Кыдёкысь гожтэт

Азьвыл кивалтӥсез — Пётр Данилов, кудӥз вордскемын но будэмын Вуж Кушкетын. Али дыре со Удмурт Элькунысь культурая но туризмъя министрлэн воштӥсез луэ. Со юн тырше удмурт калыклэсь азьло дырысь улон йылолзэ возьматыны: дӥськутсэ, сямзэ, ужан тӥрлыксэ, озьы ик вераськон аспӧртэмлыкъёсты, кырӟанъёсты но эктонъёсты. «Айкай» ансамбль асьме Россиысь трос регионъёсы гинэ ӧвӧл, мукет шаеръёсы но вуылэмын ини. Со возьматэ но валэктэ, луоз, адямилэсь тыршемзэ, нуналысь нуналэ аслэсьтыз ужзэ азинтэмзэ. Озьы ик вераме потэ Геннадий Кузнецов сярысь, кудӥз вордскемын но будэмын Ципьяын. Кырӟаны но эктыны, мызганэн шудыны туж усто, отын ик маскара учыръёсты но вералля. Калык адӟе, шумпотэ та артистъёслэсь ужзэс, соин ик соослэн ужзы но вылӥ дунъямын: Пётр Даниловлы сӥё-дано ним, Геннадий Кузнецовлы калык артист ним сётэмын.

Берло дыре дор палам шер ке но вуылӥсько. Соку ваньмыз пуксе син азям, тодам вайисько пинал дырме, тужгес но школаын дышетскем аръёсме. Тросэз уг тодо ни, дыр, Ципьяысь центрын, кытын али колхозлэн правлениез, азьло вал 8 классъем удмурт школа. Вань предметъёс, озьы ик книгаос удмурт кылын вал, ӟуч кыл но литература гинэ ӟучен. Туннэ нуналэ со зэм кадь но уг поты, луоз. Удмурт кылэз кык дышетӥсьёс, Барышникова Мария Петровна но Медведева Любовь Ивановна, нуизы. Ӟуч кылъя 5-тӥ но 6-тӥ классын дышетӥз Медведева Валентина Ивановна, озьы ик мукет дышетӥсьёс. Туннэ нуналэ школаосын Григорий Медведевлэсь «Лӧзя Бесмен» но «Кыйкар бамын» произведениоссэ дышето меда, со сярысь уг тодӥськы. Со романъёсты лыдӟыку, мон котьку но ас поннам малпасько вал, кытын меда со Лӧзя гурт. Одӥг пол тупаз Арске мыныны, соку автобус Покчи Лӧзя гуртэтӥ ветлэ вал али. Со гуртэтӥ потыку, мон тырши кадь ваньзэ ас сюлэмам кельтыны, гуртлэсь интыяськемзэ, коркаослэсь пуксемзэ. Шуд усиз шуисько, милям школаямы ужазы та тодмо писательлэн ӵыжы-выжыосыз Любовь Ивановна но Валентина Ивановна. Бертэмелы быдэ, дор пала вуылыку, юатэк уг кельтӥськы, Григорий Медведевлы сӥзьыса музей усьтэмын ӧвӧл-а шуыса. Тазьы ке малпад, со асьме удмурт калык понна туж бадӟым данъяськон, кудӥз тырше возьматыны, калык туж секыт улонын ке но улӥз, улонзэс тыршизы азьланьтыны. Адямилы улон огпол гинэ сётӥськемын, соин ик асьме ёросамы, Татарстанысь вераны луонтэм чебер сэрегаз, азьланяз но тазьы ик та яратоно музъемез данъясь но утялтӥсь муртъёс тросгес мед луозы.

Мария Александрова

Башкортостан

Шудек гурт