Куинь сортэн улонэ

Жугиськон кутскыку мыным 9 арес вал. Атаез 1942-тӥ арын ик жугиськонэ басьтӥзы, собере ми сое ӧм адӟе ини, кулэмез сярысь ивор вуиз. Анай вить нылпиен кылиз: бадӟымезлы агайлы дас одӥг арес вал, пичиез — сузэре — атай кошкем бере вордскиз. Анай бӧрдэ вал ми понна, кызьы утём, кызьы будэтом шуыса. Сисьмем картка, поттурын нянь, турын выжыос сиимы. Куинь ар дышетски. Дышетскыса бертэм бере колёсаен черси, ыштыр куи: ми соку кутэн ветлӥм. Агай кут кута, тулыс кӧтьырма понэ вал, школаын кырс-корс ветлӥськом вал. Пыдъёс котмылӥзы, кынмылӥзы... Гужем чабей уриськом вал, турын выжы сииськом, озьы кӧтэз тыриськом вал. Кенэм вӧй поттонын вал улляса но улӥ. Аран дыр вуиз ке, анай сьӧры араны ветлӥ, ачим но сюрлоен араны дышыса вуи, киос вир потымон пӧсьто вал, етӥн ишкамы. Одӥг пол вуко дорын аран дыръя кужмо гудыръяны кутскиз, ваньзы вукое бызизы. Анна апай суслон (культо) пушкы пырем но, мон но отчы пыри. Эшшо но кужмо зорыны кутскиз но, ми но вукое бызим. Ми сьӧры ик суслон ӝуаны кутскиз, ӵашйиз. Инмар возьмаз, улэп кылимыӦ Валэн но ужай, гыри, культоос пыртылӥ, итым дорын кабан сюриськом, етӥн тышкаськом вал... Валэн ужаны кутскем бере, бригадир котькытчы монэ лэзе вал, мукетъёс уг кылзо вал. Одӥг пол Вострик бусые (тямыс иськем ми дорысен) крахмал бичаны мынӥ, бригадир анаез туж кужмо тышкаськем, коркаез дыбыр-дыбыр мыжга, пе. Мон отысь карнанэн крахмал вайи. Ужамлы уксё уг сёто вал — трудодень гожто, мар сиемез уг юало вал — тышкаськыны быгато. Озьы ке но шудыны но дыр шедьтылӥмы. Куштэм кутэн, ашыкен, куромунёен, тэтчаса шудӥськом вал. Ужаны мынӥ ке но, шудыны потӥ ке но, сьӧрам пичи сузэрме ныпъяса ветлытӥ вал. Бадӟымгес будэм бере ини лэзизы сюрес тупатон уже Киров улосысь Тушка гуртэ, луо нуллӥ валэн ачим тырыса. Отысен Рожкие лэзизы, самой черк шорын канава гудӥ. Соку бригадир тышкаськиз, бадӟымъёс сьӧры вуымтэызь. Мон верай мынам атае ӧвӧл шуыса, кытчы лэзизы отчы мынӥсько шуыса, собере ӝыны норма гинэ сётыны кутскизы. Парсь фермаын ужай, ньыль ар вал сюдӥ, отысен скал кыскыны басьтӥзы. Жугиськон дугдӥз. Со вал шумпотон но, бӧрдон но. Атаез витимы, со ӧз берты ни, весяклы кылиз ожмаськон бусые. Атайтэк кылимы ке но, анайлы тырон сёто вал, скал но быдмиз, ыж но одӥг гинэ кылиз. Одӥг ыжез но агент нуыны лыктэм вал. Тӥр кутыса кышкатэ. Анай кужмо куараен черекъям но, бускель лыктэм, агент тӥрзэ куштэм, ыж но кылемӦ Огпол Аджим гуртэ валэн горючий вайыны мынӥ сороковка бочкаен. Валме машина кышкатӥз но, уробое кымаськиз, гуртысь потӥськем вал ини. Шурма валме кырыж думи но гуртэ бызи, одӥг ӟуч мыным юрттӥз. Милям колхозлэн музъемез вань вал Рожки гурт дорын, отчы турнаны мынӥ кусоен. Дургаысь Тонялэн апаез тышкаськыны кутскем вал но, тон турнаны быгатод-а, мар-а, шуыса, Микта кышно обидьыны ӧз сёты, ушъяз. Со кусо тупатэ вал, мынам кусое туж лэчыт вал. Ужак валэн ужаны кышказы, сӧсыртоз шуыса, а мон ӧй кышка - арай но, нуллӥ но. Фермаын ужаку, 15 скал, кык ветыл вал. Пу вандыса ву пӧсятӥм, карнанэн нуллӥм. Вузэ асьмеос киын качать кариськом вал. Йӧлэз сепарат поттыса вӧй шуккиськом вал. Анай бакчае махорка пуктэ вал, ми сое тӥрен кораськом но Хлебников базаре вузаны нуиськом вал. Кут кутаса вузаськом вал. Озьы шыд пӧзьтыны пызь басьтэ вал анай. Каб но шуккимы вузаны. Агаез армие басьтӥзы, со 3 ар но 8 толэзь служить кариз, выны Семён 4 ар кариз, одӥг сузэре кулӥз коклюшен висьыса, покчиез сузэре дышетскиз, анаен кыкнамы утимы сое. Собере картлы бызи Балтась ёросысь Киськем гуртэ. Шудо улон ӧй адӟы, али но ӧкынӥсько. Пенсие потытозям но колхозын ужай, ужлэсь ӧй кышка, нылпиосме гинэ утялтыны дыры ӧз тырмы. Улон гумырме куинь сортэн ӵошатӥсько: нырысетӥ сортэз — анай дорын, кыкетӥез — кузпалэн улон, куинетӥез — пересьмон. Сисьмем картка, поттурын нянь, турын выжыос сиим ке но, анай дорын шаб улӥ. Котькыӵе секыт нуждаос адӟи ке но, али но улӥсько, инмарлы тау тазалык, кузь гумыр сётэмезлы — мыным ини 87 арес.

Мария Данилова, Киськем гурт