«Математикаен дышетӥсь луоно интые ӟуч кылъя дышетӥсь луи» (+фото)

Серафима Николаева 30 арлэсь тросгес ужа ини Ӟаны шоръёзо школаын ӟуч кылъя но литературая дышетӥсь луыса. Шуэ: уг яратӥськы мукет дышетӥсьёслэсь пӧртэм луыны, ваньмы огкадь ужаськомы — тыршыса, вань кужыммес сётыса, огъя луыса. Но ужъёсыз котьку солэн яркытэсь пӧрмо. Юнме шат со пӧртэм конкурсъёсы пыриське, солэн дышетскисьёсыз экзаменъёссэ вылӥ баллъёслы сёто. Со сярысь зэмзэ но тазьы вераны луэ: Серафима Анатольевна адӟем карымон дышетӥсь! Ӧнер праздникенызы валче Серафима Анатольевна «Азьлане» газетлы интервью сётӥз. Вераськимы соин дышетӥсьлэн секыт но тунсыко ужез сярысь.

— Серафима Анатольевна, малпанады вал-а куке но, дышетӥсь луоды шуыса?

— Зэмзэ верано ке, мон математикаен дышетӥсьлы мыныны малпасько вал. Но Василий Фёдорович Трофимов (соку со Ципья шоръёзо школаямы, кытын мон дышетски, директор луыса ужаз) ӵектӥз Казаньысь педагогикая институтэ ӟуч кылъя но литературая дышетӥсьлы пырыны. Малы ке шуоно отын ӟуч-бигер отделениын бюджет интыос вал. Мон, кема малпаськытэк, соглаш луи. Мар бен? Ципья шоръёзо школаын дас ар дышетскыса, школаез зарни медален йылпумъяй, соин математикаез но, ӟуч кылэз но умой тодӥсько вал. Озьыен, ӟуч-бигер отделение дышетскыны пыри но вить арскын ӟуч но бигер школаосын ужаны быгатӥсь ӟуч кылъя но литературая дышетӥсьлэсь ӧнерзэ басьтӥ.

— Котькуд дышетӥсьлэн аслаз яратоно дышетӥсез, наставникез луэ. Сыӵе адями, кудӥз шоры учкыса, котькуд вуоно дышетӥсь «мынам но таӵе дышетӥсь луэме потэ» шуыса вера.

— Зэм, мынам но сыӵе дышетӥсьёсы вань — Трофимов Василий Фёдорович но Семовская Галина Николаевна. Соос мон понна зэмос дышетӥсьёслэн примеръёссы. Чурыт куронъёсты пуктӥсь, кылкутӥсь, зэмлыко, нылпиосты яратӥсь, адямиослэн югдуразы пырыны быгатӥсь ас ужзылэн усточиоссы вал соос. Соослэсь кышкамы но, гажамы но. Кӧня вал школаын дышетскыкумы та дышетӥсьёсын герӟаськем визьнод сётӥсь учыръёс… Зэмос советской закалкаен дышетӥсьёс соос. Соос азьын возьыт медаз луы шуыса, ачим но котьку умой ужаны тырши.  

— Ужан сюресты бигер школаын кутскиз шуыса тодӥсько. Нырысь секыт вал, дыр.

— Озьы. 1988-тӥ арын Тюнтер гуртэ басьтэм ӧнеръя ужаны интыяськи, малы ке шуоно соку мон Ӟаны гуртэ картлы кошкиськем вал ини. Нырысетӥ ужаны кутскем нуналысен ик асме жалятэк, сюлмысен ужаны тырши. Капчи ӧй вал. Мон егит, нылпиос нырысь лякыттэмъяськизы… Вылаз ик 11-тӥ класс сётӥзы мыным, классын 30 нылпи. Син азяды пуктэ — мон, толон гинэ дышетсконэз йылпумъям студент, но 30 нылпиос… Но мынам вӧзам котьку юрттӥсе, пыкетэ вань вал — Александр кузпалэ. Со но Тюнтер гуртэ монэным ӵош ужаны интыяськиз, физкультурая дышетӥсь луиз. Но Тюнтерын мон кема ӧй ужа, одӥг ар гинэ. Собере декретэ потӥ но 1990-тӥ арын ини Ӟаны шоръёзо школае ужаны интыяськи. Со дырысен мон отын.

