Медведевъёслэн выжыысьтызы дано дышетӥсьёс (2 люкет)

Медведева Инна Ивановна но солэн нылыз Александра Львовна

Инна Ивановна Медведева – Покчи Лӧзя школаысь тужгес бадӟым опытэн дышетӥсь. Туэ сӥзьыл солэн нылпиосын ужамезлы 39 ар луэ ини! Кӧня вал солэн дышетскисьёсыз, кӧня выпускез…

Инна Ивановна ас дыраз Арчаысь педагогикая колледжез, Казаньысь педагогикая кун университетэз йылпумъям. Городэ кыльытэк, вордскем палъёсаз улыны но ужаны бертэм. Одӥг ар ӵоже школаязы пионервожатой луыса ужам но собере покчи классъёсты дышетыны кутскем. Со дырысен кӧня ке дасо аръёс ортчизы ке но, Инна Ивановна аслэсьтыз котькуд дышетскисьсэ тодаз возе, шуныт кылъёсын гинэ соос сярысь вера:

– Мыным нылпиосын ужаны котьку кельшиз. Нылпиос но, шумпотымон, яратӥзы, кылзӥськизы. Али мынам дышетскисьёсылэн анай-атайёссы но – со куке но мон дорын тодон-валан басьтыса потэм нылпиос. Табере соослэн нылпиоссы мон дорын дышетско. Соослэсь ӟеч кылъёссэс кылыны мон понна туж шумпотымон – дышетӥсьлэн ужезлы та самой бадӟым дунъет.

Инна Ивановналэн Александра нылыз но анаезлэн сюрестӥз мынэ – Казаньын дышетскыса, городысь школаын англи кылъя дышетэ, туннэ нуналэ ёросэ бертыса, Балтасьысь шоръёзо школаын нылпиослы тодон-валан сётэ.

Медведева Елена Юрьевна

Балтась школаын ик Медведев дышетӥсьёслэсь выжызэс азинтыса ужа Елена Юрьевна Медведева но. Арчаысь педагогикая колледжын, собере Казаньысь педагогикая университетын тодон-валан басьтэм Елена Юрьевна покчи классъёсын ужа. Егит дышетӥсь школалэн улоназ но мыло-кыдо пыриське, нылпиосты но пӧртэм конкурсъёсы кыске, анай-атайёсын но рос-прос уж нуэ.

Мухина Людмила Ивановна, солэн атаез Кушаев Иван Семёнович, агаез (дядяез) Кушаев Василий Семёнович, Медведева Зинаида Семёновна, Медведева Мария Никитична

Медведевъёслэн выжыысьтызы эшшо тужгес дано но тодмо луись дышетӥсьёс пӧлын Кушаев Иван Семёнович но солэн матысь ӵыжы-выжыосыз луо. Тани мар тодаз вае атаез сярысь солэн нылыз Людмила Ивановна Мухина (нялтас вераса, ачиз но гумырез ӵоже дышетӥсь луыса ужам кышномурт):

– Атае туж визьмо, йӧно дышетӥсь вал. Сыӵеос сярысь верало, ас ужезлэн зэмос усточиез шуыса. Дышетскисьёсыныз огъя кыл шедьтыса, рос-прос ужзэ нуиз. 27 ар ӵоже нылпиосты историлы но удмурт кыллы дышетӥз, физкультурая урокъёсты но нуиз, кӧня ке ар ӵоже школаын директорлэн юрттӥсез луыса но ужаз. 25 ар ӵоже парторг но луиз. Атайме туж яратӥзы дышетскисьёс – али ке но со сярысь ӟеч кылъёс верась адямиос трос. Сое туж гажаз гурт калык но – совето дыръёсы гуртын грамотной адямиос ӧжыт луэмысь, Покчи Лӧзялы матын луись удмурт гуртъёсысь калык атае доры документъёссэ радъяны ветлӥз. Нош со котькинлы юрттыны дась вал. Сыӵе тӥни паймымон йӧно адями вал атае.

