Пӧртэм ужпумъёсты эскеризы

Сӥземын вал со Кузебай Гердлэн но Ашальчи Окилэн вордскемзы дырысен 125 ар тырмон юбилейёслы но тодмо критиклы но литература тодосчилы Зоя Богомоловалы 100 ар тырмонлы. Тодосъя ужрадын оглом 7 ӧръёсъя секциос ужаллям, соос эшшо нимаз секциослы люкиськиллям. Озьы ик конференция улсын котырес ӝӧк, научно-практической семинар но егитъёслэн симпозиумзы радъяськем.
Туж пӧртэм юанъёсты ӝутӥллям ортчем конференциын. Йӧскалык литературоведениысь лэчыт ужпумъёс, калыккылослэн но литературалэн вачекусыпъяськоназы шуг-секытъёс, Россиысь калыкъёслэн фольклорзылэн историзы но туала дыре улэмзы, кылысь кылэ берыктонысь шуг-секытъёс, Россиысь школаосын анай кылъёсты, литератураосты но лулчеберетъёсты дышетонысь традициос но выль амалъёс но мукет ужпумъёс сярысь вераськемын вал та ужрадын.
Конференцие вуылӥзы асьме аспалъёсмы но — Покчи Лӧзя шоръёзо школаысь удмурт кылъя но литературая дышетӥсьёс Наталия Антонова но Ольга Пчельникова. Соос югдытӥсьёслэн выжыысьтызы потэм дышетӥсьёслы но туала дышетонысь шуг-секытъёслы сӥзем подсекцилэн ужаз пыриськизы. Люкаськемъёсты валче дасям уженызы — удмурт югдытӥсьлэн, писательлэн Григорий Медведевлэн выжы писпуэныз — тодматӥзы.
«Григорий Медведевлэсь родословнойзэ кемалась эскереммы потэ вал ини. Куке но ӵыжы-выжыез Ципья шоръёзо школаысь дышетӥсь Нелли Ивановна Понуркина «Азьлане» газетэ поттэм вал сое схемаен, но милям сое мургес эскереммы потӥз, уката просветительёслы сӥзем научно-практической конференция луоноез тодыса, одно ик пыриськеммы потӥз. Туж шумпотӥсько, писательлэн правнучкаеныз Варламова Маринаен кусып тупатэммылы, асьсэ сярысь туж тунсыко материал лэзиз со мыным, ваньзы сярысь тупен-тупен мадиз. Туэ ар Дышетӥсьлэн арезлы сӥземын бере, нимысьтыз та профессиен герӟаськем ӵыжы-выжыоссэс эскерим. Азьланяз но та ужез азинтыны малпаськом. Ӝоген внукеныз Павелэн но кусып радъялом, электрон почтазэ келяз ини», — быдэстэм но быдэстоно ужъёссы сярысь вера Наталия Львовна.

Фото: Наталия Антонова