Ог-огедлы юрттытэк, зэмос семья кылдытыны уз луы

8-тӥ пӧсьтолэзе быдэс Россиын семьялэн, яратонлэн, осконлыклэн праздникез пуйиськиз. Сӥё-дано ужрад Муромысь дун-сьӧлыктэм Пётрлы но Феврониялы сӥземын. Соослэн яратон историенызы тодматскыны луэ пӧртэм вотэсбамъёсын но. Нимысьтыз пусйыны кулэ огзэ – соослэн яратонзы, дунне шоры учкемзы паймыто но адӟем карымон луо. Семьялэн данлыкез туала дырлы туж бадӟым луэ: семьяяз ке адями шудо, ужан интыяз но солэн ваньмыз лад-лад мынэ.

Кузпалъяськон – со писпулэн сяськаяны кутскем улваез кадь. Сюлмысь тыршид ке, со вайын матысь дыръёсы пушъетъёс потозы, дыр ортчыса, емышъёсыз но вуозы. Писпу каллен пушъёз – семьяед йылоз. Но чылкыт яратон мылкыдъёс сӥяны кутскизы ке, ваньмыз куасьмоз но сисьмоз. Ваньзэ быдтыны но тӥяны туж капчи… Самой секытэз – чылкыт яратонлы улон сётон, кудӥз понна кык адями нюръяськыны быгатоз.

2023-тӥ ар Пор-Кутеш гуртысь Трофимовъёслэн семьязы понна нимысьтыз луэ – Григорий Васильевич но Зинаида Ивановна зарни сюанзэс пусъё. Сюлмысь ӟечкыланъёс соос доры коньывуон толэзе гинэ вуозы на. Кемалась ӧвӧл ортчем праздникен валче ӝыны даур ортчытэм кузпалъёсын тодматсконо кариськи.

Пор-Кутеш гуртын валтӥсь урамез сяна, вань на эшшо одӥг урам – Зелёная. Зэмзэ но, интыезъя нимамын кадь. Гужем вакытэ та урамлэн чеберлыкезлы синмаськымон: огпалаз шур бызе, отын ик ошмес радъямын (татчы пӧртэм интыосысь чылкыт ошмес вулы лыкто), мукет палаз – нюлэс. Котыраз сайкыт возьёс, ӵыдонтэм вож буёлъёсын быдэс инкуазь кисьтӥськемын татын! Таӵе чебер интыын кызьы чебер семья уд кылдыты! Соин ик, дыр, Трофимовъёслэн семьязы гуртоосыз понна адӟем карымон луэ.

Григорий Васильевич но Зинаида Ивановна кыкназы ик вордӥськизы Пор-Кутеш гуртын. Вань гурт нылпиос кадь ик юртъер котырысь ужен выризы. Улонзы огсыр радызъя мынӥз, улонлы ӝожтӥськытэк будӥзы, школаын дышетскизы.

Егитъёс понна туж шулдыр вакытъёс котьку огазе люкаськыса ортчо. Пор-Кутеш гуртысь егитъёс но дырзэс тунсыко ортчытӥллям: пиос клубе люкаськыса бильярд яке домино шудо вылэм, нылъёс книга лыдӟыны яратӥллям. Гужем нуналъёсы вань егитъёс возь вылэ люкаськылӥллям, шулдыръяськиллям. «Нокыӵе праздникъёсты ум кельтӥське вал. Вань шулдыръяськонъёсы люкаськылӥм. Егит дырмы туж шулдыр ортчиз», – огъя тодэ ваёнъёссэс верало кузпалъёс.

1973-тӥ арын, сӥзьыл, 19 аресъем Григорий улон сюрессэ Зинаида нылашен герӟаз. «3 нунал улыса вуим ӵошен, собере армие келяй», – вера Зинаида Ивановна. Егит кузпалъёслы 2 арлы люкиськоно луэм, Григорий Васильевич Германие ракетной войскаосы службазэ ортчыны кошке. «Служба секыт ӧй вал. Ми троссэ ремонт паласен ужамы. Озьы ке но, пинал ожгарчилэсь курссэ но ортчыны вуим», – маде Григорий Васильевич. Кузпалэз армиын дыръя, Зинаида Ивановна улӥз бызем юртаз ик. «Вордскем юртам бертыны малпанъёс чик ӧй вал. Кытчы кошкид, отын ик улоно. Эшшо ке кузпаллэн анай-атаез ваньмыз паласен юрттыны дась вал, кенеш сётӥзы. Одӥг пол но секыт кылъёссэс ӧй кылы. Вань улытозямы ӟеч мылкыдъёсын гинэ улӥмы, ог-огмылэсь кылзӥськыса, валаса, керетытэк», – улэмзэ вера Зинаида Ивановна. Армиысь витён вакытаз ужаз школаын лаборантка луыса, собере покчи классъёсын воспитатель луиз. Огъя школаын 10 ар пала ужаз, собере колхозэ ужаны пыриз, татын 28 ар ужаз.

Армие кошкытозяз Григорий Васильевич ужаз кутам арбериосты лэсьтонъя фабрикаын, бертэм бераз но отчы ик ужаны интыяськиз. Татысен сюресэз сое вуттӥз «Искра» колхозэ, бератаз со «Дуслык» колхоз луиз. Огъя ужан стажез – 44 ар пала. «Кыӵе дыръёс но ӧй вал. Шофёръёс со дыре туж кулэ вал, категориен адямиос ӧжыт, соин ик трос ужано луэ вал. Куддыръя ӵукна но бертоно луиськиз. Ужаны пырем бере, ужано ини, нокытчы уд пыр», – малпанъёссэ шарая Григорий Васильевич.  

