«Кужыммы эшъяськон но вашкалазэ утён бордын»

Сяме пыремъя, Анай кыллэн калыккуспо нуналэзлы сӥзьыса, удмурт этнокультурной компонентэн школаосысь пиналъёслэн пумиськонзы ортче. Та аспӧртэмлыко «эшъяськон выж» умой йылол луыса султӥз удмурт кылэз но лулчеберетэз азинтон ужрадъёс пӧлы.

Та пумиськонэ аслам но пыриськеме вань. Кемалась ни вал со. Туннэ со дыре берытскыса учкид ке, сокем ваньмыз вужмемын кадь потэ ини. Со ужрадъёс сярысь али ке но сюлмам шуныт тодэ ваёнъёс возисько. Кыӵе шулдыр луо вал со ӝытъёс: вожвылъяськонъёс, эктонъёс, кырӟанъёс… Валтӥсез – выль тодматсконъёс. Мерлыко сетьёсын кусып возьыса, возьмаськод вал выльысь пумиськонэз. Куинь ар куспын шедьтӥськод вал трос выль эшъёсты. Нош дискотекаез нимысьтыз яратылӥм. Татын удмурт кырӟанъёс гинэ луо вал, ваньзы соос улсын экто, кырӟало. Куддыр мӧзмон мылкыд но каръяське. Со дыре одӥг ёросысь гинэ 50 пала егитъёс люкасько вал, али дыре 20 мурт люкаськиз ке, со трос ини. Малпасько, дышетскисьёслэн лыдзылэн кулэсмемез сярысь вераськыны татын мултэс луоз, соин выжоме пумиськонлэн пуштросаз.

Арлы быдэ, 21 тулыспалэ, быдэс шаерамы Анай кыллэн калыккуспо нуналэз пусйиське. Та эшшо одӥг пол анай кыллэсь чеберзэ шараян нунал. Ведь котькуд калыклэн кылэз но лулчеберетэз – со паймымон мерас. Егитъёс пӧлын вордскем кыллэсь чеберлыксэ но кулэлыксэ шараян уж капчи ӧвӧл. Туала технологиослэн ӝог вамышъёсын азинскеменызы, тросэз пиналъёс пичи дырысенызы ик кунгож кылэз данъяса будо. Со понна ик, пичи гуртъёсын ке но, анай кылэз утьыса возьыны тыршоно вал.

2025-тӥ арын бадӟым классъёсын дышетскисьёслэн пумиськонзы Ципья шоръёзо школаын ортчиз. Арысен аре пӧртэм школаосы выжись ужрад туэ но аслэсьтыз удмурт шӧмзэ ӧз ышты. Татын калык эктон-кырӟанъёс но, шудонъёс но, вожвылъяськонъёс но удмурт калыклэсь зэмос узырлыксэ шараязы.

Пыр-почгес пумиськон сярысь лыдӟоды газетлэн бамъёсысьтыз