Нош ик шулдыртӥзы

Ёросысь гуртъёсын ортчем концертъёсы пыриськем коллективъёслэн но нимаз быдэстӥсьёслэн быръем номеръёссы люкамын вал одӥг бадӟым шулдыр ужрадэ. Котькуд аре кадь ик, шумпоттӥзы учкисьёсты лулысь-сюлмысь быдэстэм кырӟанъёс но эктонъёс. Но туэ фестивальлэн аспӧртэмлыкез но вал. Сценаез эшшо но чебер каризы праздник ужрадэ ӧтем куноос: Кукмор ёросысь Нырья культура юртысь «Сактон» калык фольклор ансамбль но Марий Эл Республикаысь Мари-Турек ёросысь «Арбор вел» пор фольклор ансамбль.

Вань артистъёслэн выступлениоссы но туж кельшизы. Шумпоттӥзы егит мусо но чебер удмурт нылашъёс, усто пияшъёс, фольклор коллективъёс. Кельшизы выль кырӟанъёс но тодмо дышем кырӟанъёсты сыӵе быгатыса выль сямен быдэстонъёс. Паймытӥзы удмурт эктонъёсы бигер калыкысь пыриськем адямиос. Нимен-нимен вератэк гинэ, вань артистъёсты но коллективъёсты маин ке пусйыны луысал... Учкисьёслы ӵектэм чебер концерт сьӧрын — уно сюлмаськонъёс, тыршемъёс, быдэстэм ужъёс, репетициос, дасяськонъёс. Ваньзэ тае валаса, вань артистъёслы, ужрадэз дасянэ кужымзэс понэм муртъёслы, огъя вераса, вань пыриськем адямиослы зэмос шулдыр ӝыт кузьмамзы понна учкисьёслэн нимынызы тау карем потэ.

Но, удмуртъёс вожзэс медаз вае вал, мон понна та ӝыт пор праздниклы пӧрмиз. Валасько, татын улыса, выжыосмыя асьмелы матын луись пор калыкез та палась удмуртъёс умой тодо но соослэн устолыксылы уг паймо шуыса. Нош палэнысь, та калыклэсь эктон-кырӟанъёссэ аслыз нырысьсэ усьтэм мурт понна пор коллективъёслэн выступлениоссы, ӟуч кылын вераса, «экзотика» выллем луизы. Соосты учкыса пукыкум валай, малы кылэз тодытэк но одӥг калыкысь адямиос мукет калыклэсь фольклорзэ, кырӟан-эктонъёссэ тунсыкъяськыса пумитало, концертъёссэс учкыны лыкто, кылэз тодытэк но кельшыто. Тужгес но куке сцена вылэ пичи артистъёс пото. Макем бен синмаськымон эктӥзы но кырӟазы, вылаз ик крезьгур инструментэн но шудӥзы пичи пор пияшъёс но нылашъёс! Бадӟымъёсыз но бере ӧз кыле, асьсэды устоен возьматӥзы. Фестивальлэн нимаз ик гожтыса пыртэм пор культуралэн люкетэз та ӝытэ, зэмзэ но, сюлме йӧтӥсь вал. Чузъяськем кичабонъёс но возьматӥзы, быдэс заллы но соослэн выступлениоссы туж кельшизы шуыса. Жаль, вань пыриськем артистъёс тау карон кылъёсты лыдӟыны но кылыны уз быгатэ, дыр — районамы улӥсь поръёс бигер кылын потӥсь газетэз басьтыса лыдӟо шуыса тодӥсько. Озьы ке но со таукаронэз верам потэ ик. Таин валче озьы ик тау карыны луэ выступлениос бере кыл кутэм Балтась удмуртъёслэн огазеяськонзылэн кивалтӥсезлы Никитин Владислав Валентиновичлы. Со ке но концертэ пыриськем финн-угор эшъёсмес нимысьтыз пусйыса вераз. Палэнысь лыктэм (сцена вылын награждение дыръя потэм коллективъёс пӧлын но палэнын султэм) куноос сярысь вераны но ӧз вунэты...

Екатерина Салтыкова

Туспуктэмез авторлэн