Улон сюрессы пӧртэм интыосы но вуттӥз, огез гинэ воштӥськытэк кылиз: ог-огзэс валан но сюлмысь гажан. Кузпалъёс вордӥзы кык нылпиосты: Ольга нылзэс (1974) но Олег пизэс (1980). Нылпиоссы шумпоттӥзы асьсэлэн тыршеменызы но мыло-кыдо ужаменызы. Соос понна ноку но возьытэ усёно ӧз луы. «Кыкназы ик тыршисесь, ужлэсь уг кышкало. Адямиос юрттыны ӧтчало, оско соослы. Асьсэос шудо гинэ мед луозы, мар кулэ на милемлы», – верало кузпалъёс. Ольга нылзы 17 аресэн бызиз. Юанэ соку ик кылдӥз: «Тӥ пумит ӧй вал-а вазь бызе шуыса?» «Малы пумит луод? Сергеез (эмеспизы – ред.) гуртысен тодӥськом вал. Ми пумит луысалмы ке, азьланяз милемлы ик умойтэм луысал. Нош тазьы аслаз быръем кузпалэз, туннэ нуналлы 3 нылъёсты будэто», – валэктэ Зинаида Ивановна.

Кузпалъёс 50 ар ӵоже ог-огзэс яратыса, гажаса, котькуд ужазы кенешыса уло. Туннэ нуналлы соос туж шудо адямиос: узыр песяй-бабай, ӵужанай-ӵужатай луо. Нылпиоссы ӵемысь куное бертыло, Олег пиез Людмила кышноеныз ваче пумит гинэ яна потыса улэ, быдэ вуо Снежана нылзы но Тимур пизы. Людмила кензы «анай», «атай» шуыса вазе. «Милям номыр нимаз ӧвӧл, ваньзэ ӵошен ужаськом, кенешыса огазе тыршиськом. Мон скал уг ни кыскиськы, нош Люда милемлы йӧл но пыртэ, йӧлпыд лэсьтыны но сётэ. Мон солы бакчаысь кияр бичасько, со сылалтэ. Гриша солы компот лэсьтыны сутэр бича. Озьы ик улӥськом: Снежана коркамес утялтэ, Тимур бабаез котырын котьку юрттӥськыса ветлэ. Огазе валаса, кенешыса улыны кулэ, сотэк уг луы. Дыраз вазьытэк но кылёно», – ватса Зинаида Ивановна. Ольга нылзы Сергей кузпалэныз озьы ик Пор-Кутеш гуртын уло. Шумпотонзэс юнмато быдэ вуэм Кристина но Ксения нылъёссы, Кира нылзы 4-тӥ классэз йылпумъяз.

Арлыдо даурзэс капчиято внукъёссы но Диана правнучказы. Зинаида Ивановналэн ӝӧк вылаз котьку ческыт сиён дасямын, котькуд шутэтскон нуналъёсы пӧраськыса матысь адямиоссэ дораз вите. «Тани али гинэ нылпиос бертӥллям вал. Соослы салат но лэсьтӥсько, пыжиськисько но. Сотэк уг лу. Сьӧразы сумкаосазы но тырыса лэзисько али», – шуэ нылкышно.

Гуртооссы понна Григорий Васильевич но Зинаида Ивановна туж данъяськымон кузпалъёс луо. Бускельёсынызы тупаса, ог-огзылы юрттыса, секыт дыръёсы юн кусыпъёс возьыса уло. «Милям татын урамын 4 корка гинэ. Ваньмы одӥг семья кадь луим ни. Ог-огмылы котьку юрттыны дась, шуг-секытъёсты но ӵошен вормиськомы», – вера Зинаида Ивановна.

«Семьяын шудо улонлэн нокыӵе лушкемез ӧвӧл. Ачид бордысь мае поттӥськод, со ик тыныд берытскоз. Яратон мылкыд сюлмысен ке мынэ, сое нокин но сӧрыны уз ни быгаты. Ӵошен вань ужъёсты ке лэсьтӥд, сямдэ пичияк лапкомытыса ке улӥд, ваньмыз умой луоз», – малпало кузпалъёс.

Зэмзэ вераса, Трофимовъёслэсь семьязэс мон пичи дырысен ик тодӥсько. Соин ик син азьын пуксемын зэмос шулдыр, шудо улӥсь семья. Бускелез ӵапак мынам ӵужанае. Вераськонмес йылпумъяса, со доры куное пыри, «милям кадь бускельёс ӧвӧл, дыр, туж умоесь, визьмоесь, котьку юрттозы, син гинэ медаз усьы», – шуэ ӵужанае. Озьы ик вань, кузпалъёслэн небыт сюлэмзы но лякыт вераськемзы буйгатэ, быдэс нунал но ӧй тырмысал вань визьнодъёссэс кылзӥськыны.

«Зарни» парлы азьланяз но кизэс кутыса азьлань улонтӥ вамышъяны сӥзисько. Сюлмады котьку яратон, шуныт малпанъёс возьыса, нылпиостылы кенеш сётыны кужымды кема аръёслы мед тырмоз на! Тӥляд сюлэм шунытты котыр матысь адямиос понна зэмос люкаськон инты мед луоз, нокыӵе шуг-секытъёс сюресады медаз кылдэ, нош шумпотонъёсты нуналысь нуналэ тросгес мед луозы!

Юлия Щербакова