Ӵош ужам эше сярысь

Соос пӧлысь одӥгез — Борисовлэн кенэз, Маша. Соин тужгес но кылмы тупа вал, малы ке шуоно со туж лачмыт, тыршись но ӟеч сямо адями. Вазь ӵукна султыса, юртъер котырысь ужъёсты ужаса, пудо сюдыса, чик ӝегатскытэк, 6-7 иськем  кусыпез пыдын ортчыса, дыраз ужан интыяз лыктыса вуэ но бигер кылысь берыктэм статьяосты машинкаен печатланы (Мария Константиновна «Азьлане» газетын машинистка луыса ужаз) кутске вал. Тодэмея, солэн ужез ласянь нокин но ӧз ӝожтӥськы, котькинлы кельшиз ужамез. Удмурт калык кылзӥськись, ужась калык уго, удмуртъёслэн вылтӥяськон сямзы но ӧвӧл, быдэстоно  ужез пумозяз вуттоно шуэм ужпумен уло. Гажано Машамы ужан куспаз вакчи дыр ӵоже гинэ декрет отпуске потылыса, семьязэ куинь пиен шумпоттӥз, анайзыез юрттэмен соосты утиз-вордӥз, визьнодаз. Туннэ нуналэ куинез ик пиез ӧнер басьтыса, семья кылдытыса, анай-атайзэс шумпоттыса ас вордскем музъемазы ик уло но тыршо.

— Кузпалэным, Володяен, тупаса улыса ас кужыменымы куинь корка ӝутӥмы: кык пимес яна поттӥмы, валтӥсь юртмес но нэгызысеныз  кутскыса выльысен лэсьтӥмы, — вера Мария, улон бугорзэ сэрттыса. Соиз ушъямон, лэсьтӥськон ужъёсты пунэме пырытэк, ас кужыменызы, пиоссы ог-огзылы юрттыса быдэстӥллям. Азьланяз но озьы улыны мед кылдоз, шудо мед луозы Борисовъёс.

Кенъёсыз но анайзызылы тупаллям, куиньназы но шаплыесь, зэмос кузё кышноос, нылпи вордонын-визьноданын но, ужын но сётскисьёс пӧлысь ӧвӧл. Мон ӟеч тодӥсько Машалэсь покчи кензэ. Ирина калыкын «Ромашка» нимын тодмо луэм аптекаын ужа. Котькуд ӵукна пудо утялтыса, скал кыскыса, со но яратоно ужаз дыртэ. Небыт кыло, лякыт сямо но адямилыко луэмысьтыз яратэ сое та аптекае ветлӥсь калык.

...Ӟырт кезьытъёсын но, зоро нуналъёсын но, кузь сюресэз (Гондыргуртысен Балтасе ветлыса ужано вал уга — ред.) ӵемысь пыдын ортчем, дораз бертыса но юртъер котырысь ужъёсын пӧзем Маша, берло дыре ёзвиосыз висьыса ӧжытак курадӟиз ке но, туннэ, мӧйымон нуналъёсаз но, со семья кусыпъёсты утьыса, яратоно внукъёссэ визьнодаса улэ. Соослы юрттыны быгатэмезлы шумпотэ, сюлмазы ӟеч сямъёслэсь кидысъёссэ кизе. Гумырыз ӵоже чылкыт сюлмын, мыло-кыдо тыршыса ужамез, адямиосын сюлмо но каньыл луэмез тӥни озьы «пунэмзэ» ӟечен берыктэм, луоз, ӵош ужам эшелы.

Фарида Шакирова