Медведевъёслэн выжыысьтызы дано дышетӥсьёс

Плотникова (Медведева) Тамара Валентиновна но солэн нылъёсыз Елена Николаевна но Ольга Николаевна

Тамара Валентиновна – ӟуч кылъя но литературая бадӟым опытэн дышетӥсь. Дышетӥсь луон сярысь со пичи дырысеныз малпам. Дышетскем Арчаысь педагогикая училищеын, йылпумъям Казаньысь педагогикая кун университетэз но. 36 ар ӵоже со Покчи Лӧзя гуртысь школаын азинлыко ужа ини – вордскем школазэ уг кельты. Нылпиосты ӟуч кыллы но литературалы дышетэ, 17 ар ӵоже директорлэн визьнодан ужъёсъя воштӥсез но луэ.

– Аслам дышетскем школаям монэ, егит дышетӥсез, куке но туж умой, шуныт пумитазы. Со понна туж бадӟым тау шуэме потэ коллективлы. Ӟеч адямиосын ӵош ужамысьтым, аслэсьтым ӧнерме арысь аре кужмогес но кужмогес яратӥсько. Мон кадь нылпи дыразы тросэз пиналъёс дышетӥсь луыны малпало, но соос пӧлысь ӧжытэз гинэ та малпанзэ быдэстыны быгатэ. Нош дышетӥсь луыса ужаны – эшшо но ӧжытэз. Мон туж шумпотӥсько, куке но та ӧнерез бырйи но та ужын асме шедьтыны быгатӥ шуыса, – вера ачиз сярысь Тамара Валентиновна.

Туж шумпотыса но данъяськыса Тамара Валентиновна вера нылъёсыз сярысь. Угось кыкназы но соос анаезлэсь ӧнерзэ бырйиллям.

– Нылъёсылы ноку ӧй вера, дышетӥсьлы дышетскыны мед мынозы шуыса – та соослэн асьсэлэн быръёнзы. Но, мазэ ватонэз, таӵе быръёнзылы шумпотӥ – соос пичиысен адӟыса будӥзы, дышетӥсьлэн ужез нылъёсылы тодмо вал. Бадӟымез нылы, Елена, мон кадь ик ӟуч кылъя но литературая дышетӥсьлы дышетскиз. Казаньысь Федеральной университетэз йылпумъяз. Ини укмыс ар ӵоже Кня гуртысь школаын дышетэ. Ужзэ но яратэ, нылпиосын но, коллективеныз но огъя, тупаса ужа. Кыкнамы куспамы предметъёсынымы герӟаськем юанъёсъя вераськыны быгатӥськомы, ог-огмылы визь-кенеш сётӥськомы. Еленалэн туж данъяськымон вормонъёсыз но вань ини. Кылсярысь, 2014 арын «Наш новый учитель» грантэз вормиз, 2017 арын «Секреты дружного класса» элькун конкурслэн призёрез луиз, 2018 арын «Воспитать человека» конкурслэн муниципальной этапаз вормись луиз, «Учитель года – 2023» конкурслэн муниципальной этапаз 2-тӥ интыен пусйиськиз. Трос солэн мукет таукарон гожтэтъёсыз но. Покчиез нылы, Ольга, 2014-2019 аръёсы музыкая но англи кылъя дышетӥсьлы КФУ-ын дышетскиз. 2021 арын Санкт-Петербургысь лулчеберетъя кун институтысь магистратуразэ йылпумъяз («Сольное народное пение» специальностья). Туэ «Искусство вокального исполнительства» специальностья со ик институтысь ассистентура -стажировказэ йылпумъяз. Туннэ нуналэ Санкт-Петербургысь гимназиын вокал предметъя урокъёсты нуэ. Ольга – городской, региональной, всероссийской, калыккуспо конкурсъёслэн лауреатэз. 2019 арын «Творческая личность года» номинациын «XIV Студент года Республики Татарстан» республиканской премилэн вормисез луиз, 2022 арын Австриысь Вена городын ортчем устолыкъя калыккуспо Winterkunstfestival конкурс-фестивальын Гран-при утӥз, 2020 арын «Как на речке было на Фонтанке» калыккуспо фольклор фестивальын Санкт-Петербургысь лулчеберетъя кун институлэн ректорезлэсь приззэ утӥз. Ольга ӟуч калык кырӟанъёсты, романсъёсты, советской эстрадаысь кырӟанъёсты быдэсъя.

