Куинь апайёс – гурт удысын ужась усточиос

Гурт удысын кема аръёс ӵоже но азинлыко ужась семьяосмы ёросамы ӧжыт ӧвӧл. Та статьяелэн геройёсыз — Вукогуртын вордскем но будэм куинь апай-сузэръёс Елена Никитина, Римма Кузнецова но Ирина Филиппова. Соос Вукогуртысь тужгес гажамон кузпалъёслэн, Любовь но Павел Фёдоровъёслэн, нылъёссы.

Куать нылпиоссэс но Фёдоровъёс пичи дырысенызы ужлы яратон пыӵатыса будэтыны быгатӥзы.

Любовь Ивановна гумырез ӵоже «Труд» колхозын скал кыскись луыса ужаз, нош кузпалэз Павел Трофимович — пудо утись, берлогес кочегар луыса тыршиз. Туннэ нуналэ, анай-атайзылэсь ужзэс азьланьтыса, улонзэс гурт удыслы сӥзьыса соослэн куинь нылъёссы ужало, Леонид пизы но «Трудын» механизатор луыса тырше.

Елена Никитина: «Пудоен, адямиен сярысь, ужаны капчигес»

«Труд» колхозын ини 25 ар ӵоже тыршыса но мыло-кыдо ужась Елена Павловналэн та кылъёсызлы паймыны кулэ ӧвӧл. Малы ке шуоно та верам кылъёсыз адямиосты уг яраты яке соосын огъя кыл шедьтыны уг быгаты шуэмез уг валэкто. Матын тодӥсьёс Лена апаез сое лякыт, каньыл кышномуртэн тодо. Со озьы ик вань.

Котькуд ӵукнаез Елена Павловналэн огкадь кутске. 52 утялтоно скалъёсыныз ӟечъяськыса, со пудоосызлэсь югдурзэс, мылкыдзэс эскере, небыт кылъёссэ вераны но уг вунэты. Нош быжо подопечнойёсыз, шораз бӧксыса, яратэмзэс возьмато.

— Скалъёс — туж визьмо пудоос. Куддыръя соослы визьнодан амалэн чурытгес вазьыны тупа ке но, мон соосты туж яратӥсько. Кемалась ӧвӧл одӥг скалме ышан улэмысьтыз ӧжыт шукки но вӧзаз сылӥсь эшез монэ но мед шуккоз-а! Визьтэм шуы собере пудоез.., — маде Елена Павловна. 

Пудоен кызьы ассэ возьыны, кызьы соосын ужаны кышномурт туж умой тодэ. Пичи дырысен фермаын ужаса будэмысьтыз, школа бере кытчы ужаны мыноно шуэм юан со азьын воксё кылдымтэ: одно ик анаезлэсь ужзэ азьланьтоно шуыса малпам. Со пичи дырысеныз ик тодыса будэм: гуртысь адямиез колхоз сюдэ, колхозтэк улон ӧвӧл. Озьы, 1998-тӥ арын егит Елена скалъёсты кыскыны кутске. Ужез борды рос-прос басьтӥське, тросэзлы дышетске колхозын ужась опыто скал кыскисьёслэсь. Киын скал кысконлэсь, фермаын луэм дэрилэсь со уг кышка.

— Али фермаын шумпотыса ужамон, — азьланьтэ веранзэ скал кыскись. — Секыт ведраосты ӝуткаса нуллоно ӧвӧл, скалъёсты аппаратэн кысконо. Сиёнэз но пудолы трактор вае. Мар ужантэмез? Ми тани Юрий Щербаковен парен ужаськомы, куспамы тупаса, ог-огмылы юрттыса. Мукет ужасьёсын но керетэммы ӧвӧл. Арысь аре стажмы будэ, опытмы люкаське, соин пӧртэм ӧнер конкурсъёсы но мыло-кыдо пыриськиськомы. Мон ачим но скал кыскисьёслэн конкурсазы кык пол пыриськи ини — 2020-тӥ но 2023-тӥ арын. 

