Малпанъёсы али но тон сярысь, Тагашуре!

Кемалась ӧвӧл редакциямы таӵе гожтэт вуиз: «Умоесь! Гожтэ тӥледлы Елена Львовна Кандакова, Карлыган школаысь дышетӥсь. Милям гуртомы, Алевтина Николаевна Судакова, туж таланто адями — чебересь кылбуръёс, веросъёс, выжыкылъёс гожъя. Ачиз со вордскемын Тагашур гуртын. Тӥляд газеттылэн бамъёсаз Алевтина сярысь но солэсь кылбуръёссэ печатланы уз луы меда? Азьвыл гуртоосыз шумпотыса лыдӟысалзы...».

Алевтина Николаевнаен герӟаськимы но улон-вылонэз, озьы ик творчествоез сярысь вераськимы.

Эх, дауръёс, улон дауръёс

Алевтина Николаевна Судакова (быземезлэсь азьло Конькина) Балтась ёросысь Тагашур гуртысь трос нылпиё крестьян семьяын вордске. Анай-атаезлэн со витетӥ нылпиез луэ (покчи сузэрез но, выныз но вань али). Азьло Тагашурын куинь классъем начальной школа ужаз. Сое йылпумъяса, Алевтина Ципья школаын 10-тӥ классозь дышетске но Ижевске 30 номеро технической училищее штукатурлы дышетскыны мынэ. Малы штукатурлы дышетскыны мынэмзэ со али но пыр-поч валэктыны уг быгаты — оло визьтэмен, оло бадӟым апаез татын ик дышетсконзэ йылпумъямысь, дыр, пе. Но одӥгзэ со чик малпаськытэк вераны быгатэ — татын дышетскыса ӧнер басьтэмез сярысь со уг жаля: ку али со Крымез адӟысал (штукатур луыса ужакуз Алевтинаез Ижевскысен Алупкае командировкае лэзё — Н. Ж.). Но Алевтина Николаевналы Тагашурлэсь макем кыдёке кошкыны ӧз тупа ке но, котьку вордскем гуртсэ яратэ, котьку солэсь мӧзме, дышетскыны кошкем бераз но, ужакуз но. Соин 1989-тӥ арын со Тагашуре бертыны малпа.

— Гуртэ бертэм бере, мон Ципьяысь столовое повар луыса ужаны пыри, со дыре ик Тагашурын магазинын но ужай. Со арын ик вуоно кузпалэным, Виталиен, тодматски. Соос эшъёсынызы Тагашуре волейбол шудыны лыктӥллям вал. Ми но нылъёсын шудыны потӥмы. Озьы ик тодматским. Кема улытэк ик монэ Карлыганэ лушказы. Ини куамын ар татын улӥсько, ужасько, — валэктэ Алевтина Николаевна.

Алевтина Николаевналэн кылбур гожъяны быгатонлыкъёсыз хобби луыса гинэ кылизы. Ини куамын ар ӵоже со Карлыган школаын завсклад луыса ужа. Матысь дыре солэн гожтэм выжыкылэз «Кизили» журналын печатласькоз (сентябре «Кизили» журналысь представительёс асьме пала вуиллям вал шуыса гожтӥськеммы вал ини, соку Алевтина Судакова соослы аслэсьтыз выжыкылзэ но сётэм — Н. Ж.).

Алевтина Николаевна ӵемысь школаысь коллегаосызлы юрттыса пӧртэм конкурсъёсы пыриськон понна кылбуръёс, веросъёс, выжыкылъёс гожъяны но юрттэ. Та солэн, бадӟыматытэк вераса, умой пӧрме. Талы паймонэз но ӧвӧл: Конькинъёс олокӧня аръёс ӵоже музыкальной семья шуыса лыдъясько. Та сярысь Алевтина Судакова ачиз но вера.

Конькинъёс- творческой семья

— Милям семьямы творческой, — шуэ Алевтина Николаевна. — Огпол вань семьяенымы (нош семьязы соослэн туж бадӟым) Балтасьын «Музыкальная семья» конкурсэ пыриськеммы но вань. Соку атаймы гинэ коркаямы кылиз, лэся. Но атай но мызганэн шудылӥз. Егит дыръяз анаезлэсь кудыын пукись ӟазегзэ Ципья базарын вузаса, со уксёен мызган но басьтэмез вань... Солэсь адӟем карыса, дыр, мызганэн бадӟым агайёсы (Анатолий но Борис) шудӥзы, Сергей выны но шудӥз. Любовь апае туж усто кырӟа, Лариса сузэры но кырӟась.

Ваньзы сярысь вераз Алевтина Николаевна. Ассэ гинэ тодэ уськытыны вунэтӥз — нош кышномурт удмурт кылын кылбуръёс, выжыкылъёс гожъяны усто. Та валэктӥське, дыр, Алевтиналэн сыӵе музыкальной, таланто семьяын вордскеменыз. Аслаз пиез Дмитрий Судаков но туннэ нуналэ «Айкай» театрын ужа — удмурт, ӟуч кылын кырӟа, эктэ, мызганэн но шудэ. Нылыз Наталья но ас дыраз «Ӟардон» ансамбле ветлэм, концертъёсы пыриськем. Но ужа ӝог эмъюрттэтын фельдшер луыса. 