2014-2019 аръёсы «Зарница» ансамбльлэн солисткаез, 2020-2023 аръёсы «Молва» фолк-группалэн кырӟасез. 2019 арысен кутскыса но туннэ нуналозь СПбГИК-лэн ӟуч хорысьтыз солист. Огъя вераса, нылъёсыным мон туж данъяськисько. Оскисько, соос ас ужзылэн усточиоссы луозы шуыса, – шумпотыса маде дышетӥсь.

Тамара Валентиновналэн ужан опытэз но бадӟым, вормонъёсыз но трос. Арлы быдэ со пӧртэм конкурсъёсы пыриськыны тырше, нылпиоссэ олимпиадаослы, экзаменъёслы дася.  Дышетӥсез Балтась ёрослэн главаез трос пол таукарон гожтэтъёсын пусйиз. 2022 арын «ТР-ысь ӟучъёслэн национально-культурной огазеяськонзы» Тамара Валентиновналы ӟуч лулчеберетэз азинтэмез но йӧскалыккуспо вискетъёсты юнматэмез понна Таукарон гожтэт сётӥз. Со сяна, 2023 арын бадӟым опыто дышетӥсез «Почётный наставник» знакен но пусйизы — со сётӥське егит дышетӥсьёслы ӧнеразы юнматскыны (профессиональное становление) юрттэм понна. Нылъёсыз но, анайзы кадь дышетон удысын асьсэды шедьтыса, кема аръёс ӵоже нылпиослы тодон-валан сётозы шуыса оскисько.

Панкова Елена Юрьевна

Елена Юрьевна – Тамара Валентиновналэн двоюродной племянницаез.

Но Елена Юрьевна сярысь гожтыны кутскытозь, нырысь солэн песяез но бабаез сярысь ӧжыт гожтэме потэ. Малы ке шуоно кыкназы но соос дышетӥсьёс луиллям. Ишмурзина Анна Кузьминична ёросысь пӧртэм гуртъёсысь школаосын ужаны вутскем, ӟуч но немец кылъёсты дышетэм. Кузпалэз, Иван Гурьевич, секыт война бере аръёсы Покчи Лӧзя школаын директор луыса ужам, математика, физика предметъёсты дышетэм.

Пичи Еленаен песяен бабайёсыз, 6 аресысеныз кутскыса, рос-прос выриллям. Песяез немец кылэз дышетыны тыршем, нош бабаез – физикаез. Но Елена соослы сётскымтэ: мунёосыныз школаен шудэм, соосты ӟуч кыллы дышетэм.

Аръёс ортчыса, Покчи Лӧзяын, нош берлогес Балтасьын тодон-валан басьтэм Елена Юрьевна дышетӥсьлы дышетскыны малпа. 1992-тӥ арын йылпумъя Казаньысь педагогикая кун университетэз. Со арын ик ужаны интыяське Балтасьысь шоръёзо школае. Нош 1995-тӥ арысен гимназие ужаны выже, туннэ нуналэ но отын тырше.

Дышетӥсьлэн туж трос вормонъёсыз вань. Со таукарон гожтэтъёс но, данъян грамотаос но, «Учитель-наставник» грантын вормемез но, «За заслуги в образовании» басьтэм гадьпусэз но трос мукет вормонъёсыз. Аръёс ортчыса, соос эшшо но тросгес луозы.