Куинь ар талэсь азьло Елена Павловналы кивалтэтэз ӧнер конкурсэ пыриськыны ӵектэм ке, туэяз ачиз мылкыд карыса кужымзэ утем кышномурт. Тыршемезлэн бервылыз но вань: 20 колхозъёсысь пыриськем скал кыскисьёс пӧлын Лена апай 5-тӥ интыен пусйиськем. 

— Конвертэн уксё сётӥзы, — пальпотэмзэ уг ваты скал кыскись. — Ужам ужез дунъяны но данъяны быгато бере, милемлы вуонояз та выллем конкурсъёсы пыриськон понна та эшшо но бадӟым стимул луэ ук. Мон котьку тазьы шуисько: гурт адямилэсь улонзэ колхоз шулдыртэ. Арысь аре ужамы адямилэсь ужзэ умоятон но капчиятон понна выль технологиос пырто ке но, колхоз адямитэк быроз. Егитъёс тае валасалзы ке, кыӵе умой луысал. Мынам аслам Вова пие но тани кӧня ке ар ӵоже «Труд» колхозамы ветврач луыса ужа ини. Уг ӝожтӥськы, ужзэ кельшытэ. Мед гинэ ужалоз, шуисько мон...

Шутэтскон нуналъёстэк, ӵукна но ӝыт скалъёсты кыскыны ветлыны тупа ке но (таӵе ужан график скал кыскисьёслэн тырмымтэенызы герӟаськем — Н. Ж.), Елена Павловна жадёнэз уг тоды. Котькуд нунал ужаз шумпотон мылкыдын вуэ, малы ке шуоно со тодэ: сое яратоно скалъёсыз витё. 

Римма Кузнецова: «Ферма ке вань, гурт но улэ»

Римма Павловна но, бадӟым апаез кадь ик, фермаын будэм. Пичигес дыръяз анаезлы скал кыскыны юрттыны ветлэ ке вал, бадӟым классъёсын дышетскыкуз со интые скалъёсты кыскыны кутскем ини. Тыршыса, эскериськыса ужам — озьы сое анаез дышетӥз. (Нялтас вераса, Кузнецова Римма Павловна сярысь 2019-тӥ арын шуркынмон толэзе газетамы статья потэм вал ини. — ред.).

Школазэ йылпумъямез бере, ачиз но «Труд» колхозэ ужаны интыяськем. Вордскем гуртысьтыз нокытчы кошкымтэ Римма апай — Вукогурт солы улон но, уж но, яратон но кузьмам. 

— Заочно бухгалтерлы дышетскыны пыри, соку ик фермаын ужаны но кутски. Пудоез пичи дырысен яратӥ бере, уж сюлэмлы кельше вал. Котьма ке но, трос тыршоно, вылезлы дышетсконо луиз. Праздник нуналъёсты адӟытэк, шутэтскон нуналъёсы ужаны потан дыръёс трос луизы, — шуэ Римма Павловна.
Фермаын ужаны кутскемезлы 27 ар вылэм ини. Кема аръёс ӵоже Римма апай скалъёсты кыске, туннэ нуналэ скалъёсты бызьылытӥсь технолог луыса ужа (технолог по воспроизводству), озьы ик 2017-тӥ арысен лаборант но со. Шутэтсконэз тодытэк, котькуд нуналзэ шуымон туннэ но фермаын ортчытэ Римма апай. Владимир пиез но «Трудын» ик тракторист луыса ужа.

— Яра али фермамы вань, — шумпотэ кышномурт. — Ферма ке вань, гурт но улэ ук. Ферма гуртэз сюдэ. 

