«Медицина удысын ужасьлэн валтӥсь инструментэз — солэн синъёсыз»

Ципья гуртысь Саляхиева Светлана Алексеевна ас дыраз больницаын эмсузэр но, рентген-лаборант но, фельдшер-лаборант но луыса ужам. Кудзэ гинэ ужзэ эн басьты, котькудзэ бадӟым кылкутонэн, рос-прос быдэсъям со. Кема аръёс ӵоже ужаса, котькуд минутэ юрттыны дась луэменыз Светлана Алексеевна калыкын бадӟым гажанэ вутскиз. Ципья палан улӥсьёс сое «вир басьтӥсь Света апай» нимен туж умой тодо. Трос вераськыны, ассэ ушъяны яратымтэ ке но, каньыл ужась кышномурт котькуд пациентэныз — пичиеныз но, бадӟыменыз но — огъя кыл шедьтыны быгатэм. 2017-тӥ арысен дано шутэтсконын луэм фельдшер-лаборантэн вераськыса, ужан вакытъёссэ тодэ вайимы. Вераськонмес тӥледлы но лыдӟыны ӵектӥсько.

— Светлана Алексеевна, Ципья палан улӥсьёс тӥледыз туж умой тодо, дыр, шуыса малпасько. Малы ке шуоно больницаын ужан аръёсады тӥ Ципьяысь но Ципья зонаысь мукет гуртъёсысь калыкен трос ужады. Мукет гуртъёсысь лыдӟисьёс но мед тодозы шуыса, асьтэ сярысь вакчияк вералэ вал.

— Мон ачим Ципья гуртысь. Татын вордски, будӥ, улӥ но улӥсько. Школаын 10 классэз йылпумъяй, урод ӧй дышетскы. Гуртын будэм бере, улонме татын ик азьланьтэме потӥз. Дышетскон вакытам гинэ, 1974-1976-тӥ аръёсы Казаньысь медициная училищеын тодон-валан басьтыкум, вордскем гуртме кельтӥ. Улонме медицина удысэн герӟало шуыса но ноку ӧй малпа — кылдэмез озьы луиз. Медучилищее дышетскыны пыри, тодон-валан басьтыны тырши. Фельдшер-лаборантлэсь ӧнерзэ бырйи. Соку ӧй но малпа, медицина удысын 42 ар ужало шуыса. Адямиослы юрттон, ӟеч уж лэсьтон — мынам призвание луэм, дыр. Талы мон пумтэм шумпотӥсько.

— Соку гинэ дышетскон юртэз йылпумъям егит ныллэн уже интыяськон ласянь шуг-секытъёсыз ӧз кылдэ-а?

— Соку уж ласянь секыт ӧй вал шуыны кулэ — распределениея ужаны интыяськылӥмы. Мыным тани, кылсярысь, Нурлат ёросын ужаны ӵектӥзы, но мон вордскем гуртам бертыса интыысь больницаын ужаны малпай. Та ласянь но шуг-секытъёс ӧз кылдэ. Тау шуыны кулэ со дыре вуж больницалэн валтӥсь врачез луыса ужам Сафин Рашит Шариповичлы. Туж йӧно, валась врач вал со, ас ужезлэн зэмос усточиез. Монэ но, егит но опыттэм ужасез, ужаны басьтӥз.

— Шонер тодӥсько ке, больницаын тӥ нырысь басьтэм ӧнердыя ӧвӧл — эмсузэр луыса ужаны кутскиды.

— Кӧня ке дыр ӵоже лаборант луи, нош собере дас одӥг ар ӵоже эмсузэрлэсь ужзэ быдэсъяй. Та ужен мон туж матын тодматски. Мон понна валтӥсез одно ик ӧнеръя ужан ӧй вал — пайда ваён, ӟеч уж лэсьтон вал. Медицина удысын тыршись котькуд ужась озьы малпа, дыр. Ӟеч уж ке лэсьтӥськод, адямилы ке юрттыны быгатӥськод, соослэсь таукарон кылъёс ке кылӥськод — талэсь но бадӟым шумпотон ӧвӧл. Ватытэк верасько, 42 ар ӵоже ужаса пациентъёслэсь таукарон кылъёссэс трос кылӥ. Али но верасьёс вань. Кылсярысь, урамын пумиськыкумы, таукарись адямиос луыло. Кыӵе шумпотымон, уд ужаськы ке но, тынэсьтыд юрттэмдэ уг вунэто шуыса.

— Светлана Алексеевна, тӥледыз тросэз «вир басьтӥсь Света апаез» кадь тодо.