– Вань сыӵе дышетӥсьёс, кудъёсыз школаын ужаса-ужаса, ужзылэсь жадё, адӟемпотостэм луо. Нош мынам воксё мукет сямен: мон арысь аре ужме юнгес но юнгес яратыны кутскисько кадь. 20 ар талэсь азьлоеныз ӵошатоно ке, али мон ужелэсь тросгес ӟечсэ, умойзэ, чеберзэ но пайдазэ адӟисько. Нылпиосы – мынам эшъёсы. Соос сыӵе тунсыкоесь! Соосын котьку егит, задор мылкыдо луиськод. Зэм, дышетӥсь быгатэ пӧртэм конкурсъёсы пыриськыса бадӟым вормонъёсы вутскыны, но мон понна, кылсярысь, ужын та валтӥсез ӧвӧл. Валтӥсез – нылпиосын тросгес дыр ортчытон, соослы тодон-валан сётон, – шуэ Елена Юрьевна.

Егорова (Александрова) Вероника Вениаминовна но солэн нылъёсыз Людмила Андреевна но Лариса Андреевна

Егорова Вероника Вениаминовна  Тамара Валентиновналэн племянницаез луэ (шонергес вераса, апаезлэн нылыз). Вероника Вениаминовна но кема аръёс ӵоже Покчи Лӧзя гуртысь школаын – гудырикошконэ 28 ар луоз – географиез но биологиез дышетэ. Кызьы школае 19 аресэн вуиз, со дырысен отын мыло-кыдо тырше.

– Оскымон но ӧвӧл, ужамелы 28 ар луэ ини шуыса. Али гинэ вал кадь Арчаысь педагогикая колледжын тодон-валан басьтӥ, собере дышетсконме Казаньын азьланьтӥ – географиен дышетӥсь луи. Школаын дышетскыкум ик, мон тодӥ ини: одно ик дышетӥсь луо. Азьло дырен ӵошатыса, али ужаны секытгес ке но (нылпиос воксё мукет), быръёнэ сярысь ноку ӧй жаля, – шуэ дышетӥсь.

Вероника Вениаминовналэн но бадӟым вормонъёсыз вань. Кылсярысь, солэн дышетскисез, Шадров Дмитрий, 2008, 2009, 2010 аръёсы географияя ваньдунне олимпиадаын призёр луиз. Мукет дышетскисьёсыз но арлы быдэ географиен но геологиен олимпиадаосын ёросын призо интыос басьто. Вероника Вениаминовна котьку классэн, анай-атайёсын ужанлы бадӟым саклык висъя. Арлэн дышетӥсез но луылӥз, пӧртэм грантъёсты но утӥз. 2014-тӥ арын «За заслуги в образовании» гадьпусэн пусъемын, 2012-тӥ арын «Наш лучший учитель» элькун грантын вормись луиз. 2014-тӥ арысен ёросысь географияя дышетӥсьёслэн методической огазеяськонэнызы кивалтэ. 2021 арын тыршыса ужамез но вормонъёсыз понна РФ-ысь Калыкез дышетонъя министерстволэн Данъян грамотаеныз пусъемын, 2012 арын ТР-лэн Президентэз Рустам Минниханов Таукарон гожтэт сётэм. Бадӟым саклык висъя Вероника Вениаминовна нылпиосты экология ласянь визьноданлы, со «Друзья природы» школьной лесничествозылэн кивалтӥсез луэ. Кема аръёс ӵоже азинлыко ужамез понна Вероника Вениаминовна пусъемын экологияя Министерстволэн Данъян грамотаосыныз, ТР-ысь нюлэс возёсъя Министерстволэн Таукарон гожтэтъёсыныз, ТР-ысь Дышетонъя но наукаосъя Министерстволэн Данъян грамотаосыныз. Арлы быдэ «Эковесна» республиканской акцие пыриськыса, «Лучшая школа» номинациын 1-тӥ интыосты басьтэ, 2020-тӥ арын аслаз семьяеныз та конкурслэн «Экосемья» номинацияз пыриськыса дипломен но экологияя министерстволэн кузьыменыз пусйиське. Мыло-кыдо ужа «Балтасинский» заказниклэн инспекторъёсыныз, Казаньысь аграрной университетэн «Агротехнологическое направление: классы, ориентированные на сельское хозяйство и предпринимательство» проект бордын ужало.

