Механизатор Андрей Егоров: «Пичи дырысен техникаен вырыны яратӥ»

Музъем ужасьлэн ӧнерез гурт удысын котьку самой гажамон но данъямон ӧнеръёс пӧлын вал. Али но со озьы. Нянез будэтон понна, вордскем палъёстэ, музъемез яратон, ужедлы сюлмысен сётскыса ужан гинэ уг тырмы — та уж техникаез туж умой тодэмез кулэ каре. Ӵапак Андрей Петрович Егоровлы тупамон кылъёс та — ачиз ужась, музъемез яратӥсь, техникаен но быгатыса выре. Зэмос гурт воргорон.

1976-тӥ арын Вылын Ушма гуртын вордскем, быдэ вуэм героймы котьку тодэм: со вуоно улонзэ гурт удыслы сӥзёз. Пӧртэм техникаез люканы, тупатъяны солы азьло дырысен ик кельшем (туннэ нуналэ но Андрей Петрович шумпотэ, пичи дыръяз кылдэм хоббиез, аръёс ортчыса, яратоно ужезлы пӧрмыны быгатӥз шуыса). Соин вуоно ӧнерзэ со кема бырйымтэ — 9-тӥ классэ йылпумъямез бере, 1991-тӥ арын, Арчаысь профессиональной училищее дышетскыны пырем. Дышетскон юртсэ со «техник-механик» ӧнерез басьтыса йылпумъя, квалификациез — «тракторист-машинист». 1994-1996-тӥ аръёсы армиын служить каре. Вордскем гуртаз бертэм бераз, Андрей Петрович гуртаз ужаны кыле. 1997-тӥ арысен со ужаны кутске Ленин нимо колхозын (али «Сурнай» общество) механизатор луыса. Тани кызь куинь ар ӵоже ини со та интыужын тырше, механизатор луыса ик. Сомында аръёс ӵоже ужам ДТ-75 тракторез али но оскымон эшез луэ.  

— Механизаторлы ар ӵоже но уж шеде — гужем но, толалтэ но. Тулыс но сӥзьыл — гырон, усыян, культивация; гужем — силос лёган; толалтэ — техникаез ремонт карон, озьы ик трактористъёс скал кыскон фермаын но ужало. Огъя вераса, буш дырмы ӧвӧл, механизаторъёс ноку ужтэк уз кыле. Ма, гуртын котькуд ужасьёслэн тросэзлэн сыӵе улонзы — уж но уж. Кыӵе куазь луиз ке но, зор-а, пӧсь-а, лымыя-а, ужез берлолы кельтыны уг яра. Сезонной ужъёс дыръя шутэтскон, праздник нуналъёс сярысь но вунэтӥськомы, — вера Андрей Петрович.

Макем трос ужъёс быдэстоно уг луы ке но солы ужаз, гуртысь мукет интые кошкыны малпанэз но луымтэзы Андрей Петровичлэн. Гуртын будэм адями гуртлы кулэ луымон мед луоз, пе. Усто механизатор ужан опытэныз егитъёсын но вошъяськыны дась. Уж дораз но сое ваньзы гажало, солэсь малпанъёссэ санэ басьто.

2019-тӥ арын вылӥ вормонъёсы вутскемез понна Андрей Петрович Егоров район главалэн Таукарон гожтэтэныз пусйиськиз. Механизаторлэсь мыло-кыдо но азинлыко ужамзэ район масштабын пусъемзы воргоронэз туж шумпоттэм.

— Ужмы капчи ӧвӧл. Котьку руль сьӧрын пуконо луэ, ӵукнаысен ӝытозь, одӥг нунал но кельтытэк. Кызьы пусйи ни, шутэтскон нуналъёсты но котьку ум адӟиське. Но мон малпасько, та механизаторъёсты уг ӝожомыты шуыса — мар шуид ке но, бадӟым уж ужаськомы. Та мылкыдмес ӝутэ. Милям ужмы — ки кужымез кулэ карись уж. Пӧртэм инкуазь условиосын ужаны тупа. Соин ужмес дунъяны быгатэмзылы ми тау кариськом, — пусъе Андрей Петрович.

Туннэ нуналэ дано но опытэн механизатор семьяеныз Покчи Лӧзя гуртын улэ. Вордскем палъёсаз, яратоно интыужаз тырше, вӧзаз оскымон семьяез — ваньмыз кызьы малпам вал, озьы ик улонэ пыӵам.