«Коррупция — со сыномон. Кызьы кортэз сыномон быдтэ, озьы ик коррупция куашкатэ кун аппаратэз но сие калык пӧллэсь визь юнлыксэ»

Капчи улэ сыӵе адями, кудӥз ачиз асэныз тупаса улыны тырше. Учконо ӧвӧл адямиослэсь, кудъёсыз ваньзэ асьсэ сямен гинэ каро, кудъёсыз «капчи» коньдон сьӧры уйисько.  Куке но та ваньмыз адямиез возьдаськытэ. Ӵем дыръя соос умойтэм сямо луо, пуш дуннеязы ожмаськон мынэ. Одӥг пал дурысен возьдаськытэ, мукетыз — нош но нош куре.  Жаляса верано луэ, ваньмыз та, туала улонлэн радлыкез, адямиез ассэ гинэ яратӥсь каре, алдаськыны дышетэ, умойтэм ужъёс лэсьтытэ но узырлык сьӧры уйиськытэ. Коррупция, рыночной экономика воштӥзы дунне шоры учконэз. Ӧвӧл ини туала улонын огкадь ваньбурен улӥсь адямиос.

Мар бен со сыӵе коррупция? Мынам малпамея, коррупция — со ку одӥг адями аслэсьтыз шуг-секытъёссэ уксё тырыса, кузьмаськыса быдэстэ, нош мукетыз со уксёен яке кузьымен узырме. Кыллюкамысь учкимы ке, коррупция латин кылысь вуэм кыл, кивалтӥсьёс пӧлын кузьмаськон учыръёс, законэз тӥяса узырмыны турттон. Мукет кылын вераса, коррупция — со сётъяськон: «тон — мыным, мон — тыныд».

Туала дырын уксё но коррупция туж вылӥын сыло. Малы меда милям но шаерын, кудзэ ми яратӥськомы, туж уно сыӵе учыръёс? Мон малпасько, валэктон сыӵе: али нырысетӥ интые потэ уксё, нош пуш дуннелэн узырлыкез дунзэ ыштэ. Шонерзэ верано ке, адямиос тазьы малпало: кинлэн уксёез трос, солэн ваньмыз но луоз. Нош озьы уг луы. Коньдонэн уд басьты самой дунозэ: яратонэз, тазалыкез, семьяез. Тросэз сое уг валало. Соин ик коррупция адямиен кивалтэ.  Улонын ми валаськомы, кызьы уродэз ворме умойзэ.

Адямиослэн улоназы коррупция бадӟым инты басьтэ ини, уноез «кузьымъёстэк» вуоно дырез уг но адӟы. Та туж бадӟым сюлэмшугъяськон, кудзэ выжыысеныз быдтыны кулэ. Уноез уксёен престижной интые дышетскыны пыре, армилэсь пегӟе, ужаны пыре, конкурсъёсын, олимпиадаосын ворме. Соосын артэ пумисько сыӵе адямиос, кудъёсызлэн коррупция сярысь кылэмзы но уг поты. Уло соос пӧяськытэк, асьсэлэн ужаменызы гинэ. Ваньмызлы валаны кулэ ни, кыӵе со кышкыт кыл — «коррупция». Со адямилэсь йырсазьзэ воштэ, адями нош малпаны кутске, та дунненын ваньмыз уксё котырын берга шуыса. Озьы ик вераны кулэ, чиновникъёслы уксё сётыку, адями ачиз возьматэ: солы «озьы но яра». Басьтӥсез дыше уксёлы, ваньмызлэсь но курыны кутске. Со уг малпа, вань-а сётӥсезлэн уксёез, кытысь со сое шедьтэ но кытчы сыӵе сюрес вуттыны быгатэ котькуд адямиез, кызьы со сое воштэ умойтэм пала.

Кылем арын но туэ пандемия коррупцияез эшшо но вӧлмытӥз. Отын но татын, интернетын кылыны луэ, кызьы эмъяськонни интыосын ужасьёс уксёен прививка пуктэм шуыса сертификат вузало. Прививка пуктэмзы потытэк, ужасьёс сое уксёен басьто, малы ке шуоно ужан интызэ ыштэмзы уг поты. Егитъёс валаны кулэ, улонын ваньмыз ас кужымен гинэ сётӥське шуыса, сётон-басьтонлы оскытэк. Азинлыко кивалтӥсь уг малпа витетӥ машина сярысь, малпа  ужан удысэзлэн ӝутскемез сярысь. Ведь солы умой, куке солэн ужасьёсыз умой уждун басьто, умой луонлыкъёсын ужало. Жаляса верано, вань кивалтӥсьёс сыӵеесь уг луо, сое уг валало.

