналлы быдэ пыдын ветлыны тупам (азьвыл туала дыре кадь машинаос луымтэзы ук), гужем велосипедэн, толалтэ куасэн но ветлылэм ужаны. Но озьы ке но, трос аръёс ассэ медицина удыслы сӥзьыса ужам нылкышно аслаз ужез сярысь ӝожтӥськыса одӥг кыл но ӧз вера. Нылкышно ваньзэ чида шуыса юнме уг верало, дыр, ни. Ас дыраз Тамарапайлы тупам ваньзэ аслыз ужаны: лымызэ но сузяны, вузэ но вайыны... Вазь ӵукна ик лыктыса яке ӝыт кыльыса шприцъёсты быректыса стерилизовать кароно но луэм (соку одноразовой шприцъёс луымтэзы ук). Жадемдэ адямилы возьматытэк, соосын каньыл гинэ вераськыса но ужано али нунал ӵоже.

— Озьы, зэмзэ но, — шуэ ачиз та кылъёс сярысь Тамара Кузьминична, — соин но фельдшер — со специалист высшего класса (оло, серекъяса, оло, зэм вераз — Н. Ж.). — Милемлы ведь асьмелы ик перевязказэ но карыны быгатоно, диагнозъёсты но шонер пуктылоно. Али ярам хоть интернетэн пайдаяськыны быгато егитъёс, ми дыръя сыӵе макеос воксё ӧй вал ук. Азьло ведь гуртын нылпиос но трос луыло вал — котькудзэ учконо, котькудзэ утёно. Луылоз вал, ветлӥськод ӵукнаысен ӝытозь гурт кузя коркаысен коркае, бадӟым сумкаез сьӧрад нуллыса. Санитарка но нырысь ужаны кутскем бере гинэ вань вал, собере ӧз ни луы. Яра али кузпалы, Юрий, ваньмыз ласянь юрттӥз мыным — уж дорам но монэным ӵош ветлӥз, пиосмурт ужъёсты ачиз ужаз. Солы пумтэм тау карисько, — шуэ Тамарапай.

Кузпалэзлы гинэ ӧвӧл, анайзыен атайзыезлы но тау каре нылкышно. Ужаса бертыкуз ваньмыз, пе, дась вал ни — юртэз но утялтэмын, сиёнэз но ӝӧк вылын.

2002-тӥ арысен Тамарапай ӝыны ставкаен гинэ ужаны кутскем, но озьы ке но трос ужаны тупам солы — куризы бере, адямиослы юрттытэк уг луы ук, лекарствозэ но аслыз адямиослы ваёно луэм. Соин но вань улонзэ адямиосты утёнлы сӥзем нылкышно пенсие потэм бераз ужезлэсь туж мӧзмем. «Ветлӥ медпунктэ мӧзмыса, ма али но куддыръя ветлӥсько, — уг ваты нылкышно. — Кулэ луыкуз кенеш но сётӥсько, отчётъёс ужаны но юрттӥсько медсестралы. Ма бен, мыным секыт ӧвӧл ук, — шуэ со.

— Мар шуид ке но, азьло дыре секытгес луэм, дыр, ужаны медицина удысын... Ма, медицина удысын гинэ ӧвӧл. Ваньзэ асьтэлы кароно тупам  — выжзэ но миськыны, адямиез но эмъяны..., — шуисько.

— Пӧртэм дыръёс луылӥзы. Секытэз но, капчиез но. Азьло, зэмзэ но, секытгес луэм, дыр — кулэ луись оборудованиез но ӧвӧл, ужаны адямиез но уг тырмы. Но туала дыре документация ласянь мамында ужъёс... Весь гожъяськоно фельдшеръёслы... Документъёс, документъёс, документъёс. Ми дыръя сыӵе ӧй вал. Но тани транспорт ласянь проблемаос луылӥзы. Агае трос пол юрттӥз, секыто нылкышноосты срочно больницае нуыны кулэ дыръя. Сыӵе секыт вакытъёс луылӥзы ке но, ма шуид ке но, уг жаляськы та ӧнерез быръемелы, — шуэ Тамарапай.

Но одӥгез сюлэмшугъяськытэ Тамарапаез: туала дыре егитъёслэн туж ик гуртэ бертэмзы но кылемзы уг поты. Кӧргем — пичи гурт, отын адямиез но ӧжыт, школазы но ӧвӧл ни. Медпункт ке но вань али шуыса шумпотэ Тамарапай. Егит пиослы но, пе, верасько ни, медицинской тодон-валан басьтэм кышно кудзы ке но гуртэ мед ваёзы шуыса.

Гуртэз сярысь сюлмаськись нылкышнолэн кылъёсыз огласянь серем но потӥзы, мукет ласянь, малпаськонэ уськытӥзы. Сыӵе пичи гуртъёс туала дыре трос ук — егитъёс гуртэ бертыны уг дырто.

Нош Тамарапай уродэз сярысь уг малпаськы. Малпаськыны дырыз но ӧвӧл — сяськаосты туж яратэ со. Корказ но, бакчаяз но, гидкуазяз но солэн сяськаос будо. «Соос монэ буйгато, — шуэ Тамарапай, — буйгато но улонлэсь чеберлыксэ адӟыны юртто. Пенсие потӥ ини, ужлэсь куштӥськи шуыса мӧзмыса уг пукиськы мон, толалтэ куасэн ветлӥсько, гужем — велосипедэн. Художественной самодеятельностен но выриськомы эшеным Полина Поликарповаен. Кырӟаськом, эктӥськом... Тани асьмелы удмурт дэремъёс но вурытӥмы али, Семыке со дӥськутъёсты дӥсяса потӥмы — ма бен, сандыкын возёд-а ма сое», — шуэ нылкышно. — Вот озьы ик улӥськомы, созэ-тазэ карыса, вырон — со улон ведь. Улонэз тунсыко ортчытыны кулэ, жаляно медаз луы собере шуыса.

Тамара Кузьминична сюлмысь улонэз яратэ. Матысь адямиосызлы, ӵош ужам эшъёсызлы бадӟым тау каре но соосты праздникен ӟечкыла. «Вань коллегаосме ӟечкыласько та праздникен — медицина удысын ужасьёслэн нуналэнызы. Нимаз висъяса ӟечкыламе потэ Данилова Надежда Ивановнаез. Ачиз Киськемын улыса, Надяпай кема аръёс ӵоже Сырьяын фельдшер-акушер пунктын ужаз. Со мынам наставнике вал, тросэзлы Надяпай монэ дышетӥз, со понна бадӟым тау солы. Ваньзылы тау но ваньзылы юн тазалык, семья улоназы шудбур, нылпиоссылэн но внукъёссылэн шудзылы шумпотыса улыны мед кылдоз, — шуиз Тамарапай.

Тамарапай, асьтэлы но ваньзэ умойзэ гинэ сӥзиськом, улонын кема аръёс ӵоже шудо улыны мед кылдоз.