Малы Сырьяын егитъёс люкаськизы?

Но мугез со бордын гинэ но ӧвӧл, дыр. Туала дыре тросэз егитъёс, компьютерын но телефонын пукыса, виртуальной улонэн улыны кутско. Кулэ ӧвӧл кадь ини соослы дискотекаос но, эшъёсын пумиськонъёс но. Малпано ке, ог кызь-куамын ар талэсь азьло гинэ но асьме анай-атайёсмы бускель гуртысь дискотекае пыдын мыныса вуон понна сюрес вылэ одӥг часлы вазьгес потӥллям яке куинь питрано коляскаен мотоциклэ ог дас ӵошен кызьы ке но тэрыса ветлӥллям, дискотекаын жадьытозязы шулдыръяськиллям. Эх... Али нош, машина вань ке но, кудӥз-огез дорысьтыз потыны но раньӟоз, потӥз ке но клуб азьын машинаяз гинэ пукоз. Валамон, ваньзы туала егитъёс сыӵеесь шуыса верам ӧвӧл та. Но озьы ке но, таӵе ситуация шер уг пумиськы. Валамон соиз но: куддыръя егитъёслэн дискотекае потытэк доразы пукемзы умойгес но. Нылпи дораз ке, анай-атаезлы но каньыл. Но кызьы луиз ке но, котькуд егитлы огъёзоосыныз эшъяськон кулэ.

Район кивалтэт демография югдурез умоятон вылысь сюлмаське, та шуг-секыт ласянь поселениосысь главаосын, клубъёслэн кивалтӥсьёсынызы валче ужа. Та ӧрын одӥгез ужрад кылем арняе, 14-тӥ толсуре,  Сырья гуртысь клубын ортчиз — «Ойдо тодматском!» ним улсын егитъёс понна тодматскон ӝыт.  

Ужрадэ пыриськизы Гондыргурт но Сырья, Турья, Ярак-Чурма гуртъёс, озьы ик Сизнер, Вукогурт, Ципья, Карлыган гуртъёсысь егитъёс вуизы но.

Нырысь егитъёс шудон формаен куспазы тодматскизы, ог-огзы сярысь веразы, собере удмурт шудонъёсты шудӥзы, юмшазы, эктӥзы. Ӝытэз шулдыртӥз Сизнер гуртысь егит мызганчи Артём Антонов.

Ужрадэз куинь гуртысь завклубъёс огазе ортчытыны малпаллям (Сырья гуртысь завклуб Леонид Сапожников, Вуж Турьяысь завклуб Ирина Исьмекова, Ярак-Чурмаысь завклуб Мария Матвеева), малы ке шуоно ӵапак та гуртъёсысь егитъёс ог-огзы доры куное ӵем ветлыло вылэм. Соин нырысь ик чакламын вал Сырьяысь, Турьяысь, Ярак-Чурмаысь егитъёсын пумиськон ортчытыны, но, шумпотымон, мукет гуртъёсысь егитъёс но уно люкаськиллям.

—Ужрад туж умой но шулдыр ортчиз. Программаямы вал удмурт но ӟуч кырӟанъёс, калык шудон-шулдыръяськонъёс (Леонид Дмитриевичен ӵош дасямы). Пусйыны кулэ, шулдыръяськонэ итӥськизы семьяен егитъёс но. Оскем потэ, та ортчытэм ужрадмылэн пайдаез луоз но, вуонояз егитъёсмы матынгес эшъяськозы шуыса, — вераз Ирина Исьмекова.

Шумпотымон, та ӝытэ клубе трос егитъёс люкаськиллям. Леонид Дмитриевичлэн верамезъя, 70-лы матын адямиос луэм. Оскыса кылиськом, та выллем ужрадъёс традицие пырозы, вуоноын озьы ик мукет гуртъёсын но радъяськозы шуыса.

Наталья Жукова