Людмила Ивановна пичи дырысеныз атаез шоры учкыса, со кадь дышетӥсь луыны малпам. Луэм солэн мукет яратоно дышетӥсез но, кудӥз егит нылмуртлы дышетон удысэ вамыштыны мылкыд сётэм.

– Мон пичи дырысеным дышетӥсь луыны малпай, – азьланьтэ веранзэ Людмила Ивановна. –  Бускельын Мария Емельяновна нимо дышетӥсь улэ вал. Ӵемысь со монэ дораз ӧтьылӥз, ми соин книгаосты лыдӟылӥмы, вылезлы дышетскимы. Мурка сярысь дышетскем нырысетӥ кылбурме али ке но тодам возисько. Пичи дырысеным эшъёсыным школаен шудылыны яратӥ, асме котьку дышетӥсен гинэ адӟисько вал. Бадӟым будэмея, малпанэ юнгес но юнгес луиз. Озьы, 1970-тӥ арын Казаньысь педагогикая институтэз йылпумъяй, ӟуч кылъя но литературая дышетӥсьлэсь ӧнерзэ басьтӥ.

1970-тӥ арын ик Людмила Ивановна Покчи Лӧзя гуртысь школаын дышетыны кутске. 2000-тӥ арозь, дано шутэтсконэ потытозяз, аслэсьтыз ужзэ яратыса  быдэстэ. Куать выпускъёсты поттэ, трос нылпиос понна яратоно кыкетӥ анай луэ. Пенсие потэмез бере но, кема аръёс ӵоже нылпиосызлэсь мӧзме.

Людмила Ивановналэн атаезлэн агаез но, Василий Семёнович Кушаев, ӧнерезъя дышетӥсь луэм. Йылпумъям Арчаысь педагогикая колледжез, соку ик интыяськем ужаны Покчи Лӧзяысь школае физкультурая дышетӥсь луыса. Но Василий Семёновичлы кема ужаны кылдымтэ – Быдӟым Атыкай ож кутскемлэсь азьло ик, егит воргоронэз Саратовысь командиръёслэн школаязы дышетскыны басьтӥллям. Ожысь бертыны Василий Семёновичлы кылдымтэ ни. Ватэмын Украинаын.

Людмила Ивановналэн анаезлэн двоюродной апаез но, Мария Никитична Медведева, дышетӥсь луэм, покчи классъёсысь нылпиослы тодон-валан сётэм. Нялтас вераса, та ужын со трос ужамтэ – берлогес кема аръёс ӵоже «Азьлане» газетлэн редакцияз тыршем.

Ужысь но ожысь ветеран, КПСС-лэн членэз, коммунистической ужлэн ударникез луись Зинаида Семёновна Медведева (Людмила Ивановналэн ӵужапаез) но Медведевъёслэн выжыысьтызы дано дышетӥсь (со сярысь газетамы 2021-тӥ арын материал потэм вал). Дышетскемезъя дышетӥсь ӧй вал ке но, Зинаида Семёновна 1963-тӥ арысен Казаньысь «Спартак» пыдкутчан фабрикаын производственной дышетонъя мастер луыса ужа, 35-тӥ номеро училищеысь егит дышетскисьёсты пыдкутчанэн герӟаськем ужъёсын вырыны дышетэ. Зинаида Семёновналэн группаосыз конкурсъёсын но призо интыос басьто, дышетсконъя, практикая но дисциплиная но умойёсыз пӧлын луо.

Тӥни сыӵе дано адямиосынызы, дышетӥсьёсынызы данъяськыны быгатэ Медведевъёслэн династизы. Соосты ваньзэсты герӟазы но герӟало нылпиосты яратон, дышетскисьёслы тодон-валан сётыны тыршон, ас ӧнерзэс но ужзэс гажан.

Медведевъёслэн династизы азьпалан но мед пушъёз, мед луозы ёросамы эшшо но тросгес дано дышетӥсьёс но соослы тау карыны быгатӥсь дышетскисьёс.

Бен, трос-а со, ӧжыт-а – 600 ар? История понна, оло, ӧжыт но, дыр. Но одӥг выжыысь династия понна 600 ар дышетэм стаж – со номаин ӵошатонтэм бадӟым лыдпус…