Вероника Вениаминовналэн бадӟым нылыз, Людмила, дышетӥсь-анаезлы пичи дырысеныз тазьы вераны яратэм: «Мыным туж кельше, кызьы тон ужаськод. Тон кадь ик дышетӥсь луэме потэ мынам но». Та малпанзэ Людмила Андреевна улонэ пыӵатыны быгатэм: Арчаысь педагогикая колледжез йылпумъям, собере – Казаньысь университетэз. Вить ар ӵоже Казаньысь 183 номеро гимназиын ужам, туннэ нуналэ – декретной отпускын. 

Покчи нылыз но, Лариса, Казаньын тодон-валан басьтэ, дышетӥсьлы дышетске вылэм – али со 1-тӥ курсэз йылпумъяз. Ларисалы матын пото вылэм кунгожсьӧр кылъёс.  

Медведева Нина Петровна, солэн нылыз Надежда Николаевна но пиез Евгений Николаевич

Нина Петровна Тамара Валентиновналэн кенакез, агаезлэн кузпалыз луэ. Со но Арчаысь педагогикая колледжез йылпумъяса, 1978-тӥ арын покчи классъёсты дышетӥсьлэсь, пионервожатойлэсь ӧнерзэ басьтэ. 1985-тӥ арын Казаньысь педагогикая кун университетысь математикая факультетэз йылпумъя. Ужаны кутске 1978-тӥ арын ик вордскем палъёсаз, Улын Ушма гуртысь покчиёзо школаын. Одӥг арскын Покчи Лӧзяе выже, отын 10 ар ӵоже покчи классъёсын дышетӥсь луыса ужа. Собере Нина Петровнаез дышетон ужъёсъя директорлэн воштӥсезлы тодмосто, одӥг арскын – визьнодан ужъёсъя директорлэн воштӥсезлы но математикая дышетӥсьлы. Дышетӥсьлэн огъя стажез 38 ар луэ.

Туж трос пӧртэм данъян грамотаосын, таукарон гожтэтъёсын пусъемын Нина Петровна. Покчи звеноын вить выпускез, шор звеноын одӥг выпускез вань. Дышетскисьёсыз олимпиадаосын вормисьёс но призёръёс луылӥзы, ёрос но элькун масштабен ортчись конкурсъёсын но вормонъёсы вутскылӥзы.

– Нылпиосын кусыпъёсы котьку умой луизы: ог-огмес валамы, гажамы, ог-огмылы оскимы, юрттӥмы. Предметъёсъя тодон-валан сётон бордын гинэ ӧвӧл, нылпиослэсь ӟеч адями будэтон вылын ужаны тырши. Мон малпасько, та дышетӥсьлэн туж бадӟым ужез шуыса, — малпанъёссэ шара вера Нина Петровна.

Дасо аръёс ӵоже школаын нылпиосты дышетыса, 2016-тӥ арын Нина Петровна дано шутэтсконэ потэм. Ужезлэсь нырысь мӧзмем ке но, огезлы туж шумпотэ: солэсь ужзэ азьланьтӥсьёсыз вань. Малы ке шуоно аслаз нылыз но, пиез но дышетӥсьлэсь ӧнерзэс бырйиллям.

Нылыз Надежда Николаевна Медведева но, 2001-тӥ арын Арчаысь педагогикая колледжез йылпумъяса, покчи классъёсты дышетӥсьлэсь но педагог-организаторлэсь ӧнерзэ басьтэ. 2007-тӥ арын, Казаньысь гуманитарно-педагогической университетэз йылпумъяса, ӟуч кылъя но литературая дышетӥсь луэ. 2012-тӥ арын, переподготовка ортчыса, историен дышетӥсьлэсь ӧнерзэ но басьтэ.