— (Серекъя). Мон, зэмзэ но, кема аръёс ӵоже вир басьтылӥ. 1989-1996-тӥ аръёсы рентген-лаборант луыса ужай, та но капчи уж ӧй вал. Нош собере ини 25 ар ӵоже, дано шутэтсконэ потытозям, фельдшер-лаборант луи. Вераны гинэ капчи, малпано ке, сомында аръёс ӵоже маиз гинэ ӧй вал… Но пациентъёсы котьку тау каризы — пичиосыз но, бадӟымъёсыз но. Гурт калыкмы умой, каньыл, тау карыны быгатӥсь. Калыкын озьы верало шуыса чик уг сюлмаськиськы — шумпотӥсько гинэ.

— Вир басьтон сяна, фельдшер-лаборант луыса ужакуды тӥ биоматериалъёсты но эскериды, микроскопен но ужады — ваньмыз киын ужаськиз.

— Мон котьку верасько: медицинаын ужасьлэн валтӥсь инструментэз —  солэн синъёсыз. Али туала техникаосын ужало ке, ми ужан вакытэ сыӵе луонлыкъёс ӧй вал, зэмзэ ик. Ваньзэ киын ужамы, сак синъёсынымы эскеримы. Туж трос потылӥмы школаосы, нылпи садъёсы ужаны. Секыт вал: аппаратъёс ӧвӧл, пробиркаос ӧвӧл… Уйин но вызовъёсы потамы. Жадьылӥмы. Но тодӥськод-а, та удысэз быръеме сярысь мон ноку ӧй жаля. Али уж сярысь малпаса но, уродэз йырам уг лыкты — ӟечез гинэ. Со сяна, серемез но.

— Серемез?

— Малпаськод, серем но тунсыко учыръёсмы уг луо шуыса? Луо… Фельдшер-лаборант луыса ужакум, гуртысьтымы но матысь гуртъёсысь трос гинэ адямиосын ужаны тупаз, тросэзлэсь анализъёссэс басьтылӥ. Кылсярысь, огпол Ципьяысь ог вить аресъем пияшлэсь (нимзэ уг поттылы, али со пияшлы 20 ареслэсь тросгес ини) вирзэ басьтӥсько. Бӧрдэ, черекъя, кышка — огъя вераса, мыным уг сётскы со. Озьыен но тазьыен, атаеныз ӵош мырдэм быгатӥмы ик сое буйгатыны, басьтӥ мон солэн чиньыысьтыз вирзэ. Ваньмыз ортчиз шуыса гинэ малпаськем вал, пияш «табере чиньыысьтым басьтэм вирме интыяз берыкты» шуыса бӧрдыны мед кутскоз-а! Серекъялод но, бӧрдод но. Нуринерысь одӥг песянаен но серемес учыр луиз. Анализ лэсьтон понна вить литр кызьзэ бутылкаосы тырыса вайиз. Мон ведь ваньзэ сое эскери ик. Но мукет дыръя сомында медаз вайы шуыса верай…

— Тунсыко луэм ужды…

— Тунсыко вал, зэм. Кин ке малпалоз, кызен но сӥтен ужан кӧш, адӟемпотостэм уж вал, дыр, шуыса. Но мон понна со ноку озьы ӧй вал. Аслэсьтым ужме мон мыло-кыдо быдэстӥ. Кыӵе ке вормонъёсы вутскон понна ӧвӧл — адямиослы юрттон понна тырши. Асме мукет удысын но син азе пуктыны ӧй быгаты.

— Соин калык но тӥледыз яратӥз, дыр.

— Яратӥзы. Адямилэсь котьку куронъёссэ быдэстыны тырши. Али ке но вазиськыкузы юрттыны тыршисько. Пӧртэм гуртъёсысь адямиосын ужамы бере, трос калыкен тодматски, эшъяськи. Дано шутэтсконэ потэме бере но кӧня ке ар ӵоже ужай али, 2017-тӥ арын гинэ дугдӥ. Нырысь ужелэсь туж мӧзми. Али каллен дыши, лэся, ини. Юнме гинэ уг верало, дыр: медицина удысын ужан — со ӧнер ӧвӧл, со мылкыд луон, быгатонлык. Ужан часъёсы гинэ ӧвӧл, суткалэн котькуд минутаз, шутэтсконъёстэк медик луоно.

— Тӥ ӵапак сыӵе ужась вал — ӝытъёсы но, уйин но юрттыны дась луись, дорысь ужъёссэ кельтыса адямиос доры дыртӥсь эмчи. Гурт калыклэн нимыныз таукарон кылъёсты вуттӥсько. Учырен пайдаяськыса, тазалыкез утён удысын ужасьёслэн ӧнер праздникенызы ӟечкыласько. Таза но шудо луэ, пересьмонлы эн сётске!

Вераськиз Наталья Жукова