Мед пушъёз чебер вайёсын!

Ужрадэ пыриськизы Покчи Лӧзя, Вылын Ушма, Ѓаны, Бурнак, Ципья, Сырья, Дурга но Балтасьысь 5-тӥ номеро нылпи садъёс. Асьме ёросысь пиналъёслэн быгатонлыкъёсынызы тодматскиз Татарстанысь удмуртъёслэн НКА-зылэн тӧроез А.С. Герасимов но.

Балтась удмуртъёс понна гинэ ӧвӧл, быдэс Татарстанысь удмуртъёс понна но та выллем конкурс нырысетӥез луиз (оскомы, берпуметӥез но ӧвӧл шуыса). Удмуртлыкез утёнлы чаклам ужрадэз А.С. Герасимовлэн кичӧлтэмезъя радъяз Татарстанысь удмуртъёслэн НКА-зы. Конкурс малпамын вал будӥсь пиналъёслы вордскем анай кылзылы яратон пыӵатон, удмурт калык сям-йылолъёсты, лулчеберетэз утён но азинскон сётон вылысь.

Мазэ веранэз, шумпоттӥзы ик асьме пичи артистъёсмы учкисьёсты но, жюриын пукисьёсты но. Концерт кутскемлэсь азьло ик сюлэмшугъяськиськем вал, кызьы пичи пиналъёс пӧлысь самой-самойёссэ бырйыны луоз шуыса. Зэм но, туж секыт ужпум - пиналъёслэсь тыршемзэс, быгатонлыксэс дунъян, малы ке шуоно котькудӥз мыло-кыдо дасяськем, котькудӥзлэн кыӵе ке но устолыкез вань. Но котьма ке но бырйытэк ӧйлась.

4-5 но 6-7 аресъем пиналъёслэн быгатонлыкъёссы 4 пӧртэм номинациосъя дунъяськизы. «Удмурт выжыкылъёсъя суред» номинациын 4-5 аресъем пиналъёслэн ужъёссы пӧлын вормисе потӥзы Ӟаны нылпи садысь Асанов Артёмлэн но Сырья покчи школа-нылпи садысь Чернова Ангелиналэн суредъёссы. 6-7 аресъемъёс пӧлын пусйиськизы Покчи Лӧзя нылпи садысь Харланов Ильялэн но Вылын Ушма покчи школа-нылпи садысь Ишмурзина Аделиналэн ужъёссы.

«Удмурт калык эктон» номинациын асьсэ ӟырдыт эктонэнызы лауреат луизы Бурнак нылпи садысь пиналъёс (кивалтӥсьсы Лилия Сабирзянова). Тарасова Лариса, Байкова Нина но Асанова Ирина кивалтэм улсын Ципья, Сырья но Ӟаны нылпи садъёсысь пиналъёслэн тыршемзы дипломъёсын пусйиськизы. Удмурт кырӟанъя кык дипломантъёс тодмостӥськизы. Одӥгез Ӟаны нылпи садысь дуэт - Лиана Апакова но Никита Папаев «Пичи уӵыпи» кырӟанэнызы (кивалтӥсьсы Виктор Камаев). Кыкетӥез дипломант Бурнак нылпи садын визьнод люкась удмурт пиналъёслэн коллективзы (кивалтӥсьсы Ольга Андреева).

Удмурт сямен вольыт кылбур лыдӟонъя вормисе потӥз но лауреат луиз Ӟаны нылпи садысь «Бӧчы но шунды» кылбурез лыдӟем 5 аресъем Кира Чирикова (кивалтӥсез Лариса Самсонова), нош та номинациын дипломантъёс луизы Бурнак нылпи садысь 6 аресъем Милана Корнилова (кивалтӥсез Ольга Андреева) но Вылын Ушма нылпи садысь 5 аресъем Анна Ишмурзина (кивалтӥсез Оксана Галиахметова).

Ужрадэ пыриськем вань пиналъёслы (нош соос 56 кузя вал) кузьмазы нимысьтыз та конкурслы басьтэм футболкаосты. Вормисе потэм пиналъёсты шумпоттӥзы аспӧртэмлыко удмурт «шӧмо» шудонъёсын: нылъёслы кузьмазы удмурт дӥсен дӥсям мунёосты, нош пичи пияшъёслы - чебересь валъёсты. Вераны кулэ, шудонъёс чылкыт инкуазь материаллэсь - пулэсь - лэсьтэмын шуыса. Пусъем потэ созэ но, та кузьымъёсты дасям Андрей Сергеевич Герасимов, аслаз кисыысьтыз коньдон поттыса. Со сяна, бадӟым люкет пыртэм тӧролэн юрттӥсез - Марина Анатольевна Иванова но. Со та конкурсэз радъян понна Дышетонъя но наукая министерстволэсь 200 сюрс манет тыр грантсэ утэм. Ӵапак со грант чотын луонлык кылдэм конкурсын вормисе потэм тужгес трос пиналъёсыз луэм нылпи садъёслы ватсаса коньдон висъяны. Асьме ёросын таӵе шуд усиз Ӟаны нылпи садлы. Та визьнод сётон учреждениез 30 сюрс манетлы сертификатэн пусйизы. Соин соосты сюлмысен ӟечкыласьком. Андрей Сергеевич пусйиз, та коньдонэз нылпи сад удмурт шудонъёс, методической но дидактической материалъёс басьтон понна кутыны быгатоз шуыса.

Туж бадӟым тау шуыны кулэ нылпи садэ ветлӥсь пиналъёсты та конкурслы дасям визьнодасьёслы но анай-атайёслы. Пичиосты эктыны-кырӟаны дышетыны трослы секытгес уга. Соослы луыса чебер концерт пӧрмиз.

Ваньмыз умой пӧрмиз шуыса верад ке, туж ик шонер уз луы, дыр. Нырысь кут но кырыж борӟаське, шуиллям удмуртъёс. Мазэ веранэз, шугъяськонъёс кылдӥзы ик. Конкурслэн йылпумъянъёсыныз соглаш луымтэос, йыркуръяськисьёс но луизы кадь. Муртлэсь ужзэ курланы капчи. Нош ужрадэз дасян понна кӧня тыршоно луиз, дыр, шуыса малпаськимы ке, оло, куд-ог пӧрмымтэослэсь луэмзэс но валаломы. Ог-огмылы юрттыса ужасалмы ке, сыӵеосыз, оло, ӧй но луысалзы. Соин но та ужрадэз дасянэ пыриськем муртъёслы тау шуэм потэ. Оскиськом, азьланяз но та выллем конкурсъёсты ортчытыны мылкыдзы уз кысы шуыса. Угось нылпиосты визьноданын сыӵе ужрадъёслэн кулэлыксы бадӟым. Озьыен, макем ӟеч асьмеос утялтом мудор писпумес, сокем чебер пушъёзы солэн вайёсыз.