Мылкыд гинэ медло

Кин ке монэным, оло, соглаш но уз луы, но, мынам малпамея, со урод ӧвӧл, соос пӧлэстӥськыса, огзэс огзы быдэс карыса азинтӥсько.

Зэм но, туала дыре но черк праздникъёсын артэ адямиослэн улоназы бадӟым инты басьто калык шулдыръяськонъёс но.

Тани кемалась ӧвӧл гинэ, 19 толшоре, пусйимы одӥгзэ бадӟымзэ черк прадникез — Йӧвылэпотонэз (Йӧвылэсулотонэз). Соин валче Ципья, Покчи Лӧзя но Биктеш черкъёсын ортчизы праздниклы сӥзем вӧсяськон службаос. Котьку сямен ик, Покчи Лӧзяын, Вуж Кушкетын но Биктешын нимысьтыз лэсьтэм люкмесъёсын вуэз вӧсязы. Мылкыд карисьёс со вуын пыласькыны быгатӥзы.

Азьло дыре Йӧвылэпотон дыръя гуртъёсын салазки борды гырлы ошыса нискылаллям шуыса тодӥсько. Ми пичи дыръя но сыӵе йылол вал на. Одно ик та нуналэ кин пу салазкиен, кин магазинысь басьтэм салазкиен, нош куд-ог амалоосыз локанэ гырлы думыса, нюлэскы нискыланы ветлылӥм. Кыӵе шулдыр луоз вал! Шумпотымон, та чебер йылол туала дыре улӟытӥське шуыса — удмурт гуртъёсын Йӧвылэпотон нуналэ калык шулдыръяськонъёс ортчытон чебер сямлы пӧрмыны кутскиз.

«Праздникъёсты пусйыны тыршиськом. Тани январе гинэ но нылпиос понна «Ёлка» радъямы, Ымусьтонэз, бере кыльыса ке но, ортчытӥмы. Вуж Выль арез быдэс гуртэн туж шулдыр пусйимы. Инмарлы тау, адямиос таӵе ужрадъёсы люкасько. Тани Йӧвылэпотонэз но, огазе люкаськыса, шулдыр ортчытӥмы. Пиналъёс клуб азьын гурезьысен нискылазы, егитъёс футбол шудӥзы. Табанянь пыжимы, чай пӧзьтӥмы. Сюлмысь мызган гуръёс улсын юмшамы. 80-90-тӥ аръёсысь кырӟанъёсын дискотека но ваньзылы кельшиз, дыр, шуыса малпасько. Огъя вераса, мылысь-кыдысь шулдыръяськимы», — вера Вуж Кушкет гурт клублэн кивалтӥсез Светлана Щербакова.

Тагашурын но кыкетӥ арзэ ини Йӧвылэпотонэз огазе люкаськыса пусъё. «Туэ ӝук пӧзьтоно каримы. Самоварен чай быректӥмы. Клубын гурт калыклэн юрттэменыз ӝӧк дасямы. Азьвыл ик, пичиослы нискыланы шуыса, клуб азе гурезь лэсьтӥмы. Урамын юмшамы, клубын дискотека радъямы. Праздникмы шулдыр ортчиз. Гурт калыклы кельшиз, тау карыса кошкизы. Гурт калык шуэмысь, шулдыръяськонамы, тагашуръёс сяна, Ципья палъёсысь но адямиос лыктӥллям вал», — Тагашурын шулдыръяськемзы сярысь ивортӥз завклубзы Ирина Конькина.

Праздник ортчытон ласянь тужгес амалоосыз вукогуртъёс луиллям, дыр. Калык шулдыръяськонэз радъян вылысь завклубзы, Перемечева Антонида, гуртысь магазиназы коньдон люкан понна пияла банка пуктэм. Собере, шулдыръяськонэз ортчытон радлыкен герӟаськем ужпумъёсты, кылдэм юанъёсты сэрттон-пертчон понна, Ватсап шуэм приложениын нимысьтыз группа кылдытӥллям. «Гурт калык туж мыло-кыдо пыриськиз шулдыр ужрадэз ортчытонэ, — шуэ Вукогурт клублэн заведующиез. — Гурт старостаен Степанов Юрий Афанасьевичен ӵош егитъёс пу дасязы. Колхоз тракторъёс клуб азез сузязы. Огъя вераса, кин маин юрттыны быгатӥз: кин сиён-юонэн, кин ужен. Андреев Яша, Григорьев Сергей, Фёдоров Коля но мон ӝук пӧзьтӥмы. Щербаков Сашаен Сидоров Юрий ческыт чай дасязы. Бакагурезьын бен кӧня адямиез вал! Пичиез но, пересез но, тодмоез но, тодмотэмез но (Ципьяысь но, Починкаысь но лыктӥллям — О.П.) — ваньзы шулдыр нискылазы, шудо серекъям куараос быдэс гуртэз улӟытӥзы кадь со ӝытэ. Клуб азьын но шулдыръяськимы: мызган гуръёс улсын юмшамы, шудӥмы. Кылсярысь, воргоронъёс но нылкышноос канатэн кыстаськизы, мылкыд каремъёс футбол шудӥзы, пичиос ледянкаосын, скакалкаосын бызьылӥзы. Бератаз шулдыръяськонмес клубын азинтӥмы, сюлмысь юмшамы, дискотека но ортчытӥмы». Табере вукогуртъёслэн мылкыдзы пуромем Вӧй праздникез но тазьы ик шулдыр пусйыны. Ӵектон но сётӥллям ини: нош ик магазинэ банка, пе, пуктоно. Туж умой малпан, мон сямен.

Мукет гуртъёсын но: Починкаын, Турьяын, Ӟаныын,Сырьяын… - мыло-кыдо калык улэ шуыса выльысь валамы. Йӧвылэпотонэз соос но туж шулдыр нискыласа, юмшаса, ческыт сиёнъёсын ог-огзэсты кунояса ортчытӥллям.

Трос-а кулэ адямилы шулдыръяськон понна, мылкыд гинэ медло.