Кӧргемын синпелет

Соин валче гуртамы парк лэсьтон, ожгарчиослы синпелет пуктон тужгес но дуно потэ. Самообложение амалэн люкам уксёен, гурт калыкен кенешыса, азьвыл школа бакча интые парк кылдытоно каримы. Вож калаен котыртыса, узоро сяськаос но понӥзы, туж чебер луиз, урамлэсь вылтуссэ ик воштӥз. Шор вадесаз, урам пала синпелет пуктӥзы. Отчы гожтэмын ожын быремъёслэн но, ожысь вормонэн бертэмъёслэн но нимтулъёссы. Со списокез учкыса, оже кошкем бабайёсмы выльысь гуртазы берытскыса бертӥзы кадь потэ, сюлэм ӝож луэ. Городысь бертэм куноос но со доры султыса туспуктэме усё. Кыкетӥ арзэ ини Вормон нуналэ митинг ортчытӥськом, районысен но лыкто. Кырӟаськом, кылбур лыдӟиськом, венокъёс понӥськом.

Али гуртмы пичи кылиз ини. Соку бадӟым луэм — 57 хозяйство. Воргоронъёс ожмаськонэ кошкиллям, соос пӧлысь кӧнякеез гинэ улэпен дораз бертэм. Сӧсырмыса бертэмъёсыз кӧняез доразы кулӥллям. Соин ик оже быремъёсыз но, вормыса бертэмъёсыз но милемлы, туала поколениослы, туж дуно но матын. Соосыз ноку но ум вунэтэ, ми бере кылем поколениос но медаз вунэтэ. Соин ик та синпелетэз пуктон тужгес важной луэ, вунэтонтэм вылысь.

Гуртысь вань калыклы, кинъёс кужымзэс понӥзы: сваркаен ужазы, машинаен, тракторен юрттӥзы — ваньзылы бадӟым тау кареммес вуттӥськом.

Кӧргем гурт калык