Сётон-басьтонэн нюръяськон понна, луоз ортчытъяны пӧртэм митингъёс но собраниос. Сыӵе ужрадъёс юрттысалзы вылэм интыысь кивалтэтъёслы но нимаз адямилы та сьӧд ужен нюръяськыны. Таӵе ужрадъёслэн нимынызы вылӥ кивалтэтэ луоз лэзьыны  калыклэсь ӝожъёссэс, кудъёсыныз соос улонын пумисько. Бӧрысь эскерозы, кыӵе ужрадъёс кутӥськозы со куриськонзыя. Дышетоно адямиосты кышкатэк полицие но асьмемыз возьмась органъёсы куриськонъёс сётыны. Вотэсын кылдытоно вылэм сыӵе сайт, кытчы гожтыны луысал вылэм ӝожтӥськонъёссэс но соосын луэм учыръёссы сярысь.

Зэмос улонын коньдон ваньзэ лэсьтэ. Калыкын верало: адямилэн шудэз коньдон бордын ӧвӧл. Нош улонын воксё мукет сямен луэ. Туэ гужем мон анаелэсь но мукет Элькунысь школаын ужась дышетӥсьлэсь вераськемзэс кылӥ. Соос вераськизы, школаез йылпумъясь куд-ог егитъёслы умой дышетскемзы понна медаль сётӥзы эмъясьёслэн, вылӥ кивалтэтын ужасьёслэн нылпиоссы луэм понна гинэ шуыса. Та нылпиос асьсэлэсь тодонлыксэс ЕГЭ-ын ӧз юнматэ. Со понна сыӵе дышетскисьёс медален кошкизы.

Мынам бадӟымез апае туэ вылӥ дышетсконние пыриз.  Куке гужем со абитуриентъёслэсь списоксэс эскериз, паймемзэ ӧз ваты: кудъёсыз 280-290 балл люкаллям, соослэн медальёссы ӧвӧл, нош кудъёсызлэн 220-230 баллъёс — соос медальёсын. Со понна соослы 5 балл ватсаса сётӥське на. Выльысь тодам лыктэ анаелэн дышетӥсен вераськемзы. Со коррупция ӧвӧл шат? Вылӥ кивалтэт кытчы учке? Яке адӟемзы уг поты? Озьы, мон сямен, капчигес. Азьланяз но озьы луоз ке, пиналъёсыз дышетозы, калыкез эмъялозы «кыклы» дышетскем адямиос, кудъёсыз коньдонэн диплом басьтӥзы. Нош сюрес вылэ машинаосын потозы взяткаен удостоверение басьтэм адямиос. Кышкыт!

Взятка басьтӥсьёсын нюръяськон туж секыт, но кулэ уж. Нош ик таӵе ужъёс лэсьтӥзы ке, законэз тодыса но, адями шугадӟонэ сюроз.

Мон оскисько, та кылъёсме кин ке но кылоз шуыса. Мон ачим но малпасько дышетӥсь луыны, умой дышетскисько. Азьланяз пиналъёслы валэктыны малпасько, мар со сыӵе «взятка». Кызьы со «сьӧдкыль» адямилы урод ужъёс лэсьтэ. Адями аслаз даураз шулдыр улонэн будыны кулэ, озьы ик аслэсьтыз азьлапал улонзэ, шудзэ утчаны кулэ! Со адями эрико луыны кулэ.

Луысал ке мон кивалтӥсь яке азьмурт, мон дасясал сыӵе кат, кудӥзъя школаосын луысал нимысьтыз предметъёс, кудъёссэ нуысалзы прокурор яке полициын ужась инспектор. Покчи классъёсысен кутскыса ик соос валэктысалзы взяткалэсь алама уж луэмзэ. Мультипликаторъёс но мед дасясалзы асьсэлэсь ужъёссэс, кудъёсаз яркыт возьматэмын взяточничестволэн бервылъёсыз. Чиновникъёс но мед валалозы, капчиен поттэм уксёлэн шӧмыз ческыт, нош улэм-вылэмъя со пӧрме курыт синкылилы.

Озьыен, мон быгатӥсько шуыны, коррупция вал, вань, но медаз луы шуыса, ваньмы огъя кулэ нюръяськыны. Будӥсь пиналъёс мед быгатозы шара вераны: «Коррупцилы — ӧвöл!»

Дарья Артемьева, Покчи Лӧзя школаысь 9-тӥ классысь дышетскись.

Фото: pixabay.com/ru