— Куамын арлэсь тросгес Ӟаны школаын азинлыко ужаськоды ини. Та аръёс ӵоже кӧня нылпилы тодон-валан сётӥды, кӧня шуг-секытъёсты адӟиды, дыр…

— Мон 1990-тӥ арысен кутскыса кызь ар ӵоже дышетонъя завуч луыса ужай. Соин классъёсын трос ӧй ужа. Одӥг гинэ выпуске луиз — 2020-тӥ арын. Пӧртэмез луиз: секытэз но, шулдырез но. Ужаны кутскыкум, Ермаков Иван Васильевичлэн кивалтэмез улсын кужмо дышетӥсьёс ужазы, соос юрттӥзы. Мон понна секыт вал 2010-2011-тӥ аръёс, куке компьютерен ужаны кутсконо луиз. Мыным соку верасалзы ке, дас арскын со компьютерен умой ужаны быгато ини шуыса, мон ӧй оскысал, дыр. Та ласянь но семьяе валаз, котьку пыкет луиз, юрттӥз. Тужгес но Регина нылы. Монэным ӵош компьютер азьын пукиз, ужаны дышетӥз. Дорын умой пыкет луыку гинэ, каньыл ужаны луэ ук. Коллективмы но туж умой. Огъя луыса ужаны тыршиськомы, котьма ласянь кенеш сётыны, юрттэт кимес мычыны дась. Кулэ луыку, Ципьяысь коллегаосылы но вазиськисько. Шумпотӥсько, соосын но юн кусып возьыны быгатӥськомы шуыса. 2011-2012-тӥ аръёсы нош Тюнтерын ужай, Ӟаныын ужме но азьланьтӥ. Соку но секыт луиз. Но озьы ке но, ужме котьку рос-прос быдэстыны тырши, нылпиосын конкурсъёсы пыриськыны но ӧй вунэты.

— Ужды пӧртэм конкурсъёсы, олимпиадаосы, научно-практической конференциосы пыриськонэз но кулэ каре, соиз зэм.

— Ужмы но кулэ каре, аслым но тунсыко потэ. Со сяна, школалы но умой результатъёс кулэ ук. Тужгес эссе конкурсъёсы пыриськыны яратӥсько. Нылпиосы но сочинениосты гожъяны ярато, мыло-кыдо пырисько. Ёрос, республика масштабен трос конкурсъёсы пыриськи но пыриськисько. Лихачёвские чтения, Толстойлы сӥзем буктрейлеръёсъя выллем калыккуспо но всероссийской конкурсъёсы пыриськиськомы. Яра али нылпиос асьсэос но тунсыкъясько, соостэк конкурсъёсы пыриськыны ӧй луысал.

— Экзаменъёслы но дасяськыны кулэ.

— Кылем арын ОГЭ-лы но, ЕГЭ-лы но дасяны тупаз. Туэ тани шутэтскисько (серекъя) — 5-тӥ, 7-тӥ, 8-тӥ, 10-тӥ классъёсты дышетӥсько, экзаменъёслы дасяно ӧвӧл. Жаляса верано, туала дыре бадӟым классъёсын нылпиос ӧжыт кылё. Тодӥсько на, милям классын 35 ӵошен дышетскем аръёсмы но луизы. Соин-а, мар-а мынам бадӟымгес классъёсын ужаме потэ. Уногес нылпиосын шулдыргес но, тунсыкогес но.

— Туэ но, та дырозь но экзаменъёслэн йылпумъянъёсызъя тӥляд показательёсты умой.

— Нылпиосы тыршисесь. Берло аръёсы экзаменъёсты умой сётэм нылпиосме пусъеме потэ — Влада Петрова, Гоша Павлов, Катя Халтурина, Булат Вафин, Виталий Евдокимов, Яша Гришкин. Алина Аксакова, Алиса Яфарова, Юлия Терентьева, Снежана Трофимова конкурсъёсы мыло-кыдо пыриськизы, экзаменъёссэс но умой сётӥзы. Туэ но результатъёсмы умой вал, ёросын ӟуч кылъя экзаменъёслэн йылпумъянъёсызъя куинетӥ инты басьтӥмы.