Анаез кадь ик, тодон-валан басьтыса, 2001-тӥ арын вордскем палъёсаз бертэ но Покчи Лӧзя гуртысь школаын ужаны кутске: нырысь ӟуч кылэз но литератураез дышетэ, берлогес – историез но обществознаниез. Ужез борды рос-прос басьтӥське Надежда Николаевна. 22 ар тыршемезлэн умой бервылъёсыз но вань. Кылсярысь, 2016-тӥ арын Татарстан Республикалэн грантэзлэн «Учитель-мастер» номинацияз вормись луэ. 2015-тӥ арысен Балтась ёросын историез но обществознаниез дышетонъя консультант-тьюторъёслэн одӥгез луэ, 2020-тӥ арысен историяя экзаменъёслы дасясь ресурсной центрын но тырше. Ёрос, элькун масштабен басьтэм грамотаосыз лыдъяса быдтонтэм Надежда Николаевналэн.  Озьы ик дышетскисьёссэ пӧртэм конкурсъёсы, олимпиадаосы мыло-кыдо дася, вормонъёссы но вань.

– Туннэ нуналэ 8-тӥ классын дышетскисьёслэн кыкетӥ «анайзы» луисько. Та мынам куинетӥ выпуске луоз ини – 2010-тӥ но 2018-тӥ арын выпускъёсы вал. Нылпиосын ужаны мыным туж кельше, сотэк 22 ар школаын ужаны ӧй быгатысал, дыр. Историез дышетӥсько бере, школьникъёсылы вордскем палъёсысь чебер интыостӥ экскурсиос ортчытъясько, ветеранъёсын но ёросысь дано адямиосын пумиськонъёс радъясько, проектъёсты но ӵошен дасяськомы. Огъя вераса, мӧзмыны дырмы ӧвӧл, –  шуэ Надежда Николаевна.

Медведев Евгений Николаевич, Нина Петровналэн пиез, апаез кадь ик Казаньысь гуманитарно-педагогической университетэз йылпумъя, басьтэ математикая но информатикая дышетӥсьлэсь ӧнерзэ.

2009-тӥ арын со, егит дышетӥсь, ужаны кутске Ципья шоръёзо школаын. 7 ар ӵоже нылпиосты информатикаен дышетэ, экзаменъёслы, олимпиадаослы дася.

2017-тӥ арысен ужан удыссэ Евгений Николаевич воштэ. Со дырысен воргорон Балтась ёросысь вневедомственной охраная ёзэтын тырше.

Кошкина (Мамкина) Тамара Николаевна

Кошкина Тамара Николаевна Плотникова Тамара Валентиновналэн племянницаез луэ. Со но дышетӥсьлэсь ӧнерзэ быръем. Туннэ нуналэ Малмыж городысь 2-тӥ номеро школаын ӟуч кылъя но литературая дышетӥсь луыса ужа. Берло кык арзэ школалэн директорезлэн визьнодан ужъёсъя юрттӥсез но луэ. Тани мар шуэ ачиз Тамара Николаевна дышетон удысэ вуэмез сярысь:

– Пичи дыръям мон котькуд гужемез песяе но бабае дорын ортчытӥ, Покчи Лӧзя гуртын. Ӵапак соку ик дышетӥсь луыны малпанъёсы кылдӥзы, соку трос художественной литератураез лыдӟыны кутски. Бадӟым будэмея, дышетӥсь луыны малпанэ юнгес но юнгес луиз. Озьы мон Арчаысь педагогикая колледже дышетскыны пыри, берлогес Вятской кун гуманитарной университетэз йылпумъяй. Нялтас вераса, отын ик аспирантураын но дышетски.

Егит дышетӥсь ини 10 ар ӵоже яратоно интыужаз тырше. 2015-тӥ арын асьсэ зонаязы «Арлэн дышетӥсез» конкурсын 2-тӥ инты басьтэм.  Арлы быдэ солэн дышетскисьёсыз экзаменъёссэс вылӥ баллъёслы сёто, олимпиадаын но призо интыосын шумпотто.

Дышетӥсьлэн девизэз таӵе: «Котькуд нылпиез яратоно, валано. Соку соос но тонэ яратозы но валалозы». Та девизэз сярысь вунэтытэк, Тамара Николаевна вань нылпиосыныз но, атай-анайёсыныз но умой кусыпъёсты возьыса, азинлыко ужаны быгатэ.