Кылбуръёсын мылкыдме буйгатӥсько

Куамын ар ӵоже Карлыганын улэ ни ке но, Алевтина Николаевна ватытэк вера: вордскем гуртэзлэсь со али но туж мӧзме. «Мынам вань малпанъёсы аслам гуртысь гурезьёсы, сяськаё возьёсы, паськыт бусыосы сярысь. Выжыкыл гожтӥ ке но, Карлыган сярысь ӧвӧл, Тагашур сярысь гожтӥсько», — шуэ со. Соин паймонэз но ӧвӧл, нылкышнолэн ваньмыз кылбуръёсыз вордскем палъёсыз но матысь адямиосыз сярысь шуыса.

— Зэмзэ ке верано, мон ачим тазьы малпасько: мон кадь кылбур гожъясьёс трос. Уг яратӥськы туж ик та сярысь вераны но, соин тросэз лыдӟисьёс монэ выль паласен адӟозы. Куддыръя матысь адямиосылы, ӵыжы-выжыосылы ужан куспетӥ кылбуръёсме лыдӟыса возьматӥсько — соос дунъяло. Мынам гожъям чуръёсы — со мынам малпанъёсы, мынам кыӵе ке шӧдонъёсы, — вера Алевтина Николаевна.

Кылбуръёсыз куддыръя дас минутскын но пӧрмо, вылэм. Куддыръя нош — кема малпаса гинэ. Малпаськымтэ шорысь но кыӵе ке тема йыраз лыктыны быгатэ — соку кылбурчи кияз ручкаен кагаз кутыса гожъя. Кылбуръёслэн валтӥсь тематиказы — вордскем шаерлэсь, вордскем юртлэсь, анайлэсь мӧзмон. Алевтина Судаковалэсь гожъям кӧня ке кылбуръёссэ тӥледлы но лыдӟыны ӵектӥськомы.

Мусо анаелы

Маин дунъялом мон тонэ,

Мусо анае.

Маин берыктом мон тыныд,

Дуно анае.

Кӧттэ тырытэк,

Милемыз тон сюдӥд.

Уйёстэ изьытэк,

Милемыз будэтӥд.

Вуыса-вуытэк,

Сиёндэ пӧралляд.

Ӧвӧл уксёен

Дӥськут басьялляд.

Выль улон сюресэ

Инмарен тон келяд.

Синкыли азвесьтэ

Ӵушылӥд ымнырад.

Маин дунъялом мон тонэ,

Мусо анае.

Маин берыктом мон тыныд,

Дуно анае!

Та кылбурзэ Алевтина Судакова анаезлы, Екатерина Конькиналы сӥзе.

Малы ке мӧзмисько мон

Малы ке мӧзмисько мон

Сӥзьыл дауре.

Аръёслэсь ортчемзэ

Шӧдӥсько та дыре.

Турлы буёлэн

Пужыятэм ни инкуазь.

Та дуннеысь кошкыны

Мыным на кадь вазь.

Сыӵе дыръёсы

Шуак луисько.

Урод малпанме

Кошкыны курисько.

Кыӵе мӧзмон, пе, луоз

Та сӥзьыл дауре?

Выль буёл мылкыдэн

Улыны на кулэ.

Малы уг лу меда

Пинал дырез берыктыны

Гольык пыдэн ӝытозь

Сюрес кузя бызьылыны.

Ӵукна вуиз ке, мемие

Монэ сайкатысал.

Каллен гинэ, эркияса,

Мыным со вазьысал.

«Тон султы ни, нуныкае,

Пӧзиз мынам чае.

Нош ӝӧк вылын сюриськыса

Вите ни табане.

Шунды но серекъя ини,

Туж ӝог ортчоз дыред,

Изид ке кемагес эшшо,

Мӧзмоз ук мунёед».

Купырмыса, коӵышпиен

Артэн мон пукысал,

Шунды силэсь пегӟылыса

Синме ӵушылысал.

Борддор бордын час йыгаське,

Лыдъя улон чотэз

Часлэсь циферблатсэ сямен,

Уг лу берыктыны дырез.

Вордӥськем музъем

Мынам пичи мусо гуртэ

Со Тукошур но Бибатла

Черкас аул но Тагашур

Кудӥз шуэ со шелеп гурт.

Гурт котырын нюлэс будэ,

Кисьмам боры дораз ӧте,

Сяська возен куэм ковёр

Йырэз поромытэ.

Сузям люкам ошмес вуэз

Туж мӧзмыса, ӝог юисько

Турын-куарез тау карыса

Вулы мон кузьмасько.

Чай бутникен пӧсь перемеч

Пересь анай вите.

Гидкуазь пӧлын сьӧд кучапи

Дят карыса утэ.

Трос интыын мон луылӥ

Уно чебер инты адӟи

Но Тукошур гуртэ мынам

Пыриз ни весяклы сюлмам.

Огшоры гинэ авторлэн «Вордӥськем музъем» кылбуреныз статьяме уг йылпумъяськы. Алевтина Николаевналэн котькуд кылбураз, котькуд выжыкылаз (жаляса верано, ваньзэ ужъёссэ огдыре газетэ печатланы ум быгатӥське) вордскем палъёссэ яратон мылкыдыз, гуртэзлэсь юн мӧзмемез шӧдӥське. Вордӥськем музъемез автор понна — самой яратоно интыез, кудӥныз солэн трос пӧртэм тодэ ваёнъёсыз герӟаськемын. Но та кылбурен статьялы точка ум пуктэ, малы ке шуоно оскисько: Алевтина Судакова лыдӟисьёсты выльысь но выльысь аслаз гожъямъёсыныз шумпоттыны тыршоз.