— Нош асьтэлы ӟуч кыл-а, литература-а матынгес потэ?

— (Малпаське ). Ӟуч кыл, шуысал. Та но нылпиосын герӟаське, дыр. Соослэн туала дыре туж ик лыдӟиськемзы уг поты ини. Милемын ӵошатыны уг луы (серекъя). Ас дыраз Галина Николаевна, Толстойлэсь «Война и мир» произведенизэ лыдӟыкумы, кулэ интыоссэ карандашен ик пусйылытэ вал милемыз. Соин али дыре литература урокъёсын, куке тон валаськод, нылпиос произведениез быдэсакен уг лыдӟо шуыса, туж тунсыко уг луы. Но туала дыре но лыдӟыны яратӥсь нылпиос вань. Тодӥсько на, одӥг дышетскисеным Исаева Ленаен ӵошатскеммес но — кин тросгес книгаосты лыдӟоз. Мыным но тунсыко, солы но стимул вал. Туала нылпиос лыдӟиськизы ке но, тросаз учыре отечественной классикаез ӧвӧл, туала зарубежной произведениосты лыдӟо. Ма, мон ачим но зарубежной литератураез яратӥсько. Берлозэ, кылсярысь, Ремарклэсь «Жизнь взаймы, или у неба любимчиков нет» шуэм произведенизэ лыдӟи. Мыным кельшиз.

— Дышетскисьёсты пӧлын тӥ шоры учкыса дышетӥсьлэсь ӧнерзэ бырйись нылпиосты луизы-а?

— Мон вераны уг быгатӥськы, мон понна гинэ та ӧнерез быръемъёс вань шуыса, но дышетскисьёсы пӧлысь дышетӥсь луэм нылъёсы вань. Со Анисимова Таня, Николаева Маша, Трофимова Мила. Оскеме потэ, мон но соос понна умой дышетӥсьлэн примерез луиськем, дыр, шуыса. Малы ке шуоно Елабугаын дышетскем нылъёсы Маша но Мила ог 10 ар талэсь азьло «Учитель, который мне запомнился» шуэм сочинениязы мон сярысь гожтӥллям вал. Соку сочинениосъя конкурссылы йылпумъянъёс лэсьтыкузы, монэ но ужрадазы ӧтизы. Мон понна со туж шумпотымон вал.

— Асьтэлэн но куинь нылъёсты вань шуыса тодӥсько.  

— Таня, Люда но Регина нылъёсмы вань. Мон ортчемзэ тодам вайыса валасько: аслам нылъёсылы ӧжыт дыр висъяськем. Школаысь нылпиослы тросгес дыр висъяськем вылэм. Кызьы меда соос будӥллям шуыса паймисько мон куддыръя. Ужысь жадьыса бертон, номыр карем потымтэ дыръёс трос луизы. Но озьы ке но нылъёсы умой адямиос луыса будӥзы. Монэ валамзы, вожзэс поттымтэзы, котьку юрттыны дась луэмзы понна нылъёсылы но, кузпалэлы но бадӟым тау.

— Серафима Анатольевна, вераськемды понна бадӟым тау! Ӧнер праздникеныды ӟечкыласькомы тӥледыз. Ужады азинсконъёс, выль вормонъёс сӥзиськомы!

— Бадӟым тау. Аслам но, учырен пайдаяськыса, коллегаосме ӧнер праздникенымы ӟечкыламе потэ. Ужмы капчи ӧвӧл, котькуд нунал трос саклыкез, чиданэз, сабырлыкез кулэ каре. Арысь аре ужаны секытгес луэ ке но, трос кагаз ужъёсмы вань ке но, валтӥсез сярысь вунэтыны кулэ ӧвӧл — ми нылпиослы тодон-валан сётӥськомы, соосты бадӟым улонэ потыны дасяськомы. Ваньмылы сӧл-таза луыны сӥзисько, ужъёсмы бервыло мед луозы.