Римма Павловна туэ «Маяк» возёсын скалъёсты бызьылытӥсь технологъёс пӧлын ортчем вожвылъяськонын 3-тӥ инты басьтӥз но сертификатэн пусйиськиз. Кышномурт понна та нырысетӥ вормон ӧвӧл ини: та выллем конкурсъёсы Римма апай азьвыл но пыриськылӥз, призо интыос басьтылӥз, грамотаосын но дипломъёсын пусйиськылӥз. 

Призо интыослы, басьтэм дипломъёсызлы но таукарон гожтэтъёсызлы шумпотэ ке но, Римма Павловна понна ужын со валтӥсез ӧвӧл. Муспотон пудоосыз, югдуре пырыны быгатӥсь, юрттыны дась луись валче ужано адямиосыз — тани малэсь дунзэ валаса ужаны быгатэ кышномурт.

Ирина Филиппова: «Скал кыскон аппаратэз аслэсьтым вить чиньыме кадь умой тодӥсько»

Фермаын ужасьёслэн семьяязы будэм Ирина Павловна но кема малпаськымтэ, кыӵе удысэн герӟалоз аслэсьтыз улонзэ. 

Ужаны кутскем со 2002-тӥ арын Турья гуртысь парсь фермаын (со гуртэ картлы кошкем кышномурт). Ужзэ со туннэ но яратэ, секытэзлэсь уг кышка. 

— Анай но атай ми понна, асьсэлэн куать нылпиоссы понна, зэмос ужась но тыршись адямиослэн примерзы луыны быгатӥзы. Соос гумырзы ӵоже улӥзы асьсэ кужыменызы тыршыса. Соин ми но сыӵе адямиос луыны тыршимы, ужлэсь ноку ӧм кышкалэ, пудоез яратӥмы, — вера Ирина Павловна.

Парсь фермаын ужаны кутскемез бере, кышномуртлэн пудолы яратонэз юнма гинэ. Соосты сюдыны, утьыны, чакланы солы туж кельшем. Жаляса гинэ вераны кулэ, парсь фермазы кемалась ворсаськиз ини. Нош Ирина Павловна ини дас ар ӵоже ини «Борнакын» зоотехник-селекционер луыса ужа. Но нырысь ужаны кутскем дыръёссэ со уг вунэты. Малы ке шуоно со аръёсы люкам опытэз солы туннэ ужаз но туж юрттэ. 

Али кышномуртлы туж трос ужъёсты быдэстыны тупа: пудоосты бызьылытон, племенной учёт, контрольной скал кыскон, пудоосты мертан, рационэз эскерон... Та но туж трос мукет ужъёс кышномуртлэн пельпумаз. Озьы ке но, ӧнер устолыкез эскерись конкурсъёсы пыриськыны, отчы дасяськыны Ирина Павловна дыр шедьтэ.

— Туэ ёросамы кыкетӥзэ ортчиз зоотехникъёс пӧлын радъяськись конкурс. Мон та конкурсын 3-тӥ инты басьтыны быгатӥ. Скал кыскон аппаратэз люкамы-сэрттӥмы. Мон понна со аппарат — тодмо арбери. Фермачиослэн семьяязы будӥмы ук, — анай-атаеныз данъяськыса вера кышномурт.

Ирина Павловналэн кузпалэз Анатолий Филиппов но «Борнакысь» гажамон ужась. Со механизатор луыса тырше, К-742 тракторен ужа. Бадӟым пизы Артём но (кык покчиосыз школаын дышетско на) Казаньысь одӥгаз дышетскон юртын гурт удысэн герӟаськем ӧнерлы дышетске. Талы Ирина Павловна шумпотэ: со оске, пиез анай-атаезлэсь ужзэ азьланьтоз.

Та апай-сузэръёс куиньназы ик — ас ужзылэн усточиоссы. Кема аръёс ӵоже гурт удысын азинлыко тыршеменызы соос бадӟым вормонъёсы гинэ ӧвӧл, коллективазы но, гуртазы но гажанэ вутскыны быгатӥзы. Дан тӥледлы, зэмос ужась удмурт кышномуртъёс!